20 മിനിറ്റ് ഫ്രിഡ്ജിൽ വെയ്ക്കാം, ഉള്ളി അരിയുമ്പോൾ കണ്ണുനീർ ഒഴിവാക്കാൻ 7 ടിപ്സ്

അടുക്കളയിൽ സ്ഥിരമായി നേരിടുന്ന ബുദ്ധിമുട്ടുകളിലൊന്നാണ് ഉള്ളി അരിയുമ്പോൾ കണ്ണിൽ നിന്ന് വെള്ളം വരുന്നത്. എന്നാൽ ഉള്ളി അരിയുന്നത് ഒഴിവാക്കാനുമാകില്ലല്ലോ? ചില പൊടിക്കൈകൾ പരീക്ഷിക്കുന്നത് ഈ പ്രശ്നം പരിഹരിക്കാൻ സഹായിക്കും.

ആരോ​ഗ്യ വാർത്തകൾ കൂടുതൽ അറിയാൻ വാട്സാപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

ഉള്ളി അരിയുമ്പോൾ അവയുടെ കോശഭിത്തി പൊട്ടുകയും അതിൽ നിന്ന് ചില രാസഘടകങ്ങൾ പുറത്തുവരികയും ചെയ്യുന്നത് വായുവുമായി സമ്പർക്കത്തിൽ വരുമ്പോൾ നമ്മുടെ കണ്ണുകളെ പ്രകോപിപ്പിക്കുകയും എരിച്ചിലും അസ്വസ്ഥതയും ഉണ്ടാക്കുന്നു. ഇതിനെ പ്രതിരോധിക്കാനാണ് കണ്ണുകൾ കൂടുതൽ കണ്ണുനീർ ഉൽപ്പാദിപ്പിക്കുന്നത്. അതായത്, ഉള്ളി അരിയുമ്പോൾ വരുന്ന കണ്ണുനീർ ശരീരം കണ്ണിനെ സംരക്ഷിക്കാൻ നടത്തുന്ന സ്വാഭാവിക പ്രതികരണമാണ്.

അരിയുന്നതിന് മുമ്പ് തണുപ്പിക്കുക

ഉള്ളി അരിയുന്നതിന് മുമ്പ് 30-20 മിനിറ്റ് സമയം ഫ്രിഡ്ജിൽ വയ്ക്കുന്നത് അരിയുമ്പോൾ കണ്ണുനീർ വരുന്നത് ഒഴിവാക്കാൻ സഹായിക്കും. ഉള്ളി ഫ്രീസറിൽ വെച്ച് കട്ടിയാക്കേണ്ട ആവശ്യമില്ല. അത് ഉള്ളിയുടെ ഘടനയെയും രുചിയെയും ബാധിക്കാം.

മൂർച്ചയുള്ള കത്തി ഉപയോഗിക്കാം

മൂർച്ചയില്ലാത്ത കത്തി ഉപയോഗിക്കുമ്പോൾ ഉള്ളിയുടെ കോശങ്ങൾ കൂടുതൽ ചതയാനും പൊട്ടാനും കാരണമാകും. ഇതുവഴി കണ്ണിനെ പ്രകോപിപ്പിക്കുന്ന സംയുക്തങ്ങൾ കൂടുതൽ പുറത്തുവരാൻ സാധ്യതയുണ്ട്. അതുകൊണ്ട് ഉള്ളി അരിയുമ്പോൾ നല്ല മൂർച്ചയുള്ള കത്തി ഉപയോഗിക്കുന്നത് നല്ലതാണ്. കത്തി ഉപയോഗിക്കുമ്പോൾ സുരക്ഷയ്ക്കും പ്രത്യേക ശ്രദ്ധ നൽകണം.

ഉള്ളിയുടെ വേരുഭാഗം അവസാനം മുറിക്കുക

ഉള്ളിയുടെ വേരിനോട് ചേർന്ന ഭാഗത്ത് ചില രാസഘടകങ്ങളുടെ സാന്ദ്രത കൂടുതലായിരിക്കാം. അതുകൊണ്ട് ആദ്യം ഉള്ളി തൊലി കളഞ്ഞ് ആവശ്യമായ രീതിയിൽ മുറിച്ചശേഷം അവസാനം വേരുഭാഗം മുറിക്കുന്നത് കണ്ണുനീർ കുറയ്ക്കാൻ സഹായിക്കും.

വായുസഞ്ചാരമുള്ള സ്ഥലത്ത് അരിയുക

നല്ല വായുസഞ്ചാരമുള്ള സ്ഥലത്തിരുന്ന് ഉള്ളി അരിയുന്നത് കണ്ണിൽ നിന്ന് വെള്ളം വരുന്നത് കുറയ്ക്കാൻ സഹായിക്കും. അടുക്കളയിൽ എക്സോസ്റ്റ് ഫാൻ ഉണ്ടെങ്കിൽ അത് ഓൺ ചെയ്യാം. ജനലിനടുത്ത് ഉള്ളി അരിയുന്നതും വായുവിന്റെ ദിശയിൽ നിന്ന് കണ്ണിനെ അകറ്റി വയ്ക്കുന്നതും സഹായിക്കും.

കണ്ണട ഉപയോഗിക്കാം

ഉള്ളി അരിയുമ്പോൾ കണ്ണുമായി നേരിട്ട് സമ്പർക്കം കുറയ്ക്കാൻ കണ്ണട ഉപയോഗിക്കുന്നത് ഫലപ്രദമായ മാർഗമാണ്. സാധാരണ കണ്ണടയ്ക്ക് പകരം കണ്ണിന്റെ വശങ്ങളും മൂടുന്ന തരത്തിലുള്ള സംരക്ഷണ കണ്ണടയാണ് കൂടുതൽ നല്ലത്.

ഉള്ളി അരിയുമ്പോൾ കണ്ണിൽ കൈവയ്ക്കരുത്

ഉള്ളി അരിഞ്ഞുകൊണ്ടിരിക്കുമ്പോൾ കണ്ണിൽ എരിച്ചിൽ അനുഭവപ്പെട്ടാൽ കണ്ണ് തിരുമ്മുന്നത് ഒഴിവാക്കണം. ഉള്ളിയുടെ നീര് കൈയിൽ പറ്റിയിട്ടുണ്ടെങ്കിൽ കണ്ണിൽ തൊടുന്നതിലൂടെ അസ്വസ്ഥത കൂടുതൽ വർധിക്കാം. കണ്ണിൽ കൈവയ്ക്കേണ്ട സാഹചര്യമുണ്ടെങ്കിൽ ആദ്യം കൈകൾ നന്നായി കഴുകുക.

ഉള്ളി അരിഞ്ഞ ശേഷം കണ്ണ് കഴുകുക

അരിയുന്നതിനിടെ കണ്ണിൽ എരിച്ചിൽ കൂടുതലായാൽ കണ്ണ് തിരുമ്മാതെ ശുദ്ധമായ വെള്ളം ഉപയോഗിച്ച് കണ്ണുകൾ കഴുകാം. കോൺടാക്ട് ലെൻസ് ഉപയോഗിക്കുന്നവർക്ക് അസ്വസ്ഥത അനുഭവപ്പെട്ടാൽ പ്രത്യേക ശ്രദ്ധ വേണം. കണ്ണിൽ ശക്തമായ വേദന, കാഴ്ച മങ്ങൽ, തുടർച്ചയായ ചുവപ്പ്, നീണ്ടുനിൽക്കുന്ന അസ്വസ്ഥത തുടങ്ങിയവ ഉണ്ടെങ്കിൽ വൈദ്യസഹായം തേടുന്നതാണ് സുരക്ഷിതം.