പുനെ: തന്റെ ഇഷ്ട താരത്തിന്റെ അടുത്തെത്താന്‍ ഗ്രൗണ്ടിലേക്ക് ഓടിയെത്തി ആരാധകന്‍. ഇത്തവണ രോഹിത് ശര്‍മയുടെ ആരാധകന്റെ ഊഴമായിരുന്നു. ചുമ്മാ ഓടിയെത്തുക മാത്രമല്ല, പ്രിയ താരത്തെ ഗ്രൗണ്ടില്‍ വീഴ്ത്തിയാണ് ആരാധകന്‍ മടങ്ങി പോയത്. 

സൗത്ത് ആഫ്രിക്കയുടെ ബാറ്റിങ്ങിന് ഇടയിലാണ് സംഭവം. രോഹിത്തിന്റെ കാലില്‍ തൊടാനുള്ള ആരാധകന്റെ ശ്രമത്തിന് ഇടയില്‍ മുന്‍പിലേക്കാഞ്ഞ് ബാലന്‍സ് തെറ്റി വീഴുകയായിരുന്നു രോഹിത്. എന്നാല്‍ ആരാധകന്റെ വരവ് ഈ സമയം കമന്ററി ബോക്‌സിലുണ്ടായിരുന്ന സുനില്‍ ഗാവസ്‌കറിന് രസിച്ചില്ല. 

കളിക്കാരുടെ സുരക്ഷയെ ബാധിക്കുന്ന കാര്യമാണ് ഇതെന്നും, സുരക്ഷ ജീവനക്കാര്‍ അവരുടെ ജോലി ചെയ്യാതെ കളി കണ്ട് രസിച്ച് നില്‍ക്കുകയാണോ എന്ന് നോക്കണം എന്നും ഗാവസ്‌കര്‍ പറഞ്ഞു. വിശാഖപട്ടണം ടെസ്റ്റിന് ഇടയില്‍ കോഹ് ലിക്ക് അടുത്തേക്കും ആരാധകന്‍ ഓടിയെത്തിയിരുന്നു. 

ആദ്യ ടെസ്റ്റില്‍ കോഹ് ലിക്കൊപ്പം നിന്ന് സെല്‍ഫി എടുക്കാനായിരുന്നു ഗ്രൗണ്ടിലേക്കെത്തിയ ആരാധകന്റെ ശ്രമം. ടെസ്റ്റിന് മുന്‍പ് നടന്ന ട്വന്റി20 മത്സരത്തിന് ഇടയില്‍ രണ്ട് വട്ടം ആരാധകര്‍ ഗ്രൗണ്ടിലേക്ക് ഓടിയിറങ്ങുന്ന സാഹചര്യമുണ്ടായി.