മുംബൈ: വനിതാ പ്രീമിയര്‍ ലീഗിലെ രണ്ട് മത്സരങ്ങള്‍ക്ക് ആരാധകരെ പ്രവേശിപ്പിക്കില്ലെന്നു റിപ്പോര്‍ട്ടുകള്‍. മത്സരം അടച്ചിട്ട സ്റ്റേഡിയത്തില്‍ നടക്കുമെന്നാണ് വിവരം.

നവി മുംബൈ മുന്‍സിപ്പല്‍ കോര്‍പറേഷന്‍ തെരഞ്ഞെടുപ്പ് ഈ മാസം 15നാണ് നടക്കുന്നത്. ഇതിന്റെ ഭാഗമായാണ് കാണികളെ പ്രവേശിപ്പിക്കാതെ മത്സരം നടത്താന്‍ പ്രീമിയര്‍ ലീഗ് അധികൃതര്‍ക്ക് പൊലീസ് നല്‍കിയിരിക്കുന്ന നിര്‍ദ്ദേശം.

ഈ മാസം 14നു നടക്കുന്ന ഡല്‍ഹി ക്യാപിറ്റല്‍സ്- യുപി വാരിയേഴ്‌സ്, 15നു അരങ്ങേറുന്ന മുംബൈ ഇന്ത്യന്‍സ്- യുപി വാരിയേഴ്‌സ് പോരാട്ടങ്ങളാണ് അടച്ചിട്ട സ്‌റ്റേഡിയത്തില്‍ നടത്തുന്നത്. 16നു നടക്കുന്ന ഗുജറാത്ത് ജയന്റസ്- റോയല്‍ ചലഞ്ചേഴ്‌സ് ബംഗൂരു ടീമുകളുടെ പോരാട്ടവും ഇത്തരത്തില്‍ നടത്തുമെന്നു റിപ്പോര്‍ട്ടുകളുണ്ടെങ്കിലും സ്ഥിരീകരണം വന്നിട്ടില്ല.

ഈ ദിവസങ്ങളില്‍ മതിയായ രീതിയില്‍ സുരക്ഷ നല്‍കാന്‍ പൊലീസിനു സാധിക്കില്ലെന്നു അധികൃതര്‍ ബിസിസിഐയോടു വ്യക്തമാക്കിയിരുന്നു. പിന്നാലെയാണ് കാണികളെ പ്രവേശിപ്പിക്കാതെ മത്സരം നടത്താന്‍ നിര്‍ദ്ദേശം നല്‍കിയത്.