പൊട്ടിയ വസ്തുക്കൾ സൂപ്പർ ഗ്ലൂ ഉപയോഗിച്ച് ഒട്ടിക്കുന്നതിനിടെ വിരലുകളിൽ പറ്റിപ്പിടിക്കാറുണ്ടോ? ഉരച്ചാലും കഴുകിയാലും ഇത് പോകണമെന്നില്ല. ചർമത്തിന് കേടുപാടുകൂടാതെ ഗ്ലൂ എളുപ്പത്തിൽ നീക്കം ചെയ്യാനുള്ള ചില പൊടിക്കൈകൾ പരിചയപ്പെടാം.
ഉപ്പ്
വിരലുകളില് പശ പറ്റിപ്പിടിച്ചിരിക്കുന്ന ഭാഗത്ത് അൽപം ഉപ്പ് തേച്ചാൽ പശയുടെ കാഠിന്യം കുറയും. ഉപ്പിനൊപ്പം അല്പം വിനാഗിരി കലർത്തിയും ഉപയോഗിക്കാം.
എണ്ണ
വിരലുകളിൽ അല്പം എണ്ണ പുരട്ടി, കുറച്ചു നേരം വയ്ക്കുക, തുടർന്ന് പശ പറ്റിപ്പിടിച്ച ഭാഗം അയവുവരുത്താൻ ചെറുചൂടുള്ള വെള്ളത്തിൽ കഴുകുക. പശ പെട്ടെന്ന് ഇളകിപ്പോരും.
നെയിൽ പോളിഷ് റിമൂവർ
നെയിൽ പോളിഷ് റിമൂവർ പഞ്ഞിയിൽ മുക്കി പശ ഒട്ടിപ്പിടിച്ച ഭാഗത്ത് പുരട്ടുക. പശ പതിയെ അലിഞ്ഞുപോകും. അസെറ്റോൺ അടങ്ങിയ റിമൂവറാണെങ്കിൽ പെട്ടെന്ന് ഫലം കിട്ടും.
നാരങ്ങാനീര്
പശ നിങ്ങളുടെ തൊലിയിൽ പറ്റിപ്പിടിച്ചാലുടൻ, കുറച്ച് നാരങ്ങാനീര് പുരട്ടി പതുക്കെ തടവുക. ഇത് പശ പൊളിഞ്ഞുപോകാനും ആ ഭാഗത്തെ ചർമം മൃദുവാക്കാനും സഹായിക്കും.
സോപ്പും ചെറുചൂടുവെള്ളവും
പശയുടെ കാഠിന്യം കുറയ്ക്കുന്നതിനായി, സോപ്പ് കലർന്ന ചെറുചൂടുവെള്ളത്തിൽ ആ ഭാഗത്ത് മുക്കിവെയ്ക്കുക. പശ പെട്ടെന്ന് ഇളകിപ്പോരാൻ ഇത് സഹായിക്കും.
ഒലിവ് ഓയിൽ
മാർഗരിൻ അല്ലെങ്കിൽ ഒലിവ് ഓയിൽ മറ്റൊരു പ്രകൃതിദത്തമായ മാർഗ്ഗമാണ്. ഇതിലെ എണ്ണമയം പശയുമായി പ്രവർത്തിച്ച് അതിന്റെ കാഠിന്യം കുറയ്ക്കുന്നു.