വനിതകൾക്കായി സൗജന്യ കോമീ ഷെഫ് പരിശീലന പദ്ധതിയുമായി ഐ ഐ ഐ സിയും ഐ ആർ ഇ എല്ലും

സംസ്ഥാന സർക്കാർ തൊഴിൽ വകുപ്പിന് കീഴിൽ കൊല്ലം ചവറയിൽ പ്രവർത്തിക്കുന്ന ഇന്ത്യൻ ഇൻസ്റ്റിറ്റ്യൂട്ട് ഓഫ് ഇൻഫ്രാസ്ട്രക്ചർ ആൻഡ് കൺസ്ട്രക്ഷനും, ചവറയിൽ പ്രവർത്തിക്കുന്ന കേന്ദ്ര പൊതു മേഖലാ സ്ഥാപനമായ ഐ ആർ ഇ എൽ (ഇന്ത്യ )ലിമിറ്റഡും വനിതകൾ​ക്കായി സൗജന്യ തൊഴിൽ നൈപുണ്യ പരിശീലന പദ്ധതി നടപ്പാക്കും.

സർട്ടിഫിക്കറ്റ് പ്രോഗ്രാം ഇൻ ഫുഡ് പ്രൊഡക്ഷൻ (കോമീ ഷെഫ് ) എന്ന ആറു മാസം ദൈർഘ്യമുള്ള സൂപ്പർവൈസറി പരിശീലനമാണ് ഈ പദ്ധതിയിൽ ഉൾപ്പെടുത്തിയിരിക്കുന്നത്. പ്ലസ്ടു വിജയിച്ച 25 വനിതകൾക്കാണ് പദ്ധതിയുടെ ഭാഗമായി ലഭിക്കുക. സ്ത്രീ ശാക്തീകരണ തൊഴിൽ നൈപുണ്യ പരിശീലനപദ്ധതി പൂർണ്ണമായും സൗജന്യമായാണ് നടപ്പാക്കുന്നത്.

ടാറ്റ കമ്മ്യൂണിറ്റി ഇനിഷ്യേറ്റീവ് ട്രസ്റ്റ് (TCIT),ഇന്ത്യൻ ഹോട്ടൽസ് കമ്പനി ലിമിറ്റഡ് (IHCL),ഐ ഐ ഐ സി എന്നീ മൂന്നു സ്ഥാപനങ്ങൾ സംയുക്തമായാണ് സർട്ടിഫിക്കേഷൻ നൽകുന്നത്.

കോമീ ഷെഫ് പരിശീലനം പൂർത്തിയായാൽ ഹോട്ടൽ, റസ്റ്റോറന്റ്, റിസോർട്ട് തുടങ്ങിയ സ്ഥാപനങ്ങളിലെ പ്രവർത്തിക്കുന്ന തുടക്കക്കാരായ പാചക വിദഗ്‌ദ്ധ ആയിട്ടാവും ജോലി ലഭിക്കുക.

ആറു മാസത്തെ പരിശീലനത്തിൽ നാലുമാസം പ്രായോഗിക ക്ലാസുകൾ ഐ ഐ ഐ സി യിലെ ലാബുകളിലായി ക്രമീകരിച്ചിട്ടുണ്ട്. രണ്ടു മാസം രാജ്യത്തെ മുൻ നിര ഹോട്ടലുകളിൽ മേഖലാ പരിശീലനം നൽകും.

സ്വദേശത്തും വിദേശത്തുമായി നിരവധി ജോലി സാദ്ധ്യതകൾ ഈ മേഖലയിൽ ഉണ്ട്. പദ്ധതിയുടെ ഭാഗമായി പ്രവേശനം നേടുന്ന മുഴുവൻ ആളുകൾക്കും ജോലി ലഭിക്കുവാനുള്ള സാഹചര്യം ഐ ഐ ഐ സി ഒരുക്കും.

ഐ ആർ ഇ എൽ ഇന്ത്യയുടെ സി എസ് ആർ ഫണ്ട് ആണ് ഈ പദ്ധതിക്കായി വിനിയോഗിക്കുന്നത്. പരിശീലനത്തിലേക്കുള്ള ഗുണഭോക്താക്കളെ ഐ ആർ ഇ എൽ നേരിട്ട് ആണ് തെരഞ്ഞെടുക്കുന്നത്. ഐ ആർ ഇ എൽ മൈനിങ് പ്രദേശങ്ങളിലെ നിവാസികൾക്ക് മുൻഗണന ഉണ്ടായിരിക്കും.

ഈ പദ്ധതി നടപ്പാക്കുന്നതിനായി ഐ ഐ ഐ സിയും ഐ ആർ ഇ എല്ലും തമ്മിൽ ധാരണാപത്രത്തിൽ ഒപ്പുവച്ചു.