ലണ്ടന്‍: വിംബിള്‍ഡണ്‍ കിരീടം നേടാനുള്ള ലോക ഒന്നാം നമ്പര്‍ വനിതാ താരം ബലറൂസിന്റെ അരിന സബലേങ്കയുടെ മോഹം ഇത്തവണയും പൊലിഞ്ഞു. 23കാരിയായ 13ാം സീഡ് അമേരിക്കയുടെ അമാന്‍ഡ അനിസിമോവ സബലേങ്കയെ അട്ടിമറിച്ച് കരിയറിലെ ആദ്യ ഗ്രാന്‍ഡ് സ്ലാം ഫൈനലിലേക്ക് കുതിച്ചെത്തി.

ഫൈനലില്‍ പേളണ്ടിന്റെ ഇഗ സ്യെതകാണ് അമാന്‍ഡയുടെ ഫൈനലിലെ എതിരാളി. താരവും ആദ്യമായാണ് വിംബിള്‍ഡണ്‍ ഫൈനലിലേക്ക് മുന്നേറിയത്. സെമിയില്‍ സ്വിറ്റ്‌സര്‍ലന്‍ഡ് താരം ബെലിന്ദ ബെന്‍സിചിയെ വീഴ്ത്തിയാണ് സ്യെംതക് കന്നി ഫൈനലിലേക്ക് മുന്നേറിയത്.

സെറീനയ്ക്ക് ശേഷം

ചരിത്രമെഴുതിയാണ് താരത്തിന്റെ ഫൈനല്‍ ബര്‍ത്ത് ഉറപ്പിക്കല്‍. വനിതാ സിംഗിള്‍സ് വിംബിള്‍ഡണ്‍ ഫൈനലിലേക്ക് എത്തുന്ന ഏറ്റവും പ്രായം കുറഞ്ഞ അമേരിക്കന്‍ താരമായി അനിസിമോവ മാറി. 2004ല്‍ ഇതിഹാസ താരം സെറീന വില്ല്യംസ് സ്ഥാപിച്ച റെക്കോര്‍ഡാണ് താരം തകര്‍ത്തത്.

മൂന്ന് സെറ്റ് പോരാട്ടത്തില്‍ ഒന്നും മൂന്നും സെറ്റുകള്‍ വിജയിച്ചാണ് അനിസിമോവ ടൂര്‍ണമെന്റിലെ മിന്നും ഫോം തുടര്‍ന്നത്. രണ്ടാം സെറ്റ് പിടിച്ച് സബലേങ്ക തിരിച്ചടിച്ചെങ്കിലും മൂന്നാം സെറ്റില്‍ അനിസിമോവ തിരിച്ചെത്തുകയായിരുന്നു. സ്‌കോര്‍: 6-4, 4-6, 6-4.

2019ല്‍ ഫ്രഞ്ച് ഓപ്പണ്‍ സെമിയിലെത്തിയതാണ് അനിസിമോവയുടെ ഗ്രാന്‍ഡ് സ്ലാമിലെ ഇതുവരെയുള്ള മികച്ച പ്രകടനം. മൂന്ന് വട്ടം ഓസ്‌ട്രേലിയന്‍ ഓപ്പണ്‍ പോരാട്ടത്തിന്റെ നാലാം റൗണ്ടില്‍ പുറത്തായ 23കാരി യുഎസ് ഓപ്പണില്‍ ഒരു വട്ടം മൂന്നാം റൗണ്ടിലും പുറത്തായി.

മൂന്ന് ഗ്രാന്‍ഡ് സ്ലാം കിരീടമുള്ള സബലേങ്ക ഇത് മൂന്നാം തവണയാണ് വിംബിള്‍ഡണ്‍ സെമിയില്‍ വീഴുന്നത്. നേരത്തെ 2021, 2023 വര്‍ഷങ്ങളിലും താരം സെമിയില്‍ വീണിരുന്നു. ഇത്തവണ ഫ്രഞ്ച് ഓപ്പണ്‍ ഫൈനലിലെത്തിയ ബലൂറിസിയന്‍ താരത്തിനു കിരീടം നേടാനായിരുന്നില്ല. പിന്നാലെയാണ് വിബിംള്‍ഡണിലെ നിരാശാ മടക്കം.

ആദ്യമായി സ്യെംതകും

അനായാസ വിജയമാണ് സ്യെംതകിന്റേത്. രണ്ട് മാത്രം നീണ്ട പോരാട്ടം. ഒന്നാം 6-2നു സ്വന്തമാക്കിയ സ്യെംതക് രണ്ടാം സെറ്റില്‍ ഒരു പോയിന്റ് പോലും വിട്ടുകൊടുക്കാതെ 6-0ത്തിനു സെറ്റും മത്സരവും പിടിച്ചു. 4 ഫ്രഞ്ച് ഓപ്പണ്‍ കിരീടവും ഒരു യുഎസ് ഓപ്പണ്‍ കിരീടവും സ്വന്തമാക്കിയ താരമാണ് സ്യെംതക്.