ലണ്ടന്‍: കീപ്പിംഗ് ഗ്ലൗസില്‍ സൈനിക ചിഹ്നം പതിപ്പിച്ചതുമായി ബന്ധപ്പെട്ട് ഇന്ത്യന്‍ വിക്കറ്റ് കീപ്പര്‍ മഹേന്ദ്രസിംഗ് ധോണിക്കെതിരെ നിലപാട് കടുപ്പിച്ച് ഐസിസി. ലോകകപ്പില്‍ സൈനിക ചിഹ്നമായ ബലിദാന്‍ ബാഡ്ജ് പതിപ്പിച്ച ഗ്ലൗസ് ഉപയോഗിച്ചത് ചട്ടവിരുദ്ധമാണെന്ന് ഐസിസി ചൂണ്ടിക്കാട്ടി. തുടര്‍ന്ന് സൈനിക ചിഹ്നം പതിപ്പിച്ച ഗ്ലൗസ് ധരിക്കാന്‍ ധോണിയെ അനുവദിക്കണമെന്ന ബിസിസിഐയുടെ ആവശ്യം ഐസിസി തളളി.

വസ്ത്രങ്ങളില്‍ പ്രത്യേക സന്ദേശമുളള ചിഹ്നങ്ങള്‍ ഉപയോഗിക്കരുത്. ഇതാണ് നിയമം. ഇത് ഒരാള്‍ക്ക് വേണ്ടി മാറ്റാനാകില്ലെന്നും ഐസിസി അറിയിച്ചു. വിഷയത്തില്‍ ഐസിസി നിലപാട് പുനഃപരിശോധിക്കണമെന്നാവശ്യപ്പെട്ട് ബിസിസിഐ ഐസിസിക്ക് കത്ത് നല്‍കിയിരുന്നു. ഇതിന് നല്‍കിയ മറുപടിയിലാണ് ഐസിസി നിലപാട് വ്യക്തമാക്കിയത്.

ലോകകപ്പില്‍ ദക്ഷിണാഫ്രിക്കയ്‌ക്കെതിരെയുളള ഇന്ത്യയുടെ ആദ്യ മത്സരത്തിലാണ് സൈനിക ചിഹ്നം പതിപ്പിച്ച ഗ്ലൗസ് ധോണി ഉപയോഗിച്ചത്. ഇതിനെതിരെ ഐസിസി രംഗത്തുവരുകയായിരുന്നു. ധോണിയെ പിന്തുണച്ച് ബിസിസിഐയും കേന്ദ്രസര്‍ക്കാരും രംഗത്തുവന്നതോടെ വിഷയം ചൂടേറിയ ചര്‍ച്ചയാകുകയായിരുന്നു.