ഹെൽത്തി ബ്രേക്ക്ഫാസ്റ്റിന് ഓട്സോ മുട്ടയോ, ഏതാണ് മികച്ചത്?

ഹെൽത്തി ബ്രേക്ക്ഫാസ്റ്റ് പ്ലാൻ ചെയ്യുമ്പോൾ ഏറ്റവും മുന്നിൽ നിൽക്കുന്ന രണ്ട് ഓപ്ഷനുകളാണ് ഓട്സും മുട്ടയും. ഇവ രണ്ടിനെയും താരതമ്യം ചെയ്തുകൊണ്ടുള്ള ചർച്ചകൾ സോഷ്യൽമീഡിയയിൽ പലപ്പോഴും ചൂടുപിടിക്കാറുണ്ട്. പോഷകസമൃദ്ധമാണെങ്കിലും ശരീരത്തിൽ ഇവ പ്രവർത്തിക്കുന്നത് വ്യത്യസ്ത രീതിയിലാണ്.

ആരോ​ഗ്യ വാർത്തകൾ കൂടുതൽ അറിയാൻ വാട്സാപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

ഓട്സിൽ ഏറ്റവും കൂടുതൽ അടങ്ങിയിരിക്കുന്നത് കാർബോഹൈഡ്രേറ്റ്സ് ആണ്. ഇത് ഊർജലഭ്യതയ്ക്ക് മികച്ചതാണ്. എന്നാൽ മുട്ട പ്രോട്ടീൻ സമ്പുഷ്ടമായതിനാൽ വയറിന് കൂടുതൽ സംതൃപ്തി നൽകും. നിങ്ങളുടെ ശരീരത്തിന് എന്താണ് ആവശ്യമെന്നതിന്റെ അടിസ്ഥാനത്തിലാണ് ഭക്ഷണം തിരഞ്ഞെടുക്കേണ്ടത്.

ഓട്‌സ്

ഓട്‌സ് മീൽ ലയിക്കുന്ന നാരുകളാൽ (Soluble fibre) സമൃദ്ധമാണ്. ഇതിലെ ബീറ്റാ-ഗ്ലൂക്കൻ ദഹനം സാവധാനത്തിലാക്കുകയും രക്തത്തിലെ പഞ്ചസാരയുടെ അളവ് സ്ഥിരമായി നിലനിർത്താൻ സഹായിക്കുകയും ചെയ്യുന്നു. പെട്ടെന്ന് ഊർജ്ജം കുറയുന്ന അവസ്ഥ ഒഴിവാക്കാൻ ഓട്‌സ് മികച്ചതാണ്.

ഇത് ദഹനത്തിന് എളുപ്പമുള്ളതും കൊളസ്‌ട്രോൾ നിയന്ത്രിക്കാൻ സഹായിക്കുന്നതിലൂടെ ഹൃദയാരോഗ്യത്തിന് ഗുണകരവുമാണ്. ഇതിലേക്ക് പഴങ്ങളും നട്‌സും ചേർക്കുന്നതിലൂടെ കൂടുതൽ വിറ്റാമിനുകൾ ലഭിക്കുന്നു. എങ്കിലും മുട്ടയെ അപേക്ഷിച്ച് ഓട്‌സിൽ പ്രോട്ടീൻ കുറവാണ്.

മുട്ട

മുട്ടയിൽ പ്രോട്ടീൻ സമൃദ്ധമാണ്. രാവിലെ ഒന്നോ രണ്ടോ മുട്ട കഴിക്കുന്നത് മണിക്കൂറുകളോളം വിശപ്പിനെ നിയന്ത്രിക്കാൻ സഹായിക്കും. ഇത് ഇടവേളകളിലുള്ള ലഘുഭക്ഷണങ്ങൾ ഒഴിവാക്കാൻ സഹായിക്കുന്നതിനാൽ വണ്ണം കുറയ്ക്കാൻ ആഗ്രഹിക്കുന്നവർക്ക് മുട്ട നല്ലതാണ്.

പ്രോട്ടീൻ പേശികളുടെ ആരോഗ്യത്തിനും ഉപാപചയ പ്രവർത്തനങ്ങൾക്കും (Metabolism) അത്യന്താപേക്ഷിതമാണ്. മുട്ടയിൽ വിറ്റാമിൻ ഡി, കോളിൻ തുടങ്ങിയ പ്രധാന പോഷകങ്ങളുണ്ട്. എന്നാൽ മുട്ടയിൽ നാരുകൾ (Fibre) ഇല്ലാത്തതിനാൽ പച്ചക്കറികളോ ഹോൾ ഗ്രെയിൻ ടോസ്റ്റോ കൂടെ ചേർക്കുന്നത് ഉചിതമായിരിക്കും.

ശരീരഭാരം കുറയ്ക്കാൻ ഓട്‌സും മുട്ടയും ഒരേ പോലെ ഫലപ്രദമാണ്. ഓട്‌സ് നാരുകളിലൂടെ വിശപ്പ് കുറയ്ക്കുമ്പോൾ മുട്ട പ്രോട്ടീനിലൂടെ വിശപ്പിനെ നിയന്ത്രിക്കുന്നു. ഇതിൽ ചേർക്കുന്ന മധുരമോ അമിതമായ എണ്ണയോ ഗുണഫലങ്ങൾ ഇല്ലാതാക്കും. ശാരീരിക അധ്വാനം കൂടുതലുള്ളവർക്ക് ഓട്‌സ് ഇന്ധനമായി മാറുമ്പോൾ, ഓഫീസിൽ ഇരുന്ന് ജോലി ചെയ്യുന്നവർക്ക് വിശപ്പ് കുറയ്ക്കാൻ മുട്ടയാണ് കൂടുതൽ അനുയോജ്യം.

ഓട്‌സും മുട്ടയും തമ്മിലുള്ള തർക്കത്തിൽ ഒരു വിജയിയെ കണ്ടെത്തുക പ്രയാസമാണ്. പതുക്കെയും എന്നാൽ നീണ്ടുനിൽക്കുന്നതുമായ ഊർജ്ജം ആവശ്യമുള്ളപ്പോൾ ഓട്‌സ് തിരഞ്ഞെടുക്കാം. പ്രോട്ടീനും കൂടുതൽ നേരം വയർ നിറഞ്ഞ അവസ്ഥയും ആഗ്രഹിക്കുന്നവർക്ക് മുട്ടയാണ് മികച്ചത്. ആഴ്ചയിൽ രണ്ടും മാറിമാറി കഴിക്കുന്നതാണ് ഏറ്റവും സമീകൃതമായ രീതി.