രാജ്യത്ത് ഒരു കോടി അധ്യാപകര്‍, ചരിത്രത്തില്‍ ആദ്യം; ദേശീയതലത്തിൽ വിദ്യാർത്ഥികളുടെ കൊഴിഞ്ഞുപോക്ക് കുറഞ്ഞു

ന്യൂഡല്‍ഹി: ദേശീയ തലത്തിൽ സ്കൂൾ വിദ്യാഭ്യാസ രം​ഗത്ത് കുട്ടികളുടെ കൊഴിഞ്ഞു പോക്കിൽ ​ഗണ്യമായ കുറവ് എന്ന നേട്ടം കൈവരിച്ചതിനൊപ്പം, അദ്ധ്യാപകരുടെ എണ്ണം ഒരു കോടി കടന്നു. ചരിത്രത്തിലാദ്യമായാണ് ഒരു അധ്യയന വർഷത്തിൽ അദ്ധ്യാപകരുടെ എണ്ണം ഒരു കോടിയിൽ കൂടുതലാകുന്നത്. കേന്ദ്രവിദ്യാഭ്യാസ മന്ത്രാലയം പുറത്തുവിട്ട റിപ്പോർട്ടിലാണ് 2024-25 അധ്യയന വർഷത്തിലെ ഈ കണക്കുകൾ പുറത്തുവന്നത്.

സ്കൂളിൽ ചേരുന്ന പെൺകുട്ടികളുടെ എണ്ണത്തിൽ നേരിയ വര്‍ധന രേഖപ്പെടുത്തിയിട്ടുണ്ട്. അദ്ധ്യാപകരുടെ എണ്ണം കൂടുന്നത് അദ്ധ്യാപക - വിദ്യാർത്ഥി അനുപാതം മെച്ചപ്പെട്ടതു കൊണ്ടാണെന്നാണ് റിപ്പോർട്ടിലെ കണക്കുകൾ വ്യക്തമാക്കുന്നത്. 2023- 2023 മുതൽ ഈ രീതി കാണാനാകുന്നതാണ്.

ഫൗണ്ടേഷണൽ, പ്രൈമറി, മിഡിൽ, സെക്കൻഡറി തലങ്ങളിലെ വിദ്യാർത്ഥി-അധ്യാപക അനുപാതം (PTR) ഇപ്പോൾ യഥാക്രമം 10, 13, 17, 21 എന്നിങ്ങനെയാണ് റിപ്പോർട്ട് ചെയ്തിരിക്കുന്നത്, ഇവയെല്ലാം എൻ ഇ പി ശുപാർശ ചെയ്യുന്ന 1:30 അനുപാതവുമായി താരതമ്യപ്പെടുത്തുമ്പോൾ ഗണ്യമായി മെച്ചപ്പെട്ട അനുപാതമാണെന്ന് റിപ്പോർട്ടിൽ പറയുന്നു.

ദേശീയ തലത്തിൽ 2022-23 അധ്യയന വർഷത്തിൽ 94,83,294 അദ്ധ്യാപകരാണ് ഉണ്ടായിരുന്നത്. 2023-24 ആയപ്പോൾ അത് 98,07,600 ആയി ഉയർന്നു. 2024-25 ൽ അദ്ധ്യാപകരുടെ എണ്ണം ഒരു കോടി കവിഞ്ഞ്, 1,01,22,420 ആയി വർദ്ധിച്ചു.

സ്കൂൾ അദ്ധ്യാപന രം​ഗത്ത് വരുന്നതിൽ വർഷങ്ങളായി സ്ത്രീകളാണ് കൂടുതൽ. ആ നില ഇപ്പോഴും തുടരുന്നുവെന്ന് മാത്രമല്ല, അവരുടെ എണ്ണം വർദ്ധിക്കുകയും ചെയ്തിട്ടുണ്ടെന്ന് ഈ കണക്ക് വ്യക്തമാക്കുന്നു. മുൻ അധ്യയന വർഷത്തിൽ അദ്ധ്യാപികമാരുടെ എണ്ണം 52.3 ശതമാനം ആയിരുന്നുവെങ്കിൽ ഇപ്പോഴത് 54.2ശതമാനമായി ഉയർന്നു.

പെൺകുട്ടികൾ സ്കൂളിൽ ചേരുന്നതിലെ എണ്ണം സംബന്ധിച്ച് 2022-23 നേക്കാൾ നേരിയ വ്യത്യാസം രണ്ട് വർഷം കൊണ്ട് ഉണ്ടായി. 2022-23 ൽ മൊത്തത്തിലുള്ള ശതമാനം 48 ശതമാനം ആയിരുന്നുവെങ്കിൽ 2024-25 ആയപ്പോഴേക്കും 48.3 ശതമാനം ആയി.

ഇതേ സമയം ഹൈസ്കൂൾ തലത്തിൽ ഉൾപ്പടെ പഠനം നിർത്തിപ്പോകുന്ന വിദ്യാർത്ഥികളുടെ എണ്ണത്തിൽ ​ഗണ്യമായ കുറവ് രേഖപ്പെടുത്തിയിട്ടുണ്ടെന്നും റിപ്പോർട്ട് പറയുന്നു.

2022-23, 2023-24 എന്നീ കഴിഞ്ഞ രണ്ട് വർഷങ്ങളെ അപേക്ഷിച്ച് 2024–25 അധ്യയന വർഷത്തിൽ പ്രൈമറി, മിഡിൽ, സെക്കൻഡറി തലങ്ങളിലുടനീളം കൊഴിഞ്ഞുപോക്ക് നിരക്കിൽ ഗണ്യമായ കുറവ് ഉണ്ടായിട്ടുണ്ട്. മുൻ വർഷത്തെ അപേക്ഷിച്ച് പ്രൈമറി തലത്തിൽ നിരക്ക് 3.7% ൽ നിന്ന് 2.3% ആയും, മിഡിൽ സ്കൂൾ തലത്തിൽ 5.2% ൽ നിന്ന് 3.5% ആയും, സെക്കൻഡറി (ഹൈസ്കൂൾ) തലത്തിൽ 10.9% ൽ നിന്ന് 8.2% ആയും കുറഞ്ഞു.

ദേശീയതലത്തിൽ സ്കൂൾ വിദ്യാഭ്യാസവിവരങ്ങൾ സൂക്ഷിക്കാനുള്ള യൂണിഫൈഡ് ഡിസ്ട്രിക് ഇൻഫർമേഷൻ സിസ്റ്റം ഫോർ എജുക്കേഷൻ (യുഡിഐഎസ്ഇ) പ്ലസിലെ കണക്കുകൾ അടിസ്ഥാനമാക്കിയാണ് റിപ്പോർട്ട്.