ചർമം വരണ്ടു പോകുന്നു, ക്രീം വർക്ക് ആകുന്നില്ല; ശ്രദ്ധിക്കാതെ പോകുന്ന പെരിമെനോപോസ് ലക്ഷണങ്ങൾ

പ്രായം കൂടുന്തോറും സ്ത്രീകളുടെ ശരീരത്തിൽ പല മാറ്റങ്ങളും സംഭവിക്കാം. പ്രത്യേകിച്ച് ചർമത്തിൽ, മുഖം പെട്ടെന്ന് വരണ്ടു പോവുക, വർഷങ്ങളായി ഉപയോ​ഗിക്കുന്ന ക്രീം പോലും ചർമത്തെ അസ്വസ്ഥമാക്കുക, മുതിർന്ന പ്രായത്തിൽ വീണ്ടും മുഖക്കുരു വരുക... അങ്ങനെ അപ്രതീക്ഷിതമായി സംഭവിക്കുന്ന ഈ മാറ്റങ്ങൾക്ക് കാരണം പെരിമെനോപോസ് എന്ന ഘട്ടമായിരിക്കാമെന്ന് വിദ​ഗ്ധർ ചൂണ്ടിക്കാണിക്കുന്നു.

ആരോ​ഗ്യ വാർത്തകൾ കൂടുതൽ അറിയാൻ വാട്സാപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

എന്താണ് പെരിമെനോപോസ്?

ആർത്തവവിരാമത്തിന് മുമ്പുള്ള മാറ്റങ്ങളുടെ കാലഘട്ടമാണ് പെരിമെനോപോസ്. ഇത് രണ്ട് മുതൽ പത്ത് വർഷം വരെ നീണ്ടുനിൽക്കാം. ഈ സമയത്ത് ഈസ്ട്രജൻ, പ്രൊജസ്റ്ററോൺ എന്നീ ഹോർമോണുകളുടെ അളവിൽ വലിയ ഏറ്റക്കുറച്ചിലുകൾ സംഭവിക്കുന്നു.

മുപ്പതുകളുടെ അവസാനത്തിലും നാൽപ്പതുകളുടെ തുടക്കത്തിലുമുള്ള സ്ത്രീകൾക്ക് ഹോർമോൺ മാറ്റങ്ങൾ ആരംഭിച്ചിട്ടുണ്ടെന്ന് പലപ്പോഴും തിരിച്ചറിയാൻ കഴിയാത്തതിനാൽ, ഈ ഘട്ടം പലർക്കും വൈകിയാണ് മനസ്സിലാകുന്നത്. ഈ ഹോർമോൺ വ്യതിയാനങ്ങളുടെ ആദ്യ സൂചനകളിലൊന്ന് ചർമത്തിലാണ് പ്രകടമാകുന്നത്. പലരും ഇത് പ്രായത്തിന്റെ സ്വാഭാവിക മാറ്റമോ സമ്മർദം കാരണമോ ആണെന്ന് കരുതി അവഗണിക്കാറുണ്ട്.

പെരിമെനോപോസ് ഹോർമോണുകളുടെ ക്രമാനുഗതമായ കുറവല്ല ഇതിനു കാരണമെന്നും മറിച്ച് തുടർച്ചയായ ഉയർച്ചതാഴ്ചകളാണെന്നും വിദഗ്ധർ വ്യക്തമാക്കുന്നു. ഈസ്ട്രജന്റെ അളവ് കുറയുമ്പോൾ ടെസ്റ്റോസ്റ്റിറോണിന്റെ സ്വാധീനം താരതമ്യേന കൂടുകയും ചർമ്മത്തിലെ എണ്ണ ഉൽപാദനത്തിലും അണുബാധാ പ്രതികരണങ്ങളിലും മാറ്റങ്ങൾ ഉണ്ടാകുകയും ചെയ്യുന്നു.

അതുകൊണ്ടുതന്നെ ഒരാഴ്ച അമിതമായി എണ്ണമയമുള്ള ചർമ്മവും അടുത്ത ആഴ്ച വരണ്ട ചർമവുമാകാം അനുഭവപ്പെടുക. മെനോപോസിൽ ഹോർമോൺ നില സ്ഥിരമായി കുറയുന്നതിനാൽ ചർമ്മത്തിലെ മാറ്റങ്ങൾ കൂടുതൽ മനസ്സിലാക്കാൻ കഴിയും. എന്നാൽ പെരിമെനോപോസിൽ അവ തികച്ചും അപ്രതീക്ഷിതമായിരിക്കും.

പ്രധാന ലക്ഷണങ്ങൾ

വരണ്ട ചർമം: പെരിമെനോപോസിലെ ഏറ്റവും സാധാരണ ലക്ഷണമാണ് ചർമത്തിലെ വരൾച്ച. എത്ര മോയ്‌സ്ചറൈസർ പുരട്ടിയാലും ചർമം വരണ്ടതുപോലെ തോന്നാം. ഹയലൂറോണിക് ആസിഡിന്റെയും സെറാമൈഡുകളുടെയും സ്വാഭാവിക ഉൽപാദനം കുറയുന്നതാണ് ഇതിന് കാരണം.

ചർമത്തിന്റെ അമിത സെൻസിറ്റിവിറ്റി: വർഷങ്ങളായി പ്രശ്‌നമില്ലാതെ ഉപയോഗിച്ചിരുന്ന സ്‌കിൻ കെയർ ഉൽപന്നങ്ങൾ പോലും പെട്ടെന്ന് കുത്തുന്ന പോലെയോ എരിയുന്നതുപോലെയോ ഒക്കെ അനുഭവപ്പെടാം. സൂര്യപ്രകാശത്തിൽ ഇറങ്ങുമ്പോൾ മുഖം ചുവക്കുകയോ ചൂട് അനുഭവപ്പെടുകയോ ചെയ്യുന്നതും സാധാരണമാണ്.

മുതിർന്ന പ്രായത്തിൽ മുഖക്കുരു: വർഷങ്ങളായി മുഖക്കുരുവില്ലാതിരുന്ന സ്ത്രീകൾക്ക് താടിയിലും കഴുത്തിലും വേദനയുള്ള കുരുക്കൾ പ്രത്യക്ഷപ്പെടാം. ആൻഡ്രജൻ ഹോർമോണുകളുടെ സ്വാധീനം കൂടുന്നതിനാൽ എണ്ണഗ്രന്ഥികൾ കൂടുതൽ സജീവമാകുന്നതാണ് ഇതിന് കാരണം. സാധാരണയായി ആർത്തവചക്രവുമായി ബന്ധപ്പെട്ടാണ് ഇത്തരം മുഖക്കുരു കാണപ്പെടുന്നത്.

ചൊറിച്ചിൽ: ചർമത്തിനടിയിൽ ഉറുമ്പുകൾ ഇഴയുന്നതുപോലുള്ള അസ്വസ്ഥതയോ വ്യക്തമായ കാരണമില്ലാത്ത കടുത്ത ചൊറിച്ചിലോ ചിലർക്ക് അനുഭവപ്പെടാം.

എങ്ങനെ തിരിച്ചറിയാം? പെരിമെനോപോസിലെ ചർമമാറ്റങ്ങൾ എക്‌സിമ, റോസേഷ്യ, തൈറോയ്ഡ് സംബന്ധമായ പ്രശ്‌നങ്ങൾ എന്നിവയുമായി സാമ്യമുള്ളതാകാം. അതിനാൽ സ്വയം ചികിത്സ നടത്തുന്നതിന് പകരം ഡെർമറ്റോളജിസ്റ്റിന്റെ സഹായം തേടുന്നതാണ് ഉചിതം. ആവശ്യമായാൽ ഗൈനക്കോളജിസ്റ്റിന്റെ വിലയിരുത്തലും സഹായകരമാകും. പെരിമെനോപോസ് സ്ഥിരമായ അവസ്ഥയല്ല, ശരിയായ പരിചരണത്തിലൂടെ ചർമത്തെ ആരോഗ്യകരമായി നിലനിർത്താൻ കഴിയുന്നതാണ്.

ശ്രദ്ധിക്കേണ്ട കാര്യങ്ങൾ

• രാവിലെ മൃദുവായ ക്ലെൻസർ ഉപയോഗിച്ച് മുഖം വൃത്തിയാക്കുക.

• വിറ്റാമിൻ സി, പെപ്‌റ്റൈഡുകൾ അടങ്ങിയ ആന്റിഓക്‌സിഡന്റ് സീറം ഉപയോഗിക്കാം.

• നല്ല മോയ്‌സ്ചറൈസർ പുരട്ടുക.

• കണ്ണിന് ചുറ്റുമുള്ള ഭാഗത്ത് ഐ ക്രീം ഉപയോഗിക്കാം.

• സൺസ്‌ക്രീൻ നിർബന്ധമായും ഉപയോഗിക്കുക.

• രാത്രിയിൽ സൺസ്‌ക്രീനും മലിനീകരണവും പൂർണമായി നീക്കം ചെയ്യാൻ ഡബിൾ ക്ലെൻസിങ് ചെയ്യുക.

• ആഴ്ചയിൽ രണ്ട് തവണ മാത്രം മൃദുവായ എക്‌സ്‌ഫോളിയേഷൻ മതിയാകും.

• മറ്റ് ദിവസങ്ങളിൽ ററ്റിനോൾ അല്ലെങ്കിൽ ററ്റിനോയിഡുകൾ ഉപയോഗിക്കാം.

• തുടർന്ന് മോയ്‌സ്ചറൈസർ ഉപയോഗിച്ച് ചർമ്മത്തിന്റെ സംരക്ഷണപാളി നിലനിർത്തുക.

ഒഴിവാക്കേണ്ട കാര്യങ്ങൾ

• ഒരേസമയം നിരവധി ആക്റ്റീവ് ഘടകങ്ങളുള്ള ഉൽപന്നങ്ങൾ ഉപയോഗിക്കുന്നത്

• അമിതമായ എക്‌സ്‌ഫോളിയേഷൻ

• ഇടയ്ക്കിടെ സ്‌കിൻ കെയർ ഉൽപന്നങ്ങൾ മാറ്റുന്നത്

• സോഷ്യൽ മീഡിയ ട്രെൻഡുകൾ പിന്തുടർന്ന് സ്വയം ചികിത്സ നടത്തുന്നത്

എല്ലാ സ്ത്രീകളും കടന്നുപോകുന്ന ഒരു സ്വാഭാവിക ഘട്ടമാണ് പെരിമെനോപോസ്. എന്നാൽ ചർമത്തിലെ മാറ്റങ്ങളുടെ തീവ്രത എല്ലാവരിലും ഒരുപോലെയായിരിക്കില്ല. ജനിതകഘടകങ്ങൾ, സൂര്യപ്രകാശം മൂലമുള്ള ചർമ്മനാശം, പുകവലി, മാനസിക സമ്മർദ്ദം, ഉറക്കക്കുറവ് എന്നിവ ഈ മാറ്റങ്ങളെ കൂടുതൽ വേഗത്തിലാക്കിയേക്കാം.