കഴിഞ്ഞ സീസണോടെ മെസിയോട് പോലും ലിവര്‍പൂള്‍ താരം മുഹമ്മദ് സലയെ താരതമ്യം ചെയ്തിരുന്നു ഫുട്‌ബോള്‍ ലോകം. ഇപ്പോള്‍ വീണ്ടും ആരാധകരെ കുഴയ്ക്കുകയാണ് ഇരുവരും. ആരാധകരുടെ കണ്ണ് തള്ളിപ്പോകും വിധം പന്തും കാലും കൊണ്ട് വിസ്മയിപ്പിക്കുകയാണ് അടുത്തിടെ പുറത്തിറങ്ങിയ പരസ്യത്തില്‍.

പെപ്‌സിയുടെ പരസ്യത്തിലാണ് സംഭവം. പെട്രോള്‍ സ്‌റ്റേഷനിലാണ് ഇരുവരും. അവസാനത്തെ പെപ്‌സി ടിന്നിന് വേണ്ടി ഇരുവരും പന്ത് കൊണ്ട് നടത്തുന്ന പോര്. ഇരുവരും പന്ത് കൊണ്ട് പരസ്പരം പോരടിച്ച് നില്‍ക്കുമ്പോള്‍ മറ്റൊരാള്‍ വന്ന് ആ ടിന്‍ കൈക്കലാക്കുന്നു. അവസാനം പെപ്‌സി ട്രക്കിന് പിന്നാലെ സലയും മെസിയും ഓടുന്നതാണ് പരസ്യം. 

നേരത്തെ പന്തിന് മുകളില്‍ പെപ്‌സി കുപ്പി വെച്ച് പന്ത് ടയറിനുള്ളിലൂടെ അടിച്ച് മെസിയും, ടയറിന് മുകളിലിരിക്കുന്ന പെപ്‌സി ലക്ഷ്യം തെറ്റാതെ അടിച്ച് താഴെയിട്ട് സലയും എത്തിയിരുന്നു. ഇരുവരും ഒരു ടീമില്‍ കളിച്ചിരുന്നെങ്കില്‍ എങ്ങിനെയാവുമെന്ന് ചിന്തിച്ചുനോക്കൂ എന്നാണ് ആരാധകര്‍ ഇപ്പോള്‍ പറയുന്നത്.