കാൻസർ സാധ്യത; 'എപ്പിക്ലോറോഹൈഡ്രിൻ' അടങ്ങിയ ടീ ബാ​ഗുകൾ ഇന്ത്യയിൽ നിരോധിച്ച് ബിഐഎസ്

ന്യൂഡൽഹി: 'എപ്പിക്ലോറോഹൈഡ്രിൻ' അടങ്ങിയ ടീബാ​ഗുകൾക്ക് ഇന്ത്യയിൽ വിലക്കേർപ്പെടുത്തി ദേശീയ നിലവാര നിർണ്ണയ ഏജൻസിയായ ബ്യൂറോ ഓഫ് ഇന്ത്യൻ സ്റ്റാൻഡേർഡ്സ് (ബിഐഎസ്). കാൻസർ ഉൾപ്പെടെ പല രോ​ഗങ്ങൾക്കും ഇത് കാരണമായേക്കാമെന്ന കണ്ടെത്തലിലാണ് നടപടി. ടീബാ​ഗ് പേപ്പർ നിർമിക്കുന്നതിനും ബ്ലീച്ച് ചെയ്യുന്നതിനും ഉപയോ​ഗിക്കുന്ന രാസവസ്തുവാണ് എപ്പിക്ലോറോഹൈഡ്രിൻ.

രാജ്യത്ത് ആദ്യമായാണ് ബിഐഎസ് ഇങ്ങനെയൊരു നിയന്ത്രണം ഏർപ്പെടുത്തുന്നത്. അതിനൊപ്പം ‌ടീബാ​ഗുകളുടെ ​ഗുണമേന്മ ഉറപ്പുവരുത്താനുള്ള മാർ​ഗനിർദേശങ്ങളും പുറത്തിറക്കിയിട്ടുണ്ട്. നിർമാതാക്കളുടെ പേര്, വിലാസം, ബാച്ച് നമ്പർ, നിർമാണ തീയതി, കാലാവധി തുടങ്ങിയവ ലേബലിൽ ഉൾക്കൊള്ളിക്കണമെന്നും ബിഐഎസ് അറിയിച്ചു.

ടീബാ​ഗുകൾ നിർമിക്കാനുപയോ​ഗിക്കുന്ന അസംസ്തൃത വസ്തുക്കൾ, നൂല്, ഫാസ്റ്റ്നർ, ടാ​ഗുകൾ, മഷി, പശ തുടങ്ങിയവയുടെ ​ഗുണനിലവാരം ഉറപ്പുവരുത്തണമെന്നും ബിഐഎസ് നിർദേശിച്ചു. പുതിയ നിർബന്ധന അനുസരിച്ച് ടീബാ​ഗ് പേപ്പർ, ടാ​ഗ്, നൂൽ എന്നിവ നിർബന്ധമായും മൈ​ഗ്രേഷൻ പരിശോധന പാസായിരിക്കണം. ചായ ഉണ്ടാക്കുന്ന വേളയിൽ ഇവയിലടങ്ങിയിരിക്കുന്ന ആരോ​ഗ്യത്തിന് ഹാനികരമായ വസ്തുക്കൾ അതിൽ അലിയുന്നില്ലെന്ന് ഉറപ്പുവരുത്താനുള്ള പരിശോധനയാണിത്.

ബിഐഎസ്, പ്രധാന നിർദേശങ്ങൾ

• പേപ്പർ മരം, മുള എന്നിവയിൽ നിന്നുണ്ടാക്കുന്ന പൾപ്പ് (വെർജിൻ പൾപ്പ്) ഉപയോ​ഗിച്ചു മാത്രമേ ടീ ബാ​ഗ് നിർമിക്കാവൂ

• ടീ ബാ​ഗുകളുടെ ബലം കൂട്ടാൻ വാഴനാരുകൾ ഉപയോ​ഗിക്കാം.

• മൈക്രോ പ്ലാസ്റ്റിക് ഉപയോ​ഗിച്ചുള്ള ടീ ബാ​ഗുകൾ പാടില്ല.

• ടീ ബാ​ഗിനെ ടാ​ഗുമായി ബന്ധിപ്പിക്കുന്ന നൂൽ പരുത്തി കൊണ്ട് മാത്രം നിർമിച്ചവയാകണം.

• ഒറ്റത്തവണ ഉപയോ​ഗിക്കാവുന്ന ടീ ബാ​ഗുകളിൽ ഒന്നു മുതൽ നാല് ​ഗ്രാം വരെ തേയില ഉണ്ടായിരിക്കണം.

• ഒന്നിലേറെ തവണ ഉപയോ​ഗിക്കാവുന്ന വലിയ ടീ ബാ​ഗുകളിൽ നാല് മുതൽ 25 ​ഗ്രാം വരെ തേയില ഉണ്ടാകണം.

• ടീബാ​ഗിൽ പ്രിന്റ് ചെയ്യാൻ ഉപയോ​ഗിക്കുന്ന മഷി ഫുഡ് പാക്കേജിങ് ച‌ട്ടപ്രകാരം അനുവദിച്ചിട്ടുള്ളതാകണം.