“ദീപാവലി ആഘോഷങ്ങളുടെ ഭാഗമായി സൗജന്യ മൊബൈൽ റീചാർജ് നൽകുന്നു. റീചാർജ് ലഭിക്കാൻ ഇവിടെ ക്ലിക്ക് ചെയ്യുക”- ഇത്തരം സന്ദേശങ്ങൾ നിങ്ങളുടെ ഫോണിൽ വന്നിട്ടുണ്ടോ? പ്രമുഖ ടെലികോം കമ്പനികളുടെ പേരിലും ഉത്സവ ഓഫറുകളുടെയും പ്രത്യേക സമ്മാനങ്ങളുടെയും പേരിലും ഇത്തരം സന്ദേശങ്ങൾ പ്രചരിക്കാറുണ്ട്. ഈ ഓഫറുകൾ മിക്കപ്പോഴും ഒരു സൈബർ തട്ടിപ്പിന്റെ ചതിക്കുഴിയിലേക്കാണ് നമ്മളെ കൊണ്ട് എത്തിക്കുക.

എങ്ങനെയാണ് തട്ടിപ്പ് നടക്കുന്നത്?

സൗജന്യ റീചാർജ് ലഭിക്കാൻ ഈ ലിങ്കിൽ ക്ലിക്ക് ചെയ്യുക, ഫോൺ നമ്പർ നൽകുക, സന്ദേശം പത്ത് സുഹൃത്തുക്കൾക്ക് അയയ്ക്കുക തുടങ്ങിയ നിർദേശങ്ങളാണ് പലപ്പോഴും ഇത്തരം സന്ദേശങ്ങളിലുണ്ടാകുക. ലിങ്കിൽ പ്രവേശിക്കുമ്പോൾ യഥാർഥ വെബ്സൈറ്റിന് സമാനമായ വ്യാജ പേജുകൾ തുറന്നേക്കാം. ഇവിടെ ഫോൺ നമ്പർ, OTP, പാസ്‌വേഡ്, ബാങ്കിങ് വിവരങ്ങൾ എന്നിവ നൽകുന്നതോടെ തട്ടിപ്പുകാർക്ക് അവ ദുരുപയോഗം ചെയ്യും.

ചില ലിങ്കുകൾ സംശയകരമായ ആപ്പുകൾ ഡൗൺലോഡ് ചെയ്യാനും ആവശ്യപ്പെട്ടേക്കാം. ഇത്തരം ആപ്പുകൾ വഴി ഫോണിലെ വിവരങ്ങൾ ചോർത്തുന്നതിനോ മറ്റ് തട്ടിപ്പുകൾ നടത്തുന്നതിനോ ഉപയോഗിക്കുകയും ചെയ്യും.

വ്യാജ റീചാർജ് ലിങ്കുകൾ തിരിച്ചറിയാം

അറിയാത്ത നമ്പറിൽനിന്നുള്ള സന്ദേശങ്ങൾ, അക്ഷരത്തെറ്റുകളുള്ള വെബ്സൈറ്റ് വിലാസങ്ങൾ, സമ്മാന വാഗ്ദാനങ്ങൾ, ഉടൻ ക്ലിക്ക് ചെയ്യണമെന്ന സമ്മർദം എന്നിവ ശ്രദ്ധിക്കണം. ഓഫർ യഥാർഥമാണോയെന്ന് ബന്ധപ്പെട്ട ടെലികോം കമ്പനിയുടെ ഔദ്യോഗിക വെബ്സൈറ്റിലൂടെയോ ആപ്പിലൂടെയോ പരിശോധിക്കുക.

സുരക്ഷിതരായിരിക്കാൻ ശ്രദ്ധിക്കേണ്ടത്

പരിചയമില്ലാത്ത ലിങ്കുകളിൽ ക്ലിക്ക് ചെയ്യരുത്. സൗജന്യ റീചാർജ് ലഭിക്കാനായി OTP, UPI PIN, ബാങ്ക് പാസ്‌വേഡ് എന്നിവ ഒരിക്കലും പങ്കുവയ്ക്കരുത്.

സംശയകരമായ ആപ്പുകൾ ഇൻസ്റ്റാൾ ചെയ്യാതിരിക്കുക. സാമ്പത്തിക തട്ടിപ്പ് നടന്നാൽ ബാങ്കിനെ ഉടൻ അറിയിക്കുകയും 1930 എന്ന സൈബർ തട്ടിപ്പ് ഹെൽപ്‌ലൈനിൽ ബന്ധപ്പെടുകയും ചെയ്യുക. ദേശീയ സൈബർ ക്രൈം പോർട്ടലായ cybercrime.gov.in വഴിയും പരാതി നൽകാം.