മഞ്ഞളിലെ കുർക്കുമിൻ എന്താണ്? ആരോഗ്യത്തിന് എങ്ങനെ ഗുണം ചെയ്യും?

അടുക്കളയിലെ മസാലകളിൽ ഒഴിവാക്കാനാകാത്ത ഒന്നാണ് മഞ്ഞൾ. വിഭവങ്ങൾക്ക് മനോഹരമായ മഞ്ഞനിറം നൽകാനും രുചി മെച്ചപ്പെടുത്താനും മാത്രമല്ല, പരമ്പരാ​ഗത ചികിത്സാരീതികളിലും ചർമസംരക്ഷണത്തിനും മഞ്ഞൾ ഉപയോ​ഗിക്കാറുണ്ട്. എന്നാൽ മഞ്ഞളിനെ ഇത്ര സവിശേഷമാക്കുന്നത് എന്താണെന്ന് അറിയാമോ? മഞ്ഞളിന്റെ ഔഷധ​ഗുണമുള്ളതാക്കുന്നതിന് പിന്നിലൊരു ശാസ്ത്രമുണ്ട്.

ആരോ​ഗ്യ വാർത്തകൾ കൂടുതൽ അറിയാൻ വാട്സ്ആപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

മഞ്ഞളിൽ അടങ്ങിയ ആ രഹസ്യക്കൂട്ട്

ഇഞ്ചിയുടെ കുടുംബത്തിൽപ്പെട്ട കുർക്കുമ ലോങ്​ഗ (Curcuma longa) എന്ന സസ്യത്തിന്റെ ഭൂമിക്കടിയിൽ വളരുന്ന കാണ്ഡമാണ് മഞ്ഞളായി നമ്മൾ ഉപയോഗിക്കുന്നത്. ഇതിൽ കുർക്കുമിനോയിഡുകൾ (Curcuminoids) എന്നറിയപ്പെടുന്ന സംയുക്തങ്ങൾ അടങ്ങിയിട്ടുണ്ട്. മഞ്ഞളിന് സവിശേഷമായ മഞ്ഞനിറം നൽകുന്നതിൽ കുർക്കുമിന് പ്രധാന പങ്കുണ്ട്.

അതിനൊപ്പം, ശരീരത്തിൽ വീക്കം കുറയ്ക്കുന്നതുമായി ബന്ധപ്പെട്ട ചില ജൈവപ്രക്രിയകളെയും ഓക്സിഡേറ്റീവ് സമ്മർദത്തെയും സ്വാധീനിക്കാൻ കുർക്കുമിന് കഴിയുമെന്ന് പഠനങ്ങൾ സൂചിപ്പിക്കുന്നു.

ശരീരത്തിൽ ഫ്രീ റാഡിക്കലുകൾ എന്നറിയപ്പെടുന്ന അസ്ഥിര തന്മാത്രകൾ അമിതമായി ഉണ്ടാകുമ്പോൾ കോശങ്ങൾക്ക് കേടുപാടുകൾ സംഭവിക്കാം. ഇവ മൂലമുണ്ടാകുന്ന ഓക്സിഡേറ്റീവ് സമ്മർദത്തെ ചെറുക്കുന്നതുമായി ബന്ധപ്പെട്ട ആന്റിഓക്സിഡന്റ് പ്രവർത്തനങ്ങൾ കുർക്കുമിനിൽ പഠനവിധേയമായിട്ടുണ്ട്.

വീക്കം കുറയ്ക്കാൻ സഹായിക്കുമോ?

മഞ്ഞളിലെ കുർക്കുമിൻ ശരീരത്തിലെ വീക്കവുമായി ബന്ധപ്പെട്ട ചില രാസപ്രവർത്തനങ്ങളെ സ്വാധീനിക്കാമെന്നാണ് ശാസ്ത്രീയ പഠനങ്ങൾ വ്യക്തമാക്കുന്നത്. അതുകൊണ്ടു തന്നെ സന്ധിവേദന, സന്ധികളുടെ കാഠിന്യം തുടങ്ങിയ പ്രശ്നങ്ങളിൽ കുർക്കുമിൻ സപ്ലിമെന്റുകൾ സഹായകരമാണോ എന്നതിൽ പഠനം നടക്കുന്നു വരികയാണ്.

ചില പഠനങ്ങളിൽ മുട്ടുസന്ധിയിലെ ഓസ്റ്റിയോആർത്രൈറ്റിസ് മൂലമുള്ള വേദനയിലും കാഠിന്യത്തിലും നേരിയ പുരോഗതി കണ്ടെത്തിയിട്ടുണ്ട്. എന്നാൽ പഠനങ്ങളുടെ നിലവാരത്തിലും ഫലങ്ങളിലും വ്യത്യാസങ്ങളുള്ളതിനാൽ മഞ്ഞളിനെ ഒരു ചികിത്സയായി കണക്കാക്കാൻ കഴിയില്ല.

പാചകത്തിൽ മഞ്ഞൾ

ഔഷധ​ഗുണം മാത്രമല്ല, പാചകത്തിലെ പ്രധാന മസാല കൂടിയാണ് മഞ്ഞൾ. നമ്മുടെ ദൈനംദിന ഭക്ഷണത്തിൽ മഞ്ഞൾ ഇടംപിടിക്കുന്നതിന് നിരവധി കാരണങ്ങളുണ്ട്.

• കറികൾക്കും മീൻ വിഭവങ്ങൾക്കും ആകർഷകമായ മഞ്ഞനിറം നൽകാൻ സഹായിക്കുന്നു.

• മഞ്ഞളിൻ്റെ രുചി മറ്റു മസാലകളുമായി ചേരുമ്പോൾ വിഭവങ്ങളുടെ രുചി കൂട്ടുന്നു.

• കുർക്കുമിൻ ഉൾപ്പെടെയുള്ള ഘടകങ്ങൾ ഭക്ഷണത്തിലൂടെ ശരീരത്തിലെത്തുന്നു.

• പരിപ്പ്, പച്ചക്കറികൾ, മീൻകറി, ഇറച്ചിവിഭവങ്ങൾ തുടങ്ങി വിവിധ ഭക്ഷണങ്ങളിൽ മഞ്ഞൾ ഉപയോഗിക്കുന്നു.

മഞ്ഞൾ ചേർത്തതുകൊണ്ടു മാത്രം ഭക്ഷണം ആരോഗ്യകരമാകണമെന്നില്ല. ഭക്ഷണത്തിന്റെ മൊത്തത്തിലുള്ള പോഷകഗുണം, പാചകരീതി, ഉപയോഗിക്കുന്ന എണ്ണയുടെയും ഉപ്പിന്റെയും അളവ് എന്നിവയും പ്രധാനമാണ്.

കുരുമുളകിനൊപ്പം മഞ്ഞൾ കഴിച്ചാൽ ഗുണം കൂടുമോ?

മഞ്ഞളും കുരുമുളകും ഒരുമിച്ച് ഉപയോഗിക്കുന്നതിന് പിന്നിൽ ഒരു ശാസ്ത്രീയ കാരണമുണ്ട്. കുരുമുളകിലെ പൈപ്പറിൻ (Piperine) എന്ന സംയുക്തത്തിന് കുർക്കുമിൻ്റെ ശരീരത്തിലെ ആഗിരണം വർധിപ്പിക്കാൻ കഴിയും.

കുർക്കുമിൻ സ്വാഭാവികമായി ശരീരത്തിൽ മോശമായി ആഗിരണം ചെയ്യപ്പെടുകയും വേഗത്തിൽ വിഘടിക്കപ്പെടുകയും ചെയ്യുന്ന സംയുക്തമാണ്. പൈപ്പറിൻ ഉൾപ്പെടെയുള്ള ചില ഘടകങ്ങൾ ഇതിന്റെ ജൈവലഭ്യത വർധിപ്പിക്കുമെന്ന് പഠനങ്ങൾ സൂചിപ്പിക്കുന്നു.

മഞ്ഞളും എണ്ണയും

കുർക്കുമിൻ കൊഴുപ്പിൽ എളുപ്പം ലയിക്കുന്ന സ്വഭാവമുള്ള സംയുക്തമാണ്. അതുകൊണ്ട് എണ്ണയോ കൊഴുപ്പുള്ള ഭക്ഷണമോ ഉള്ള പാചകരീതികളിൽ മഞ്ഞൾ ഉപയോഗിക്കുന്നത് അതിൻ്റെ ലയനത്തെ സ്വാധീനിക്കാം. അതുപോലെ, കൂടുതൽ എണ്ണ ചേർക്കുന്നതും ആരോഗ്യത്തിന് ഗുണകരമല്ല. പതിവ് പാചകത്തിൽ ആവശ്യത്തിന് മാത്രം എണ്ണ ഉപയോഗിച്ച് മഞ്ഞൾ ചേർക്കുന്നതാണ് പ്രായോഗികമായ സമീപനം.

ചർമസംരക്ഷണത്തിൽ മഞ്ഞൾ

പരമ്പരാഗതമായി മുഖത്ത് മഞ്ഞൾ പുരട്ടുന്ന രീതിയും മഞ്ഞൾ അടങ്ങിയ സൗന്ദര്യവർധക ഉൽപന്നങ്ങളുടെ ഉപയോഗവും വ്യാപകമാണ്. എന്നാൽ മഞ്ഞൾ മുഖത്ത് പുരട്ടുന്നതിലൂടെ മുഖക്കുരു, പാടുകൾ, നിറവ്യത്യാസം എന്നിവ പൂർണമായി മാറുമെന്ന് ഉറപ്പില്ല. ചിലരിൽ ചർമത്തിൽ ചൊറിച്ചിലോ അലർജിയോ ഉണ്ടാകാം. അതുകൊണ്ട് വീട്ടിൽ തയ്യാറാക്കുന്ന മഞ്ഞൾക്കൂട്ടുകൾ ഉപയോഗിക്കുമ്പോൾ ജാഗ്രത പാലിക്കണം.

മഞ്ഞൾ ഉപയോഗിക്കുമ്പോൾ ശ്രദ്ധിക്കേണ്ട കാര്യങ്ങൾ

സാധാരണ പാചകത്തിൽ ഉപയോഗിക്കുന്ന അളവിലുള്ള മഞ്ഞൾ മിക്കവാറും ആളുകളിൽ സുരക്ഷിതമാണ്. എന്നാൽ ഭക്ഷണത്തിൽ ചേർക്കുന്ന മഞ്ഞളും ഉയർന്ന അളവിലുള്ള കുർക്കുമിൻ സപ്ലിമെന്റുകളും ഒരുപോലെയല്ല.

• അമിതമായ അളവിൽ മഞ്ഞൾ സപ്ലിമെന്റുകൾ ഉപയോഗിക്കുന്നത് വയറിലെ അസ്വസ്ഥത, നെഞ്ചെരിച്ചിൽ, ഓക്കാനം, വയറിളക്കം തുടങ്ങിയ പ്രശ്നങ്ങൾക്ക് കാരണമാകാം.

• ശരീരത്തിൽ കുർക്കുമിൻ കൂടുതൽ ആഗിരണം ചെയ്യാൻ രൂപകൽപ്പന ചെയ്ത ചില സപ്ലിമെന്റുകളുമായി ബന്ധപ്പെട്ട് കരൾ തകരാറുകൾ റിപ്പോർട്ട് ചെയ്തിട്ടുണ്ട്.

• സ്ഥിരമായി മരുന്നുകൾ കഴിക്കുന്നവർ കുർക്കുമിൻ സപ്ലിമെന്റുകൾ തുടങ്ങുന്നതിന് മുമ്പ് ഡോക്ടറുടെ ഉപദേശം തേടണം.

• ഗർഭകാലത്ത് ഭക്ഷണത്തിൽ സാധാരണ ഉപയോഗിക്കുന്ന അളവിനേക്കാൾ കൂടുതലായി മഞ്ഞൾ സപ്ലിമെന്റുകൾ ഉപയോഗിക്കുന്നത് ഒഴിവാക്കണം.