പണിമുടക്കി ഫെയ്സ്ബുക്കും വാട്സ്ആപ്പും ഇൻസ്റ്റ​ഗ്രാമും; സെർവർ തകരാറെന്ന് സൂചനകൾ

ന്യൂഡൽഹി: ലോകമെമ്പാടും ഫെയ്സ്ബുക്ക് സേവനങ്ങൾക്ക് തടസം നേരിടുന്നതായി റിപ്പോർട്ട്. ഫെയ്സ്ബുക്കിന്റെ ഉടമസ്ഥതയിൽ തന്നെയുള്ള വാട്സ്ആപ്പിലും ഇൻസ്റ്റ​ഗ്രാമിലും ചിത്രങ്ങൾ ലോഡ് ചെയ്യുന്നതിന് ബുദ്ധിമുട്ട് നേരിടുന്നതായും ഭൂരിപക്ഷം ഉപയോക്താക്കളും പരാതിപ്പെടുന്നു. അതേസമയം തടസം നേരിടുന്നത് സെർവറുകളുടെ തകരാർ കാരണമാണെന്ന റിപ്പോർട്ടുകളുണ്ട്. എന്നാൽ ഇതുസംബന്ധിച്ച് ഔദ്യോ​ഗിക വിശദീകരണങ്ങളൊന്നും പുറത്തു വന്നിട്ടില്ല. 

അമേരിക്കയിലും യൂറോപ്പിലുമാണ് പ്രശ്നം വ്യാപകമായി റിപ്പോർട്ട് ചെയ്തിട്ടുള്ളത്. ഇന്ത്യ, ഓസ്ട്രേലിയ, ബ്രസീൽ എന്നിവിടങ്ങളിലും സേവനങ്ങൾക്ക് തടസം നേരിടുന്നുണ്ട്. കൊളംബിയ, ജപ്പാൻ, സിംഗപ്പൂർ എന്നിവിടങ്ങളിൽ നിന്നും ഉപയോക്താക്കൾ പരാതി ഉന്നയിച്ചിരുന്നു.

വൈകീട്ട് ആറ് മണിക്ക് ശേഷമാണ് പ്രശ്നം ശ്രദ്ധയിൽപ്പെട്ടത്. സമാനമായ പ്രശ്നം കഴിഞ്ഞ മാർച്ച് 13നും സംഭവിച്ചിരുന്നു. അന്നും വാട്സാപ്പ്, ഇൻസ്റ്റഗ്രാം സേവനങ്ങൾ താറുമാറാകുകയും പലർക്കും ലോഗിൻ ചെയ്യാനാകാത്ത സാഹചര്യവുമായിരുന്നു.