ലോകത്തിന് മുന്നില്‍ നിന്നും ഇരുകൈകളാലും കിരീടം ആകാശത്തേക്ക് ഉയര്‍ത്തുന്ന നിമിഷം. ടീം ഏതായാലും ക്രിക്കറ്റ് ആരാധകര്‍ക്ക് അത് പ്രധാനപ്പെട്ടതാണ്. ട്രോഫികളുടെ രൂപവും ടീമുകളും ആരാധകരും ഒരേപോലെ ശ്രദ്ധിക്കുന്ന ഒന്നാണ്. ഓസീസ് പാക്കിസ്ഥാന്‍ പരമ്പരയുടെ ട്രോഫി കണ്ട് ചിരിയടക്കാന്‍ വയ്യെന്നാണ് ആരാധകര്‍ പറയുന്നത്. 

ബിസ്‌കറ്റാണ് ഈ ട്രോഫിയിലെ സവിശേഷത. മൂന്ന്  സ്റ്റമ്പും, ഒരു പന്തും അതിന് മുകളില്‍ ഒരു ബിസ്‌കറ്റുമാണ് ട്രോഫിയുടെ ഘടന. ഓസീസ് നായകന്‍ ആരോണ്‍ ഫിഞ്ചും, പാക് നായകന്‍ സര്‍ഫ്രാസ് അഹ്മദും ചേര്‍ന്നായിരുന്നു ഏകദിന പരമ്പരയുടെ ട്രോഫി പുറത്തിറക്കിയത്. എന്നാല്‍ ആ ബിസ്‌കറ്റാണ് ആരാധകരെ ചിരിപ്പിക്കുന്നത്. 

ട്രോഫി ഇരുവരും ചേര്‍ന്ന് പുറത്തിറക്കിയതിന് പിന്നാലെ തന്നെ സമൂഹമാധ്യമങ്ങളില്‍ വൈറലാവുകയും ചെയ്തു. ട്രോളുകള്‍ നിരന്നപ്പോള്‍ രാജ്യാന്തര ക്രിക്കറ്റ് കൗണ്‍സിലും മാറി നിന്നില്ല. ബിസ്‌കറ്റ് കൊടുക്കല്‍ വാങ്ങലിന്റെ പുതിയ തലങ്ങള്‍ എന്നായിരുന്നു ഐസിസിയുടെ ട്വീറ്റ്.