ന്യൂഡല്‍ഹി: അയോധ്യാ കേസിലെ സുപ്രീംകോടതി വിധി വന്നതിന് പിന്നാലെ പ്രതികരണങ്ങളുമായി കായിക താരങ്ങളുമെത്തിയിരുന്നു. ക്രിക്കറ്റ് താരം വീരേന്ദര്‍ സെവാഗ്, ഗുസ്തി താരം ഗീതാ ഫോഗട്ട്, യോഗേശ്വര്‍ ദത്ത് എന്നിവരാണ് സുപ്രീംകോടതി വിധിയില്‍ സന്തോഷം രേഖപ്പെടുത്തി പ്രതികരിച്ചത്.

ശ്രീരാമന്റെ ഫോട്ടോയ്‌ക്കൊപ്പം ശ്രീ റാം, ജയ് ജയ് റാം എന്നാണ് സെവാഗ് ട്വീറ്റ് ചെയ്തത്. എച്ച് എന്നാല്‍ ഹിന്ദു, എം-മുസ്ലീം, ഹം(WE)-ഹിന്ദുസ്ഥാന്‍ എന്ന് പറഞ്ഞായിരുന്നു ഗീതാ ഫൊഗട്ടിന്റെ ട്വീറ്റ്.

ഹരിയാന തെരഞ്ഞെടുപ്പില്‍ ബിജെപി സ്ഥാനാര്‍ഥിയായ മത്സരിച്ച യോഗേശ്വര്‍ ദത്ത് മുറിവുണക്കിയതിന് സുപ്രീംകോടതിക്ക് നന്ദി എന്നാണ് ട്വീറ്റ് ചെയ്തത്. രാമജന്മഭൂമി സംബന്ധിച്ച്വ്രണമായി മാറിയ മുറിവ് എടുത്ത് കളഞ്ഞതിന് നന്ദിയെന്നാണ് യോഗേശ്വര്‍ ദത്ത് പറഞ്ഞത്.

അയോധ്യ വിധി എന്തായിരുന്നാല്‍ തന്നേയും എല്ലാവരും സമാധാനത്തോടെയിരിക്കണം എന്ന ആഹ്വാനമാണ് ഗംഭീറില്‍ നിന്നുണ്ടായത്. നമ്മള്‍ ഇപ്പോഴും ഇനിയും ഇന്ത്യന്‍ കുടുംബമായി തന്നെ നിലകൊള്ളുമെന്നും ഗംഭീര്‍ ട്വീറ്റ് ചെയ്തു.