പാരമ്പര്യമായി കിട്ടുന്ന എല്ലാ സ്വത്തുക്കളും കുടുംബത്തിന്റെ വകയാണെന്നും, അതില് മക്കള്ക്കും പേരക്കുട്ടികള്ക്കും ജന്മാവകാശമുണ്ടെന്നുമാണ് പൊതുവെയുള്ള ധാരണ. എന്നാല്, ഇന്ത്യന് നിയമം, പ്രത്യേകിച്ച് ഹിന്ദു പിന്തുടര്ച്ചാവകാശ നിയമപ്രകാരം എല്ലാ സ്വത്തുക്കളും ഒരേ തരത്തിലുള്ളവയല്ല. സ്വത്തിന്റെ സ്വഭാവം എന്താണെന്നതിനെ ആശ്രയിച്ചാണ് മക്കളുടെയും പേരക്കുട്ടികളുടെയും അവകാശങ്ങള് നിശ്ചയിക്കപ്പെടുന്നത്.
ഒരു സ്വത്ത് പിതാമഹന്മാരില് നിന്ന്, അതായത് പിതാവ്, മുത്തച്ഛന്, മുത്തച്ഛന്റെ അച്ഛന് എന്നിങ്ങനെ കുറഞ്ഞത് നാല് തലമുറകളിലൂടെ കൈമാറിവന്നതും ഇതുവരെ ഭാഗം വെക്കാത്തതുമാണെങ്കില് മാത്രമാണ് അതിനെ യഥാര്ഥ 'പാരമ്പര്യ സ്വത്ത്' എന്ന് വിളിക്കാന് കഴിയുക. ഇത്തരം സ്വത്തുകളില് ജനിക്കുന്ന ഓരോ കുഞ്ഞിനും (മക്കള്ക്കും പേരക്കുട്ടികള്ക്കും) ജനനം മുതല് തന്നെ തുല്യ അവകാശമുണ്ട് (ജന്മാവകാശം). അതായത്, ഈ സ്വത്തുക്കളുടെ കാര്യത്തില് പിതാവിന് മാത്രമായി തീരുമാനമെടുക്കാനോ മറ്റുള്ളവരുടെ സമ്മതമില്ലാതെ വില്ക്കാനോ സാധിക്കില്ല.
ഏറ്റവും പുതിയ കോടതി ഉത്തരവുകള് (കേരള, കര്ണാടക ഹൈക്കോടതി വിധികളും സുപ്രീംകോടതി നിരീക്ഷണങ്ങളും) പിതാവിന്റെ കൈവശമുള്ള എല്ലാ സ്വത്തുവകകളിലും മക്കള്ക്കോ പേരക്കുട്ടികള്ക്കോ ജന്മാവകാശമില്ല എന്നാണ് വ്യക്തമാക്കുന്നത്. പിതാവ് സ്വന്തം വരുമാനം കൊണ്ടോ ബിസിനസ്സ് ആദായം കൊണ്ടോ വാങ്ങിയതോ, അല്ലെങ്കില് അദ്ദേഹത്തിന്റെ സ്വന്തം മാതാപിതാക്കളില് നിന്ന് സമ്മാനമായോ വില്പത്രം വഴിയോ ലഭിച്ചതോ ആയ സ്വത്തുക്കള് 'സ്വയം ആര്ജിച്ചതോ പ്രത്യേകം ലഭിച്ചതോ ആയ സ്വത്തായി' കണക്കാക്കപ്പെടുന്നു. സ്വത്ത് സ്വയം ആര്ജിച്ചതാണെങ്കില്, ആ കുടുംബത്തില് മകനോ പേരക്കുട്ടിയോ ജനിച്ചു എന്നതുകൊണ്ട് മാത്രം അവര്ക്ക് ആ സ്വത്തില് ജന്മാവകാശം ലഭിക്കില്ല.
സമീപകാലത്ത് കേരള ഹൈക്കോടതിയുടേതുള്പ്പെടെ പ്രധാന വിധികളില് ഇക്കാര്യം വ്യക്തമാക്കുന്നുണ്ട്. സ്വത്തിന്റെ ഉത്ഭവം എവിടെ നിന്നാണെന്നാണ് കോടതി പ്രധാനമായും പരിശോധിക്കുന്നത്. യഥാര്ത്ഥ ഉടമ ആ സ്വത്ത് സ്വന്തം സമ്പാദ്യം കൊണ്ടോ മറ്റോ വാങ്ങിയതാണെങ്കില്, പിന്നീട് അത് മകന് ലഭിച്ചാല് പോലും അത് സ്വയം ആര്ജിച്ച സ്വത്തിന്റെ പരിധിയില് തന്നെ വരാം. അത്തരം സ്വത്തുക്കളുടെമേല് മകനോ പേരക്കുട്ടിക്കോ ജനനംകൊണ്ട് അവകാശവാദമുന്നയിക്കാന് സാധിക്കില്ല. പിതാവിന് ജീവിച്ചിരിക്കുമ്പോള് ആ സ്വത്ത് ഇഷ്ടമുള്ളയാള്ക്ക് വില്ക്കാനോ, സമ്മാനമായി നല്കാനോ, വില്ല് എഴുതിക്കൊടുക്കാനോ പൂര്ണ സ്വാതന്ത്ര്യമുണ്ട്.
പിതാവിന്റെ സ്വയം ആര്ജിച്ച സ്വത്തിന്മേല് അദ്ദേഹം ജീവിച്ചിരിക്കുമ്പോള് മക്കള്ക്കോ പേരക്കുട്ടികള്ക്കോ നിയമപരമായി ഭാഗം ചോദിക്കാനോ അവകാശവാദം ഉന്നയിക്കാനോ സാധിക്കില്ല. ജന്മാവകാശം പാരമ്പര്യ/ കൂട്ടുകുടുംബ സ്വത്തുകളില് മാത്രമുള്ളതാണ്. പിതാവ് വില്ല് എഴുതാതെയാണ് മരിക്കുന്നതെങ്കില്, അദ്ദേഹത്തിന്റെ സ്വയം ആര്ജിച്ച സ്വത്തുകള് പോലും നിയമപ്രകാരമുള്ള അവകാശികളിലേക്ക് (ക്ലാസ് 1 അവകാശികള്) എത്തും. അതായത്, ജീവിച്ചിരിക്കുമ്പോള് അവകാശമില്ലെങ്കിലും പിതാവിന്റെ മരണശേഷം നിയമപരമായ രീതിയില് സ്വത്ത് ലഭിച്ചേക്കാം.
കുടുംബാംഗങ്ങള് എല്ലാവരും ഒന്നിച്ചു താമസിക്കുന്നു എന്നതുകൊണ്ട് മാത്രം എല്ലാ സ്വത്തുക്കളും 'പാരമ്പര്യ സ്വത്താകില്ല'. സ്വത്തിന്റെ ഉറവിടം വ്യക്തമാക്കുന്ന രേഖകളാണ് (Sale deed, Partition deed etc.) കോടതികളില് നിര്ണായകമാകുന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
