ബെംഗളൂരു: ഇന്ത്യന്‍ പ്രീമിര്‍ ലീഗില്‍ മറ്റൊരു കേരള താരം കൂടി പാഡണിയും. കേരളത്തിന്റെ ഓപ്പണിംഗ് ബാറ്റ്‌സ്മാനായ വിഷ്ണു വിനോദിനെ റോയല്‍ ചാലഞ്ചേഴ്‌സ് ബെംഗളൂരുവാണ് ടീമിലെടുത്തത്. ബെംഗളൂരുവിന്റെ വിക്കറ്റ് കീപ്പര്‍ ബാറ്റ്‌സ്മാന്‍ ലോകേഷ് രാഹുലിന് പരിക്കേറ്റതാണ് വിഷ്ണുവിന് ഇന്ത്യന്‍ ക്യാപ്റ്റന്‍ വിരാട് കോഹ്ലി നയിക്കുന്ന റോയല്‍ ചലഞ്ചേഴ്‌സിലേക്കുള്ള വഴിയൊരുക്കിയത്. സയ്യിദ് മുഷ്താഖ് അലി ടിട്വന്റി ടൂര്‍ണമെന്റിലെ മികച്ച പ്രകടനമാണ് വിഷ്ണുവിന് ഐപിഎല്ലിലേക്ക് വഴി തുറന്നത്.

റോയല്‍ ചലഞ്ചേഴ്‌സിന്റെ ഫൈനല്‍ ട്രയല്‍സ് വരെ എത്തിയിരുന്ന വിഷ്ണുവിനെ ഡാനിയല്‍ വെട്ടോറിയുടെ നിര്‍ദേശ പ്രകാരമാണ് ടീമിലെടുക്കാന്‍ ബെംഗളൂരു തീരുമാനിച്ചത്. താരത്തെ ടീമിലെടുക്കാന്‍ ബിസിസിഐക്ക് ബെംഗളൂരു നല്‍കിയ അപേക്ഷയ്ക്ക് അനുമതി നല്‍കിയതാണ് വിഷ്ണുവിന് നേട്ടമായത്. മറ്റൊരു മലയാളി താരമായ സച്ചിന്‍ ബേബിയും ബെംഗളൂരു ടീമിലുണ്ട്.