മെല്‍ബണ്‍: ഓസ്‌ട്രേലിയന്‍ ഓപണ്‍ ടെന്നീസ് പോരാട്ടത്തില്‍ നിന്ന് മുന്‍ ചാമ്പ്യനും സ്വിസ് ഇതിഹാസവുമായ റോജര്‍ ഫെഡറര്‍ പുറത്ത്. സെമിയില്‍ നിലവിലെ ചാമ്പ്യന്‍ സെര്‍ബിയയുടെ നൊവാക് ദ്യോക്കോവിചാണ് ഫെഡററെ വീഴ്ത്തിയത്. 

മൂന്ന് സെറ്റ് മാത്രം നീണ്ട പോരാട്ടത്തില്‍ അനായാസമായാണ് ദ്യോക്കോ വിജയം സ്വന്തമാക്കിയത്. ആദ്യ സെറ്റ് മാത്രം ടൈ ബ്രേക്കറിലേക്ക് നീണ്ടപ്പോള്‍ രണ്ടും മൂന്നും സെറ്റുകള്‍ ഫെഡ് എക്‌സ്പ്രസിന് ഒരു പഴുതും അനുവദിക്കാതെ ദ്യോക്കോ സ്വന്തമാക്കുകയായിരുന്നു. സ്‌കോര്‍: 7-6 (7-1), 6-4, 6-3. ഡൊമിനിക് തീം- അലക്‌സാണ്ടര്‍ സ്വരേവ് സെമി പോരാട്ടത്തിലെ വിജയിയാണ് ഫൈനലില്‍ ദ്യോക്കോയുടെ എതിരാളി. 

എട്ടാം ഓസ്‌ട്രേലിയന്‍ ഓപണ്‍ കിരീടത്തിലേക്ക് ഒരു വിജയം മാത്രമാണ് ഇനി സെര്‍ബിയന്‍ താരത്തിന് ആവശ്യമുള്ളത്. കരിയറിലെ 17ാം ഗ്രാന്‍ഡ് സ്ലാം കിരീടവും ദ്യോക്കോ മെല്‍ബണില്‍ ലക്ഷ്യമിടുന്നു. 

പ്രീ ക്വാര്‍ട്ടറിലും ക്വാര്‍ട്ടറിലും കടുത്ത പോരാട്ടം കാഴ്ചവെച്ച ഫെഡറര്‍ക്ക് ആ മികവ് സെമിയില്‍ പുറത്തെടുക്കാന്‍ സാധിച്ചില്ല.