ഇന്നത്തെ ഹൈപ്പര്‍-കണക്റ്റഡ് ലോകത്ത്, സ്മാര്‍ട്ട് ഫോണ്‍ പോലുള്ള ഡിജിറ്റല്‍ ഉപകരണങ്ങള്‍ ഒരു ശരീരഭാഗമെന്ന തരത്തില്‍ നമ്മുടെ ദൈനംദിന ജീവിതത്തില്‍ ചേര്‍ന്ന് നില്‍ക്കുന്നതാണ്. സോഷ്യല്‍മീഡിയ മുതല്‍ വര്‍ക്കും മീറ്റിങ്ങും ക്ലാസുകളും വരെ ഇന്ന് വിരല്‍ തുമ്പിലാണ്. ജീവിത നിലവാരം മെച്ചപ്പെടുത്താന്‍ ഉപകാരപ്രദമാണെങ്കിലും മൊബൈല്‍ ഫോണില്‍ ചെലവഴിക്കുന്ന സ്ക്രീന് ടൈം നമ്മുടെ ആരോഗ്യത്തെ വലിയ രീതിയില്‍ ബാധിക്കുന്നുണ്ട്.
പ്രത്യേകിച്ച് ഹൃദയത്തെ, അമിത സ്ക്രീന് ടൈം ഉപയോഗം കാരണം ഉണ്ടാകുന്ന ഡാര്‍ക്ക് സര്‍ക്കിള്‍, തലവേദന, ക്ഷീണം എന്നിവ പരിഗണിക്കുമ്പോള്‍ നമ്മള്‍ വിട്ടുപോകുന്ന ഒരു കാര്യമാണ് ഹൃദയാരോഗ്യം. അമിത സ്ക്രീന് ടൈം ഉപയോഗം ശാരീരിക നിഷ്‌ക്രിയത്വം, ഉറക്കക്കുറവ്, അനാരോഗ്യകരമായ ശരീരഭാരം, വർധിച്ച സമ്മർദ നില എന്നിവയിലേക്ക് നയിച്ചേക്കാം, ഇവയെല്ലാം ഹൃദയാരോഗ്യത്തെ കൂടുതൽ സമ്മർദത്തിലാക്കുന്നതാണ്.
ദീർഘനേരം ഡിജിറ്റല്‍ ഉപകരണങ്ങളില്‍ സമയം ചെലവഴിക്കുന്നത് രക്തസമ്മര്‍ദം വര്‍ധിപ്പിക്കുകയും രക്തത്തിലെ പഞ്ചസാരയുടെ നിയന്ത്രണം തടസപ്പെടുത്തുകയും ചെയ്യുന്നു. ഇത് ശരീരത്തിലെ സ്വാഭാവിക വീണ്ടെടുക്കല്‍ ചക്രങ്ങളെ (സര്‍ക്കാഡിയന്‍ റിഥം) തടസപ്പെടുത്തുകയും ചെയ്യുന്നു. ഇത് നമ്മള്‍ പോലും അറിയാതെ ഹൃദ്രോഗങ്ങളെ ക്ഷണിച്ചുവ വരുത്താം. നമ്മള്‍ക്ക് വേണ്ടി 24 മണിക്കൂറും പ്രവര്‍ത്തിക്കുന്ന ഹൃദയത്തിന് സ്ക്രീന് ടൈമില്‍ നിന്ന് അല്‍പം വിശ്രമം നല്‍കേണ്ടതുണ്ട്.
സ്ക്രീന് ടൈം പൂര്‍ണമായും ഒഴിവാക്കാന്‍ സാധിക്കില്ല, എന്നാല്‍ ഉപയോഗം തീര്‍ച്ചയായും പരിമിതപ്പെടുത്താന്‍ സാധിക്കും.
ഇടയ്ക്കിടെ സ്ക്രീൻ ഇടവേളകൾ എടുക്കുക
ദീര്‍ഘനേരം സ്ക്രീനിന് മുന്നിലുള്ള ഇരിപ്പ് ഒഴിവാക്കി, ഇടയ്ക്ക് ഒന്ന് നടക്കുക.
നേരിട്ടും ആളുകളുമായി ഇടപെടുന്നതിന് മുന്‍ഗണന നല്‍കുക.
നിങ്ങളുടെ ദൈനംദിന സ്ക്രീൻ സമയം ട്രാക്ക് ചെയ്യാനും അത് ക്രമേണ കുറയ്ക്കാനും നിങ്ങളുടെ ഫോണിന്റെ ക്രമീകരണങ്ങൾ ഉപയോഗിക്കുക.
മൊബൈല്‍ ഫോണ്‍ മാറ്റിവെച്ച് പുസ്തകം വായ്ക്കാം, നടക്കാൻ പോവുക, ഭക്ഷണം പാകം ചെയ്യുക അല്ലെങ്കിൽ നിങ്ങളുടെ മനസ്സിനും കണ്ണുകൾക്കും വിശ്രമം നൽകുന്ന ഏതെങ്കിലും പ്രവർത്തനം പരീക്ഷിക്കുക.
അമിത സ്ക്രീന് ടൈം ശരീരത്തെ എങ്ങനെ ബാധിക്കുന്നു
മണിക്കൂറുകളോളം സ്‌ക്രീനുകളിൽ നോക്കിയിരിക്കുന്നത് കണ്ണുകൾക്ക് ആയാസം ഉണ്ടാക്കും. ഇത് തലവേദന പോലുള്ള അവസ്ഥയ്ക്ക് കാരണമാകും. മാത്രമല്ല, ഇതില്‍ നിന്ന് പുറപ്പെടുവിക്കുന്ന നീല വെളിച്ചം ഉറക്കമില്ലായ്മയിലേക്ക് നയിക്കാം.
ഒരേ സ്ഥാനത്ത് ദീർഘനേരം ഇരിക്കുന്നത് കഴുത്ത് വേദന, തോള്‍ വേദന, പുറം വേദന എന്നിവയ്ക്ക് കാരണമാകും. മാത്രമല്ല കാലക്രമേണ ഉദാസീനമായ ജീവിതശൈലി ശരീരഭാരം വര്‍ധിക്കാനും കാരണമാകും.
ഉറങ്ങാന്‍ കിടക്കുമ്പോള്‍ സ്ക്രോൾ ചെയ്യുന്നത് ഉറക്കം നഷ്ടപ്പെടാന്‍ കാരണമാകും. ഇത് രാവിലെ ക്ഷീണം ഉണ്ടാക്കുകയും ചെയ്യും.
സ്ക്രീന് ടൈം മാനസികമായി എങ്ങനെ ബാധിക്കും
നിരന്തരമായി സന്ദേശങ്ങളും നോട്ടിഫിക്കേഷനുകളും ഓണ്‍ലൈനില്‍ തുടരാന്‍ സമ്മര്‍ദം ഉണ്ടാക്കും.
കൂടുതൽ സമയം ഓൺലൈനിൽ ചെലവഴിക്കുകയും ആളുകളുമായി മുഖാമുഖം കുറച്ച് സമയം ചെലവഴിക്കുകയും ചെയ്യുന്നത് ഒറ്റപ്പെടലിനും വിഷാദത്തിനും പോലും കാരണമാകും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
