ചർമം മുതൽ ഹൃദയം വരെ, മത്തങ്ങയോളം വലിപ്പം ​ഗുണങ്ങൾ കുരുവിനുമുണ്ട്

മത്തങ്ങ നിരവധി റെസിപ്പി ഉണ്ടാക്കാൻ ഉപയോഗിക്കാറുണ്ടെങ്കിലും അതിലെ കുരു പലപ്പോഴും ചവറ്റുകുട്ടയിലേക്കാണ് പോകുന്നത്. ഇങ്ങനെ കളയുന്ന ഈ ചെറിയ കുരുവിൽ പ്രോട്ടീൻ, നാരുകൾ, ആരോഗ്യകരമായ കൊഴുപ്പുകൾ, മഗ്‌നീഷ്യം, സിങ്ക്, ആന്റിഓക്‌സിഡന്റുകൾ തുടങ്ങിയ നിരവധി പോഷകങ്ങളാണ് ഒളിഞ്ഞിരിക്കുന്നത്.

ആരോ​ഗ്യ വാർത്തകൾ കൂടുതൽ അറിയാൻ വാട്സാപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

വറുത്തും സാലഡിലും തൈരിലും സൂപ്പിലും ചേർക്കാനും എളുപ്പമാണ് മത്തങ്ങക്കുരു. മുടിയുടെ ആരോഗ്യം മുതൽ നല്ല ഉറക്കം വരെയുള്ള കാര്യങ്ങളിൽ ഇതിൽ അടങ്ങിയ പോഷകങ്ങൾ സഹായിക്കും. എന്നാൽ ഇത് കലോറി കൂടുതലുള്ള ഭക്ഷണമായതിനാൽ അളവ് ശ്രദ്ധിച്ച് കഴിക്കുന്നതാണ് നല്ലത്.

ഹൃദയാരോഗ്യം

ആരോഗ്യകരമായ കൊഴുപ്പുകളും ആന്റിഓക്‌സിഡന്റുകളും അടങ്ങിയ മത്തങ്ങക്കുരു സമീകൃതാഹാരത്തിന്റെ ഭാഗമായി ഉൾപ്പെടുത്താം. രക്തത്തിലെ കൊളസ്‌ട്രോൾ, പഞ്ചസാര എന്നിവ നിയന്ത്രിക്കുന്നതിനും ഹൃദയാരോഗ്യത്തെ പിന്തുണയ്ക്കുന്നതിനും സഹായകരമായ പോഷകങ്ങൾ ഇതിലുണ്ട്.

നല്ല ഉറക്കത്തിന് സഹായിക്കുന്നു

മഗ്‌നീഷ്യവും ട്രിപ്‌റ്റോഫാനും അടങ്ങിയതിനാൽ വൈകുന്നേരത്തെ ലഘുഭക്ഷണത്തിന്റെ ഭാഗമായി ചെറിയ അളവിൽ മത്തങ്ങക്കുരു ഉൾപ്പെടുത്താം. ഇത് നല്ല ഉറക്കത്തിന് സഹായിക്കുമെങ്കിലും ഉറക്കപ്രശ്‌നങ്ങൾക്കുള്ള മരുന്നായി ഇതിനെ കാണരുത്.

മുടിയുടെ ആരോഗ്യത്തിന്

സിങ്ക്, പ്രോട്ടീൻ, ആരോഗ്യകരമായ കൊഴുപ്പുകൾ എന്നിവ മുടിയുടെ ആരോഗ്യത്തിന് ആവശ്യമായ പോഷകങ്ങളാണ്. മത്തങ്ങക്കുരുവും പോഷകസമൃദ്ധമായ സമീകൃതാഹാരത്തിന്റെ ഭാഗമായി ഉൾപ്പെടുത്തുന്നത് മുടിയ്ക്ക് കൂടുതൽ കരുത്ത് നൽകും.

ദഹനത്തിന് സഹായം

നാരുകൾ അടങ്ങിയിരിക്കുന്നതിനാൽ ദഹനാരോഗ്യത്തിന് മത്തങ്ങക്കുരു സഹായകമാകാം. എന്നാൽ അധികമായി കഴിക്കുന്നത് ചിലരിൽ വയറുവീർക്കാനും അസ്വസ്ഥതയുണ്ടാക്കാനും സാധ്യതയുള്ളതിനാൽ അളവ് ശ്രദ്ധിച്ച് കഴിക്കണം.

ആന്റിഓക്‌സിഡന്റ് സംരക്ഷണം

ശരീരത്തിലെ ഓക്‌സിഡേറ്റീവ് സമ്മർദത്തിനെതിരെ പ്രവർത്തിക്കാൻ സഹായിക്കുന്ന ആന്റിഓക്‌സിഡന്റുകളും വിറ്റാമിൻ ഇയും മത്തങ്ങക്കുരുവിൽ അടങ്ങിയിട്ടുണ്ട്. കോശങ്ങളുടെ ആരോഗ്യത്തെ പിന്തുണയ്ക്കുന്നതിൽ ഇവയ്ക്ക് പങ്കുണ്ട്.

മൂത്രാശയത്തിന്റെ ആരോഗ്യത്തിന്

മത്തങ്ങക്കുരുവും അതിൽനിന്നുള്ള എണ്ണയും മൂത്രാശയത്തിന്റെ ആരോഗ്യത്തിന് നല്ലതാണെന്ന് ചില പഠനങ്ങൾ സൂചിപ്പിക്കുന്നു. അമിതമായി മൂത്രമൊഴിക്കാനുള്ള പ്രവണത പോലുള്ള പ്രശ്‌നങ്ങളിൽ സപ്ലിമെന്റുകൾ ഉപയോഗിക്കുന്നതിന് മുമ്പ് ഡോക്ടറുടെ നിർദേശം തേടുന്നത് നല്ലതാണ്.

പുരുഷന്മാരുടെ പ്രോസ്റ്റേറ്റ് ആരോഗ്യത്തിന്

മത്തങ്ങക്കുരുവിൽ അടങ്ങിയിരിക്കുന്ന സിങ്ക്, ഫൈറ്റോസ്റ്റെറോളുകൾ തുടങ്ങിയ ഘടകങ്ങൾ പ്രോസ്റ്റേറ്റ് ആരോഗ്യത്തെ പിന്തുണയ്ക്കാൻ സഹായകമാകാം. എന്നാൽ പ്രോസ്റ്റേറ്റ് സംബന്ധമായ അസ്വസ്ഥതകൾക്ക് സ്വയം ചികിത്സയ്ക്ക് പകരം വിദഗ്ധരുടെ നിർദേശം തേടണം.

മത്തങ്ങ വിത്തുകള്‍ ദിവസവും കഴിക്കാമോ?

പോഷകഗുണങ്ങള്‍ നിരവധി ഉണ്ടെന്ന് പറയുമ്പോഴും മിതത്വം പാലിക്കുക എന്നത് പ്രധാനമാണ്. നിങ്ങള്‍ സോഡിയത്തിന്‍റെ അളവു കൂടുതല്‍ സ്വീകരിക്കുന്നുണ്ടെങ്കില്‍ മത്തങ്ങ വിത്തുകള്‍ ഒഴിവാക്കണം. ദഹനപ്രശ്നമുള്ളപ്പോഴും മത്തങ്ങ വിത്തുകള്‍ ഒഴിവാക്കുന്നതാണ് നല്ലത്. നട്സിനോടും വിത്തുകളോടും അലര്‍ജി ഉള്ളവര്‍ മത്തങ്ങ വിത്തുകള്‍ കഴിക്കുമ്പോള്‍ സൂക്ഷിക്കണം.

മാത്രമല്ല, മത്തങ്ങ വിത്തുകൾക്ക് കലോറി കൂടുതലാണ്. അവ അമിതമായി കഴിക്കുന്നത് ശരീരഭാരം വർധിപ്പിക്കാൻ കാരണമാകും. കുറഞ്ഞ രക്തസമ്മര്‍ദം ഉള്ളവരിലും രക്തം കട്ടിയാക്കൽ മരുന്നുകൾ കഴിക്കുന്നവരിലും മത്തങ്ങ വിത്തുകള്‍ വിപരീതഫലം ഉണ്ടാക്കിയേക്കാം.

മത്തങ്ങ വിത്തുകള്‍ എങ്ങനെ ഡയറ്റില്‍ ചേര്‍ക്കാം

സ്മൂത്തിയിലോ സാലഡിയോ ഓട്സിലോ ടോപ്പിങ് ആയി മത്തങ്ങ വിത്തുകള്‍ ഉപയോഗിക്കാം. കൂടാതെ എനര്‍ജി ബാര്‍ ഉണ്ടാക്കുമ്പോള്‍ അതിലൊരു ചേരുവയായും മത്തങ്ങ വിത്തുകള്‍ ചേര്‍ക്കാവുന്നതാണ്. ലഘുഭക്ഷണമായും മത്തങ്ങ വിത്തുകള്‍ കഴിക്കാം.