ന്യൂഡല്‍ഹി: ആന്‍ഡ്രോയിഡ് ഉപയോക്താക്കള്‍ക്കായി പുതിയ അപ്‌ഡേറ്റുമായി വാട്‌സ്ആപ്പ്. വാട്‌സ്ആപ്പ് സെറ്റിങ്സ് മെനു പുനര്‍രൂപകല്‍പ്പന ചെയ്യുന്നതായാണ് റിപ്പോര്‍ട്ട്. ഇതില്‍ അനുബന്ധ ഓപ്ഷനുകളെ ഗ്രൂപ്പുകളായി തിരിച്ച് വൃത്താകൃതിയിലുള്ള ബോക്‌സുകളിലായാണ് ക്രമീകരിച്ചിരിക്കുന്നത്. ഗൂഗിളിന്റെ 'മെറ്റീരിയല്‍ ഡിസൈന്‍ 3 എക്സ്പ്രസീവ്' മാര്‍ഗ്ഗനിര്‍ദ്ദേശങ്ങള്‍ പിന്തുടരുന്ന ഈ പുതിയ ലേഔട്ട്, ഓരോ സെറ്റിംഗ്സും പേജില്‍ എങ്ങനെ കാണപ്പെടുന്നു എന്നതില്‍ മാറ്റം വരുത്തുന്നു.

അക്കൗണ്ട്, പ്രൈവസി, നോട്ടിഫിക്കേഷന്‍ തുടങ്ങിയ വിഭാഗങ്ങളിലായിരിക്കും ഈ പുതിയ ഡിസൈന്‍ വരിക. എന്നാല്‍, ഈ ഫീച്ചര്‍ ഇപ്പോഴും വികസന ഘട്ടത്തിലാണ്. ബീറ്റ ടെസ്റ്റര്‍മാര്‍ക്ക് ഇതുവരെ ലഭ്യമായിട്ടില്ല. ഈ പുതിയ സെറ്റിങ്സ് മെനു എപ്പോഴാണ് ഉപയോക്താക്കള്‍ക്കായി പുറത്തിറക്കുക എന്നതിനെക്കുറിച്ച് വാട്സ്ആപ്പ് ഔദ്യോഗികമായി അറിയിച്ചിട്ടില്ല.

ഗൂഗിള്‍ പ്ലേ സ്റ്റോറില്‍ ലഭ്യമായ, ആന്‍ഡ്രോയിഡിനായുള്ള വാട്സ്ആപ്പ് ബീറ്റ പതിപ്പ് 2.26.43.3-ല്‍ വാബീറ്റ ഇന്‍ഫോയാണ് ഈ പുതിയ ഇന്റര്‍ഫേസ് കണ്ടെത്തിയത്. പുതിയ ഡിസൈനില്‍, സെറ്റിങ്‌സുകള്‍ ഒരു നീണ്ട ലിസ്റ്റായി നല്‍കുന്നതിന് പകരം, അനുബന്ധ ഓപ്ഷനുകളെ വൃത്താകൃതിയിലുള്ള ബോക്‌സുകളായി ഗ്രൂപ്പ് ചെയ്തിരിക്കുന്നു. ഏതെല്ലാം സെറ്റിങ്സുകള്‍ പരസ്പരം ബന്ധപ്പെട്ടവയാണെന്നും, ഒരു വിഭാഗം എവിടെ അവസാനിക്കുന്നു, മറ്റൊന്ന് എവിടെ തുടങ്ങുന്നു എന്നും എളുപ്പത്തില്‍ തിരിച്ചറിയാന്‍ ഇത് സഹായിക്കുന്നു.

ഗൂഗിളിന്റെ 'മെറ്റീരിയല്‍ ഡിസൈന്‍ 3 എക്സ്പ്രസീവ്' മാര്‍ഗ്ഗനിര്‍ദ്ദേശങ്ങള്‍ പിന്തുടരുന്ന ഈ പുതിയ ലേഔട്ട്, ആന്‍ഡ്രോയിഡ് ആപ്പുകളിലെ ലിസ്റ്റുകള്‍, ബട്ടണുകള്‍, നാവിഗേഷന്‍ ബാറുകള്‍ എന്നിവയുടെ രൂപകല്‍പ്പനയെ സ്വാധീനിക്കുന്നു. ഗ്രൂപ്പിലെ ഓരോ ഇനത്തിന്റെയും സ്ഥാനം അനുസരിച്ച് അവയുടെ ആകൃതി മാറുന്നതിനാല്‍, വ്യത്യസ്ത സെറ്റിങ്സുകളെ വേര്‍തിരിച്ചറിയാന്‍ ഉപയോക്താക്കള്‍ക്ക് എളുപ്പമാകും.

ആന്‍ഡ്രോയിഡ് ഉപയോക്താക്കള്‍ക്കായി വേറെയും ചില മാറ്റങ്ങള്‍ വാട്‌സ്ആപ്പ് പരീക്ഷിക്കുന്നുണ്ട്. സ്‌ക്രോള്‍ ചെയ്യുമ്പോള്‍ ചെറുതാവുകയും, തിരികെ മുകളിലേക്ക് സ്‌ക്രോള്‍ ചെയ്യുമ്പോള്‍ വലുതാവുകയും ചെയ്യുന്ന ഒരു 'ബോട്ടം നാവിഗേഷന്‍ ബാറും' ആപ്പില്‍ പരീക്ഷിക്കുന്നുണ്ട്. കൂടാതെ, ചാറ്റ് ബാറും പുനര്‍രൂപകല്‍പ്പന ചെയ്യുന്നതായി റിപ്പോര്‍ട്ടുകളുണ്ട്.