Fact Check| അമേരിക്കയിൽ പാരസെറ്റാമോൾ നിരോധിക്കപ്പെട്ടിട്ടുണ്ടോ?

പാരസെറ്റമോളിനെ കുറിച്ച് പല തരത്തിലുള്ള അഭ്യൂഹങ്ങളും നമ്മൾ പലതവണയായി കേട്ടിട്ടുണ്ട്. അമേരിക്ക, ജാപ്പാൻ പോലുള്ള വികസിത രാജ്യങ്ങൾ തള്ളിക്കളഞ്ഞ മരുന്നാണെന്നും പാരസെറ്റാമോൾ ​ഗർഭിണികൾ ക​ഴിക്കാൻ പാടില്ലെന്നുമൊക്കെയാണ് പ്രധാന ആരോപണങ്ങൾ. എന്നാൽ കാര്യങ്ങൾ നമ്മൾ വിചാരിച്ച പോലെയല്ല. അമേരിക്കയിലും ജപ്പാനിലുമൊക്കെ പാരസെറ്റാമോൾ വ്യാപകമായി തന്നെ ഉപയോ​ഗിക്കുന്നുണ്ട്, അതുപക്ഷെ അസിറ്റമിനോഫെൻ എന്ന പേരിലാണെന്ന് മാത്രം.

യൂറോപ്പ്, ഓസ്‌ട്രേലിയ, ന്യൂസിലാൻഡ്, ഇന്ത്യ തുടങ്ങിയ രാജ്യങ്ങൾ പിന്തുടരുന്ന ഇന്റർനാഷണൽ നോൺപ്രൊപ്രൈറ്ററി നെയിം (INN) സിസ്റ്റത്തിന് കീഴിലാണ് ഈ മരുന്ന് പാരസെറ്റമോൾ എന്ന് അറിയപ്പെടുന്നത്. അതേസമയം, യുഎസ് അഡോപ്റ്റഡ് നേയിം സിസ്റ്റം (USAN) പിന്തുടരുന്ന അമേരിക്ക, ജപ്പാൻ, കാനഡ, വെൻസ്വേല പോലുള്ള രാജ്യങ്ങളിൽ ഈ പറഞ്ഞ പാരസെറ്റമോൾ അതിന്റെ കെമിക്കൽ കോമ്പൗണ്ടിന്റെ പേരിലാണ് അറിയപ്പെടുന്നത്.

പാരസെറ്റാമോൾ നിരോധിച്ചിട്ടുണ്ടോ?

ചില സുരക്ഷാ കാരണങ്ങളാൽ പാരസെറ്റമോൾ അടങ്ങിയ ചില ഫിക്സഡ്-ഡോസ് കോമ്പിനേഷനുകൾ ഇന്ത്യ നിരോധിച്ചിട്ടുണ്ട്. കൂടാതെ 1986-ൽ തുർക്കി, ചില പ്രതികൂല പ്രതികരണങ്ങൾ കണ്ടെത്തിയതിനെ തുടർന്ന് താൽക്കാലികമായി പാരസെറ്റമോളിന്റെ നിർമാണവും വിൽപനയും നിർത്തിവെച്ചിരുന്നു. എന്നാൽ ഇപ്പോൾ തുർക്കിയിൽ പാരസെറ്റമോൾ ലഭ്യമാണ്. 2023-ൽ ക്ഷാമം കാരണം ഫ്രാൻസ് പാരസെറ്റാമോളിന്റെ ഓൺലൈൻ വിൽപന്ക്ക് താൽക്കാലിക നിരോധനം ഏർപ്പെടുത്തിയിരുന്നു.

പാരസെറ്റാമോൾ സുരക്ഷിതമാണോ?

പാരസെറ്റമോൾ ലോകത്ത് സുരക്ഷിതവും വ്യാപകമായി ഉപയോ​ഗിക്കുന്ന ഒരു മരുന്നാണ്. എന്നാൽ മറ്റ് മരുന്നുകൾ പോലെ തന്നെ പാരസെറ്റമോളും അമിത ഡോസ് ആയാൽ അപകടമാണ്. ലോകാരോഗ്യ സംഘടനയും (WHO) യുഎസ് FDAയും അനുസരിച്ച് പാരസെറ്റമോൾ അമിത അളവ് കരളിനെ തകരാറിലാക്കും.

​ഗർഭിണികൾക്ക് സുരക്ഷിതം

​പാരസെറ്റമോളിനെ ഒരു അവശ്യമരുന്നായാണ് ലോകാരോ​ഗ്യ സംഘടന പട്ടികപ്പെടുത്തിയിരിക്കുന്നത്. ഗർഭിണികളോ മുലയൂട്ടുന്ന സ്ത്രീകളോ രണ്ട് മാസത്തിൽ കൂടുതൽ പ്രായമായ കുട്ടികൾക്കോ പാരസെറ്റമോൾ ഉപയോ​ഗിക്കുന്നത് സുരക്ഷിതമാണ്.

മുതിർന്നവർക്ക് പരമാവധി സുരക്ഷിത ഡോസ്:

ഒരു ദിവസം 4,000 മില്ലിഗ്രാം (നാല് ഗ്രാം), ഓരോ നാല്–ആറ് മണിക്കൂറിലും 500–1,000 മില്ലിഗ്രാമായി തിരിച്ചിരിച്ചിട്ടുണ്ട്. ഈ പരിധി കവിയുന്നത് കരളിന്റെ ആരോ​ഗ്യത്തെ തകരാറിലാക്കുകയും, ഇത് വിഷബാധയ്ക്ക് കാരണമാകും. അതുകൊണ്ട് കരൾ രോ​ഗികളും മദ്യപാനികളും പാരസെറ്റമോൾ കഴിക്കുമ്പോൾ ജാ​ഗ്രത പാലിക്കേണ്ടതുണ്ട്.