2018 ഐപിഎല്‍ സീസണില്‍ ധോനി തകര്‍ത്തു കളിച്ചിരുന്നു. 2019ല്‍ അതിലും ഗംഭീരമായിട്ടാണ് ചെന്നൈ സൂപ്പര്‍ കിങ്‌സ് നായകന്റെ കളി. കരിയറിന്റെ അവസാന ഘട്ടത്തില്‍ എത്തി നില്‍ക്കുന്നൊരാള്‍ എങ്ങനെയാണ് ഇങ്ങനെ തകര്‍ത്തു കളിക്കുക. ക്രിക്കറ്റ് പ്രേമികളുടെയെല്ലാം മനസിലൂടെ ഈ ചോദ്യം കടന്നു പോയിട്ടുണ്ടാവും.
2018ല്‍, ചെന്നൈ കിരീടത്തിലേക്ക് എത്തിയപ്പോള്‍ 16 മത്സരങ്ങളില്‍ നിന്നും 455 റണ്‍സാണ് ധോനി സ്‌കോര്‍ ചെയ്തത്. 75.83 ബാറ്റിങ് ശരാശരി. ഐപിഎല്‍ പന്ത്രണ്ടാം സീസണില്‍ 9 മത്സരങ്ങള്‍ പിന്നിടുമ്പോഴേക്കും ധോനി 314 റണ്‍സ് സ്‌കോര്‍ ചെയ്തു കഴിഞ്ഞു, 104 എന്ന കിടിലന്‍ ബാറ്റിങ് ശരാശരിയില്‍.
ബാംഗ്ലൂരിനെതിരെ ടീമിനെ ജയത്തിന്റെ അരികിലേക്ക് എത്തിച്ച ഇന്നിങ്‌സിലൂടെ ഐപിഎല്ലിലെ തന്റെ ഉയര്‍ന്ന സ്‌കോറും ധോനി തിരുത്തി എഴുതി. 48 പന്തില്‍ നിന്നാണ് ബാംഗ്ലൂരിനെതിരെ ധോനി 84 റണ്‍സ് അടിച്ചെടുത്തത്. ധോനി പ്രതീക്ഷിച്ച ഫലം ലഭിച്ചില്ലെങ്കിലും ക്രിക്കറ്റ് പ്രേമികള്‍ ധോനിയുടെ ആ ഇന്നിങ്‌സ് മറക്കുവാന്‍ ഇടയില്ല. ലോകകപ്പിനായി കാത്തിരിക്കുന്ന ഇന്ത്യയുടെ പ്രതീക്ഷകള്‍ ഉയര്‍ത്തുകയുമാണ് ധോനി അവിടെ.
ബാംഗ്ലൂരിനെതിരായ മത്സരത്തില്‍ ധോനിയുടെ കണക്കു കൂട്ടലിനും കൂടിയാണ് ആരാധകരുടെ കയ്യടി. അവസാന രണ്ട് ഓവറില്‍ ജയിക്കാന്‍ വേണ്ടിയത് 36 റണ്‍സ്. കൂറ്റനടിക്ക് കരുത്തനായ ബ്രാവോയ്ക്ക് സ്‌ട്രൈക്ക് നല്‍കാതെ, സിംഗിള്‍ എടുക്കാന്‍ വിസമ്മതിക്കുകയായിരുന്നു ധോനി. അതിന്റെ പേരില്‍ വിമര്‍ശനം ഉയരുമെന്ന് ഉറപ്പായിരുന്നിട്ടും ധോനി തന്റെ കണക്കു കൂട്ടലുകളില്‍ ഉറച്ച് വിശ്വസിച്ചു.
പുതിയ ബാറ്റ്‌സ്മാന് തുടക്കത്തില്‍ ബുദ്ധിമുട്ട് തരുന്നതായിരുന്നു ആ പിച്ച്. കുറേ ഡെലിവറികള്‍ ഞാന്‍ നേരിട്ടു എന്നതിനാല്‍ എനിക്ക് അവിടെ റിസ്‌ക് എടുക്കാന്‍ സാധിക്കും. കാരണം ആ സമയം കൂടുതല്‍ ബൗണ്ടറികള്‍ നമുക്ക് വേണമായിരുന്നു. എന്നാലിപ്പോള്‍ നിങ്ങള്‍ക്ക് കണക്കു കൂട്ടി പറയുവാനാവും, സിംഗിള്‍സ് എടുക്കാതിരുന്നതിലൂടെ 2-3 റണ്‍സ് നമുക്ക് നഷ്ടപ്പെട്ടു എന്ന്. എന്നാല്‍ നിങ്ങള്‍ ചിന്തിക്കേണ്ടത്, രണ്ട് മൂന്ന് ഡോട്ട് ബോളുകള്‍ക്ക് പകരം, ബൗണ്ടറികളിലൂടെ കൂടുതല്‍ റണ്‍സ് കണ്ടെത്തുവാനുള്ള സാധ്യതയാണ്. ബാംഗ്ലൂരിനെതിരായ മത്സരത്തിന് ശേഷം ധോനിയുടെ വാക്കുകള്‍ ഇങ്ങനെയായിരുന്നു.
ബാംഗ്ലൂരിനെതിരെ ധോനിയുടെ കണക്കു കൂട്ടലുകള്‍ പിഴച്ചില്ല. പിഴച്ചത് ഉമേഷ് യാദവിന്റെ സ്ലോ ഡെലിവറിയില്‍ മാത്രം. ഓഫ് സൈഡിലേക്ക് ധോനിയെ കളിപ്പിക്കുകയായിരുന്നു ഞങ്ങളുടെ ലക്ഷ്യം. അതിനാല്‍ ഉമേഷിനോട് ഔട്ട് സൈഡ് ഓഫ് സ്റ്റംപിലേക്ക് എറിയുവാനാണ് നിര്‍ദേശിച്ചത്. പക്ഷേ അപ്പോഴും ധോനിക്ക് ആ പന്ത് മിസ് ചെയ്യുമെന്ന് ചിന്തിച്ചിരുന്നില്ല എന്നാണ് ആര്‍സിബി താരം പാര്‍ഥീവ് പട്ടേല്‍ പറയുന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates