ന്യൂഡല്‍ഹി: രാജ്യം നവരാത്രി ആഘോഷിക്കുന്ന വേളയില്‍ പുതിയ ജിഎസ്ടി നിരക്കുകള്‍ കേന്ദ്രസര്‍ക്കാര്‍ നടപ്പിലാക്കുമെന്ന് റിപ്പോര്‍ട്ട്. ദീപാവലി അടക്കമുള്ള ഉത്സവ സീസണിന് ഉണര്‍വ് പകരാന്‍ സെപ്റ്റംബര്‍ 22ന് പുതിയ ജിഎസ്ടി നിരക്കുകള്‍ പ്രാബല്യത്തില്‍ കൊണ്ടുവരാനാണ് കേന്ദ്രസര്‍ക്കാര്‍ ഉദ്ദേശിക്കുന്നതെന്നും സര്‍ക്കാര്‍ വൃത്തങ്ങളെ ഉദ്ധരിച്ചുള്ള റിപ്പോര്‍ട്ടുകള്‍ വ്യക്തമാക്കുന്നു.
ജിഎസ്ടി കൗണ്‍സില്‍ സെപ്റ്റംബര്‍ 3-4 തീയതികളില്‍ രാജ്യ തലസ്ഥാനത്ത് യോഗം ചേരും. 12,28 ശതമാനം സ്ലാബുകള്‍ ഒഴിവാക്കി 5 ശതമാനം, 18 ശതമാനം എന്നിങ്ങനെ രണ്ടു സ്ലാബുകള്‍ മതിയെന്ന ആറംഗ കേന്ദ്രമന്ത്രിതല സമിതിയുടെ നിര്‍ദേശം ചര്‍ച്ച ചെയ്യാനാണ് യോഗം ചേരുന്നത്. റിപ്പോര്‍ട്ടനുസരിച്ച്, കൗണ്‍സിലിന്റെ തീരുമാനം വന്ന് അഞ്ചോ ഏഴോ ദിവസങ്ങള്‍ക്കകം പുതിയ നിരക്കുകളെക്കുറിച്ചുള്ള വിജ്ഞാപനങ്ങള്‍ പുറപ്പെടുവിക്കാന്‍ സാധ്യതയുണ്ട്. മന്ത്രിതല സമിതി പുതിയ ജിഎസ്ടി നിരക്കുകള്‍ക്ക് തത്വത്തില്‍ അംഗീകാരം നല്‍കിയിട്ടുണ്ട്.
നിലവില്‍ 12 ശതമാനം നികുതിയുള്ള ഇനങ്ങളില്‍ ഭൂരിപക്ഷവും 5 ശതമാനം സ്ലാബില്‍ വരും. 28 ശതമാനം നികുതിയുള്ളവ കൂടുതലും 18 ശതമാനം സ്ലാബില്‍ ഉള്‍പ്പെടും. അള്‍ട്രാ-പ്രീമിയം കാറുകള്‍ പോലുള്ള തെരഞ്ഞെടുക്കപ്പെട്ട ആഡംബര ഉല്‍പ്പന്നങ്ങള്‍ക്കും ആരോഗ്യത്തിന് ഹാനികരമായ ഉല്‍പ്പന്നങ്ങള്‍ക്കും പ്രത്യേക 40 ശതമാനം നിരക്ക് ബാധകമാക്കും. അതേസമയം ചില തൊഴില്‍-സൗഹൃദ ഉല്‍പ്പന്നങ്ങള്‍ക്ക് 0.1 ശതമാനം, 0.3 ശതമാനം അല്ലെങ്കില്‍ 0.5 ശതമാനം എന്നിങ്ങനെയുള്ള ഇളവുകള്‍ തുടര്‍ന്നും ലഭിക്കും. സ്വാതന്ത്ര്യദിന പ്രസംഗത്തില്‍ പ്രധാനമന്ത്രി നരേന്ദ്ര മോദിയാണ് ജിഎസ്ടി നിരക്കുകള്‍ കുറയ്ക്കുമെന്ന പ്രഖ്യാപനം നടത്തിയത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
