'ദുഃസ്വപ്നങ്ങൾ കാണില്ല, സുരക്ഷിത യാത്ര, പാപങ്ങളിൽ നിന്ന് മോചനം'; അറിയാം ഹനുമാൻ ചാലിസയുടെ ​ഗുണങ്ങൾ, എപ്പോഴാണ് ജപിക്കേണ്ടത്?

ശ്രീരാമ ഭക്തനായ പ്രശസ്ത കവി തുളസീദാസ് രചിച്ച പവിത്രമായ രാമഭക്തി കാവ്യമാണ് ഹനുമാൻ ചാലിസ. 'ചാലിസ്' എന്നാൽ നാൽപത് എന്നാണർത്ഥം. നാൽപത് ശ്ലോകങ്ങൾ അടങ്ങിയതിനാലാണ് ഇതിന് ഹനുമാൻ ചാലിസ എന്ന പേരു വന്നത്. പ്രായഭേദമെന്യേ ഏതൊരാൾക്കും ദിവസവും ജപിക്കാവുന്ന അത്യന്തം ശക്തിയേറിയ പ്രാർത്ഥനയാണിത്. ഹനുമാൻ ചാലിസയുടെ ചരിത്രവും ഭക്തർക്ക് അത് നൽകുന്ന അത്ഭുതകരമായ ആത്മീയ- മാനസിക ഗുണങ്ങളും താഴെ പറയുന്നവയാണ്:

ഐതിഹ്യം

​മുഗൾ ചക്രവർത്തിയായിരുന്ന ഔറംഗസീബിനെ കാണാൻ പോയ തുളസീദാസിനോട്, ഭഗവാനെ കാണിച്ചു തരാൻ ചക്രവർത്തി വെല്ലുവിളിക്കുക യുണ്ടായി. യഥാർത്ഥ ഭക്തിയില്ലാതെ ശ്രീരാമ ദർശനം സാധ്യമല്ലെന്ന് മറുപടി നൽകിയ കവിയെ ഔറംഗസീബ് തുറുങ്കിലടച്ചു. തടവറയിൽ കിടന്നു കൊണ്ടാണ് തുളസീദാസ് ഹനുമാൻ ചാലിസ രചിച്ചതെന്നാണ് വിശ്വാസം.

​ഹനുമാൻ ചാലിസ ജപിക്കുന്നതുകൊണ്ടുള്ള പ്രധാന ഗുണങ്ങൾ:-

​ഭയവും ദുഷ്ടശക്തികളും അകറ്റുന്നു:

"ഭൂത പിശാച നികട നഹി ആവൈ, മഹാബീര ജബ നാമ സുനാവൈ" എന്ന വരികൾ അർത്ഥമാക്കുന്നത് പോലെ, ഹനുമാന്റെ നാമം സത്യസന്ധമായി ജപിക്കുന്നയിടത്ത് ദുഷ്ടശക്തികൾക്കോ ഭയത്തിനോ സ്ഥാനമുണ്ടാകില്ല. രാത്രിയിൽ ദുഃസ്വപ്നങ്ങൾ കണ്ട് ഭയപ്പെടുന്നവർ ഹനുമാൻ ചാലിസ തലയിണയ്ക്കടിയിൽ വെച്ച് ഉറങ്ങുന്നത് ആശ്വാസം നൽകും.

ശനിദോഷ പരിഹാരം:

ഐതിഹ്യമനുസരിച്ച് ശനീദേവൻ ഹനുമാനെ ഭയപ്പെടുന്നു. അതിനാൽ ജാതകത്തിൽ ശനിദോഷമുള്ളവർ പ്രത്യേകിച്ച് ശനിയാഴ്ചകളിൽ ഹനുമാൻ ചാലിസ ജപിക്കുന്നത് ദോഷഫലങ്ങൾ കുറയ്ക്കാനും ജീവിതത്തിൽ സമാധാനം ലഭിക്കാനും സഹായിക്കും.

​തടസ്സങ്ങൾ നീങ്ങുന്നു:

വിഘ്നേശ്വരനെപ്പോലെ തന്നെ ജീവിതത്തിലെ എല്ലാ തടസ്സങ്ങളും നീക്കാൻ ഹനുമാൻ സ്വാമിക്കും സാധിക്കും. പൂർണ്ണ വിശ്വാസത്തോടെ ജപിക്കുന്ന ഭക്തന് ഹനുമാന്റെ ദൈവികമായ സംരക്ഷണമുണ്ടാകും.

​പാപമോചനം:

അറിഞ്ഞോ അറിയാതെയോ ചെയ്തുപോയ തെറ്റുകൾക്ക് ക്ഷമ ചോദിക്കാനും ചാലിസയുടെ പ്രാരംഭ ശ്ലോകങ്ങൾ ജപിക്കുന്നതിലൂടെ മുൻജന്മ ങ്ങളിലെയും ഈ ജന്മത്തിലെയും പാപങ്ങളിൽ നിന്ന് മോചനം നേടാനും സാധിക്കും.

മാനസിക സമ്മർദ്ദവും അലസതയും കുറയ്ക്കുന്നു:

രാവിലെ ഹനുമാൻ ചാലിസ ഉച്ചത്തിൽ ജപിക്കുന്നത് ശരീരത്തിലും മനസ്സിലും പോസിറ്റീവ് ഊർജ്ജം നിറയ്ക്കും. ഇത് മടിയും അലസതയും മാറ്റി കാര്യക്ഷമത കൂട്ടാനും, തലവേദന, ഉറക്കമില്ലായ്മ, ഉത്കണ്ഠ തുടങ്ങിയ പ്രശ്നങ്ങൾക്ക് ആശ്വാസം ലഭിക്കാനും സഹായിക്കും.

​സുരക്ഷിതമായ യാത്ര:

വാഹനങ്ങളിൽ ഹനുമാന്റെ ചിത്രമോ രൂപങ്ങളോ വെക്കുന്നത് അപകടങ്ങളിൽ നിന്ന് ഭഗവാന്റെ സംരക്ഷണം ഉറപ്പാക്കുമെന്നും യാത്രകൾ സുരക്ഷിതമാക്കുമെന്നും ഭക്തർ വിശ്വസിക്കുന്നു.

​കുടുംബത്തിൽ ഐക്യവും സന്തോഷവും:

ദിവസവും ഭക്തിയോടെ ചാലിസ ജപിക്കുന്നത് കുടുംബത്തിലെ വഴക്കുകളും അഭിപ്രായവ്യത്യാസങ്ങളും ഇല്ലാതാക്കി സന്തോഷവും ഐക്യവും നിലനിർത്തും.

​സന്മാർഗ്ഗത്തിലേക്ക് നയിക്കുന്നു:

ദുശ്ശീലങ്ങൾക്കോ തെറ്റായ കൂട്ടുകെട്ടുകൾക്കോ അടിമപ്പെട്ടവരുടെ മനസ്സിനെ ശുദ്ധീകരിക്കാനും അവരെ നന്മയുടെയും ആത്മീയതയുടെയും ശരിയായ വഴിയിലേക്ക് നയിക്കാനും ഈ ജപം സഹായിക്കും.

​എപ്പോഴാണ് ജപിക്കേണ്ടത്?

​രാവിലെ കുളിച്ചു ശുദ്ധിയായ ശേഷമാണ് ഹനുമാൻ ചാലിസ ജപിക്കേണ്ടത്. സൂര്യാസ്തമയത്തിനു ശേഷമാണ് ജപിക്കുന്നതെങ്കിൽ കൈയും കാലും മുഖവും കഴുകി വൃത്തിയായ ശേഷം മാത്രം ജപിക്കുക. അർത്ഥമറിഞ്ഞ്, ശരിയായ ഉച്ചാരണത്തോടെ ജപിക്കുമ്പോഴാണ് അതിന്റെ പൂർണ്ണ ഫലം ലഭിക്കുന്നത്.