ഐപിഎല്ലിൽ തകർപ്പൻ സെഞ്ച്വറി നേടിയ രാജസ്ഥാൻ റോയൽസിന്റെ മലയാളി താരം സഞ്​ജു വി സാംസണെ പുകഴ്​ത്തി മുൻ ഇന്ത്യൻ താരം ഗൗതം ഗംഭീർ. ഇന്ത്യയിലെ ഏറ്റവും മികച്ച വിക്കറ്റ് കീപ്പർ ബാറ്റ്സ്മാൻ സഞ്ജുവാണ്. അദ്ദേഹത്തെ ലോകകപ്പ് ടീമിൽ ഉൾപ്പെടുത്തണമെന്നാണ് ​ഗംഭീർ ആവശ്യപ്പെട്ടത്. ട്വിറ്ററിലാണ്​ ​ഗംഭീർ സഞ്​ജുവിനെ പ്രശംസിച്ച്​ രംഗത്തെത്തിയത്​. 

പൊതുവേ ക്രിക്കറ്റിലെ വ്യക്​തികളെ കുറിച്ച്​ പറയാൻ താൽപര്യപ്പെടാത്ത ആളാണ്​ ഞാൻ. പക്ഷെ സഞ്​ജുവിൻെറ കഴിവ്​ കാണുമ്പോൾ സന്തോഷത്തോടെ പറയാൻ ആ​ഗ്രഹിക്കുകയാണ്. സഞ്​ജുവാണ്​ നിലവിൽ ഇന്ത്യയിലെ ഏറ്റവും മികച്ച വിക്കറ്റ്​ കീപ്പർ ബാറ്റ്​സ്​മാൻ. അവൻ ലോകകപ്പിൽ നാലാമനായി ബാറ്റ്​ ചെയ്യണമെന്നാണ്​ ഞാൻ ആഗ്രഹിക്കുന്നത്​. -ഗംഭീർ ട്വിറ്ററിൽ കുറിച്ചു. ബിസിസിഐ, ഐപിഎൽ, രാജസ്ഥാൻ റോയൽസ് എന്നിവരെ ടാഗ്​ ചെയ്​താണ്​ ഗംഭീർ ട്വീറ്റിട്ടത്​.

അതേസമയം ​ഗംഭീറിന്റെ പ്രശംസയും പരാമർശവും ധോണിയെ ലക്ഷ്യം വെച്ചാണെന്ന്,  ട്വീറ്റിന്​ താഴെ പ്രതികരണങ്ങൾ വന്നിട്ടുണ്ട്.  ഈ വർഷത്തെ ഐപിഎല്ലിലെ ആദ്യ സെഞ്ച്വറിയാണ്​ സൺറൈസേഴ്സ് ഹൈദരാബാദിനെതിരെ സഞ്​ജു സ്വന്തമാക്കിയത്​. 55 പന്തിൽ 10 ബൗണ്ടറികളുടെയും നാല് കൂറ്റൻ സിക്​സറുകളുടെയും അകമ്പടിയോടെ102 റൺസാണ് സഞ്ജു അടിച്ചെടുത്തത്. എന്നാൽ മൽസരം രാജസ്ഥാൻ തോറ്റു.