ബംഗളൂരു: ഫൈനല്‍ പോരിന്റെ ആവേശത്തിലേക്കെത്തിയ മൂന്നാം ഏകദിനത്തില്‍ ടോസ് നേടിയ ഓസ്‌ട്രേലിയ ബാറ്റിങ് തെരഞ്ഞെടുത്തു. രാജ്‌കോട്ടില്‍ ഇറങ്ങിയ പ്ലേയിങ് ഇലവനില്‍ നിന്ന് മാറ്റമില്ലാതെയാണ് ഇന്ത്യ ബംഗളൂരുവില്‍ ഇറങ്ങുന്നത്. 

രോഹിത് ശര്‍മയും, ശിഖര്‍ ധവാനും പരിക്കിന്റെ പിടിയില്‍ നിന്ന് മോചിതരായി എത്തി. ടോസ് നേടിയിരുന്നു എങ്കില്‍ തങ്ങളും ബാറ്റിങ് തെരഞ്ഞെടുത്തേനെയെന്ന് കോഹ് ലി പറഞ്ഞു. സ്പിന്നര്‍മാരെ തുണയ്ക്കുന്ന പിച്ചാണ് ചിന്നസ്വാമി സ്റ്റേഡിയത്തിലേത്. ചെയ്‌സ് ചെയ്യുന്ന ടീമിന് മേല്‍ സമ്മര്‍ദം കൂടും. 

മൂന്ന് ഏകദിനങ്ങളുടെ പരമ്പരയില്‍ മൂന്ന് വട്ടവും ടോസ് ഭാഗ്യം ഫിഞ്ചിനൊപ്പമാണ് നിന്നത്. മുംബൈയില്‍ ഇന്ത്യയെ പൊരുതാവുന്ന സ്‌കോര്‍ കണ്ടെത്താന്‍ അനുവദിക്കാതെ വലിഞ്ഞി മുറിക്കി 10 വിക്കറ്റിന് ജയം പിടിച്ചപ്പോള്‍, രണ്ടാം ഏകദിനത്തിലെ ഫിഞ്ചിന്റെ ചെയ്‌സ് ചെയ്യാനുള്ള തീരുമാനം പിഴച്ചു. 

മൂന്നാം ഏകദിനത്തില്‍ മറ്റൊരു റിസ്‌കിനും ഇടംനല്‍കാതെ ഫിഞ്ച് ബാറ്റിങ് തെരഞ്ഞെടുക്കുകയായിരുന്നു. ഒരു മാറ്റവുമായാണ് ഓസ്‌ട്രേലിയ ഇറങ്ങുന്നത്. റിച്ചാര്‍ഡ്‌സന് പകരം ഹസല്‍വുഡ് ടീമിലേക്ക് എത്തി.