ജോണ്ടി റോഡ്‌സിന്റെ മകളുടെ പേര് ഇന്ത്യ എന്നാണ്. ഇന്ത്യയെ എത്രത്തോളം അദ്ദേഹം സ്‌നേഹിക്കുന്നുണ്ടെന്ന് ഇതില്‍ നിന്ന് തന്നെ വ്യക്തം. എന്തുകൊണ്ട് താന്‍ ഇന്ത്യയെ അത്രത്തോളം സ്‌നേഹിക്കുന്നു എന്നതിന് വീഡിയോ സഹിതം മറുപടിയുമായി എത്തുകയാണ് ജോണ്ടി റോഡ്‌സ് ഇപ്പോള്‍. 

കോവിഡ് ക്വാറന്റീന്‍ ക്യാമ്പില്‍ ക്രിക്കറ്റ് കളിക്കുന്ന വീഡിയോയാണ് ജോണ്ടി റോഡ്‌സ് പങ്കുവെക്കുന്നത്. വലിയൊരു ഹാളില്‍ അകലം പാലിച്ചിട്ട ബെഡുകള്‍ക്കെല്ലാം സമീപത്തായി ക്രിക്കറ്റ് കളിക്കുകയാണ് ഏതാനും പേര്‍. വീഡിയോയ്ക്ക് ഒപ്പം സൗത്ത് ആഫ്രിക്കന്‍ മുന്‍ താരം എഴുതുന്നത് ഇങ്ങനെ...ആളുകള്‍ പലപ്പോഴായി എന്നോട് ചോദിക്കാറുണ്ട്, ഇത്രമാത്രം സ്‌നേഹിക്കാന്‍ ഇന്ത്യക്കുള്ള പ്രത്യേകത എന്തെന്ന്...ഞാന്‍ ഇതില്‍ കൂടുതല്‍ പറയണോ...

ജമ്മുകശ്മീര്‍ മുന്‍ മുഖ്യമന്ത്രി ഒമര്‍ അബ്ദുള്ളയും വീഡിയോ പങ്കുവെച്ചിരുന്നു. സ്ഥലമുണ്ടെങ്കില്‍ കളിക്കും, ക്വാറന്റീന്‍ ടൈം പാസ് എന്നാണ് ഒമര്‍ അബ്ദുള്ള ഈ വീഡിയോ പങ്കുവെച്ച് കുറിച്ചത്. എന്നാല്‍ എപ്പോള്‍ എവിടെ വെച്ചാണ് ഈ വീഡിയോ പിടിച്ചതെന്ന് അദ്ദേഹം പറയുന്നില്ല.