'പാട്ട് നെഞ്ചിൽ തട്ടി തെറിച്ചു വരേണ്ടതാണ്, ഈ അവാർഡ് ഒരു തെളിച്ചമാണ്'; നഞ്ചമ്മയ്ക്ക് ആശംസയുമായി സിത്താര കൃഷ്ണകുമാർ

മികച്ച ​ഗായികയ്ക്കുള്ള ദേശിയ പുരസ്കാരം നേടിയ നഞ്ചമ്മയ്ക്ക് ആശംസകളുമായി ​ഗായിക സിത്താര കൃഷ്ണകുമാർ. ഈ അവാർഡ് ഒരു തെളിച്ചമാണ് എന്നാണ് നഞ്ചമ്മയ്ക്കൊപ്പമുള്ള ചിത്രം പങ്കുവച്ച് സിത്താര കുറിച്ചത്. പാട്ട് തൊണ്ടയിൽ നിന്നോ തലച്ചോറിൽ നിന്നോ അല്ല വരേണ്ടതെന്നും നെഞ്ചിൽ നിന്നാണ് വരേണ്ടതെന്നും സിത്താര കുറിക്കുന്നു.

ഈ അവാർഡ് ഒരു തെളിച്ചമാണ്!!! പാട്ട്...അത് തൊണ്ടയിൽ നിന്നോ തലച്ചോറിൽ നിന്നോ അല്ല വരേണ്ടത്... അത് നെഞ്ചിൽ തട്ടി തെറിച്ചു വരേണ്ടതാണ്... എങ്കിൽ ആ പാട്ട് നഞ്ചമ്മയുടെ പാട്ടുപോലെ ചങ്കിൽ തന്നെ വന്നു കൊള്ളും!!!!- സിത്താര കുറിച്ചു. നിരവധി പേരാണ് പോസ്റ്റിന് താഴെ ആശംസകൾ അറിയിച്ചത്. മികച്ച നടിക്കുള്ള അവാർഡ് നേടിയ അപർണ ബാലമുരളിക്കും സിത്താര ആശംസകൾ അറിയിച്ചിട്ടുണ്ട്.

സച്ചി സംവിധാനം ചെയ്ത അയ്യപ്പനും കോശിയും എന്ന ​ചിത്രത്തിലെ ​ഗാനത്തിനാണ് നഞ്ചമ്മ മികച്ച ​ഗായികയായത്. ഈ അവാർഡ് ഉൾപ്പടെ നിരവധി അവാർഡുകളാണ് ചിത്രം നേടിയത്. ചിത്രത്തിലെ അഭിനയത്തിന് ബിജു മേനോൻ മികച്ച സഹനടനുള്ള പുരസ്കാരം നേടി. മികച്ച സംവിധായകനുള്ള പുരസ്കാരം സച്ചിക്കാണ്. കൂടാതെ സ്റ്റണ്ട് കൊറിയോ​ഗ്രഫിക്കും ചിത്രം അവാർഡ് നേടി. 
 

ഈ വാര്‍ത്ത കൂടി വായിക്കാം 

ഇത് മനോഹരമായ പിറന്നാൾ സമ്മാനം, സൂര്യയ്ക്ക് ആശംസകളുമായി മമ്മൂട്ടിയും മോഹൻലാലും

സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ