മുടി കറുപ്പിക്കാൻ വാഴക്കൂമ്പ് ഡൈ, എങ്ങനെ വീട്ടിൽ തയ്യാറാക്കാം

നാല്പതുകളുടെ അവസാനത്തിലോ അൻപതുകളുടെ അവസാനത്തിലോ പോലും നമ്മളെല്ലാവരും മനസ്സിൽ ചെറുപ്പമായിരിക്കും. ചെറുപ്പമായി തുടരാൻ ആഗ്രഹിക്കുന്നു. പ്രായമാവുന്നു എന്നത് നമ്മളാരും അംഗീകരിക്കാൻ ആഗ്രഹിക്കുന്നില്ല. അതുകൊണ്ട് ഹെയർ-ഡൈകൾ ഉപയോഗിക്കാൻ നമ്മൾ നിർബന്ധിതമാവുന്നു. പരസ്യങ്ങളിൽ കാണുന്ന പലതരം ഹെയർ-ഡൈകളിൽ മിക്കവാറും എല്ലാ ഹെയർ-ഡൈകളും റിയാക്ഷൻ ഉള്ളവയാണ്.

ചർമത്തിൽ നേരിയ ചൊറിച്ചിൽ മുതൽ കുമിളകൾ വരെ ഉണ്ടാകാം. ചിലരിൽ മുഖം മുഴുവനും കടുത്ത അലർജി ഉണ്ടാവാം. ഇത് പരിഹരിക്കാൻ ചിലപ്പോൾ ഒരു ഡെർമറ്റോളജിസ്റ്റിനെ സമീപി ക്കേണ്ടി വന്നേക്കാം. ചിലതരം ഹെയർ-ഡൈകളുടെ ദീർഘകാല ഉപയോഗം കാൻസറിന് വരെ കാരണമാവാം. പക്ഷേ, നമുക്ക് പ്രായത്തിന് കീഴടങ്ങാൻ കഴിയില്ല. പിന്നെ എന്തുചെയ്യണം? ഇതിന് പരിഹാരമാണ് ഹെർബൽ ഹെയർ ഡൈകൾ.

എന്തുകൊണ്ടാണ് മുടി നരയ്ക്കുന്നത്?

മുടിയുടെ നിറവും രൂപവും ചർമ്മത്തിൽ കാണപ്പെടുന്ന മെലനോസൈറ്റുകൾ എന്നറിയപ്പെടുന്ന ചില കോശങ്ങളുമായി ബന്ധപ്പെട്ടിരിക്കുന്നു. ഇത് 'മെലാനിൻ' എന്ന വർണവസ്തുവിനെ ഉത്പാദിപ്പിക്കുന്നു. 'മെലാനിൻ ആവശ്യത്തിന് ഉത്പാദിപ്പിക്കാൻ കഴിയാതെ വരുമ്പോൾ മുടി നരയ്ക്കുന്നു. പ്രായം കൂടുന്നതിനനുസരിച്ച് മുടി നരയ്ക്കുന്നു.

എന്നിരുന്നാലും. ആധുനിക ലോകത്ത്, യുവതലമുറയിൽ പോലും മുടി നരയ്ക്കുന്നത് വളരെ സാധാരണമാണ്. അപകടകരമായ ചിലതരം മരുന്നുകൾ. സൗന്ദര്യവർദ്ധകവസ്തുക്കൾ. ഷാംപുകൾ. ഹെയർ കണ്ടീഷണറുകൾ എന്നിവയുടെ അമിത ഉപയോഗം എന്നിവ അകാലനരയ്ക്ക് കാരണമാവാം. പോഷകാഹാരക്കുറവ്, മാറിയ ഭക്ഷണശീലങ്ങൾ, ടെൻഷൻ ഉള്ള ഓഫീസ് അന്തരീക്ഷം എന്നിവ മൂലവും ഇത് സംഭവിക്കാം. ചില ജനിതക വൈകല്യങ്ങളും മുടി വേഗത്തിൽ നരയ്ക്കുന്നതിന് കാരണമാകും. ലോകാരോഗ്യ സംഘടനയുടെ അഭിപ്രായത്തിൽ. 25-30 വയസ്സിനിടയിലുള്ള വരിലാണ് അകാലനര ഏറ്റവും സാധാരണമായത്.

ആയുർവേദത്തിൽ മുടി നരയ്ക്കുന്നതിനെ കുറിച്ച് ഇങ്ങനെ പറയുന്നു

ആയുർവേദത്തിൽ മുടി നരയ്ക്കുന്നതിനെ 'പാല്യ' എന്ന് വിളിക്കുന്നു. ഇത് ഒരുതരം 'ക്ഷുദ്രരോഗ'മായി കണക്കാക്കപ്പെടുന്നു. ആയുർവേദം അനുസരിച്ച്. നരച്ച മുടി രണ്ട് തരത്തിലുണ്ട്. അകാലപാല്യ (അകാലനര), കാലപാല്യ (പ്രായം കൂടുമ്പോഴുള്ള നര). പിത്തദോഷത്തിന്റെ അമിതമായ ഉഷ്ണഗുണം മൂലമാണ് അകാലനര പ്രധാനമായും ഉണ്ടാകുന്നത്. 'അഷ്ടാംഗഹൃദയ മനുസരിച്ച്, ത്രിദോഷങ്ങളുടെ ആധിപത്യം കാരണമാണ് മുടി നരയ്ക്കുന്നത്.

ഇത് പിത്തദോഷത്തിലേക്ക് നയിക്കുന്നു. ക്ഷയിച്ച പിത്തദോഷം രോമകൂപങ്ങളിൽ കഫദോഷം തങ്ങുന്നതിന് കാരണമാവുന്നു. ഇത് അകാലനരയിലേക്ക് നയിക്കുന്നു. വാർദ്ധക്യം അടുക്കുന്നതിന്റെ ഒരു സ്വാഭാവിക ലക്ഷണമായും ഇത് വരാം. എന്നാൽ ഇതിന്റെ വേഗം നിയന്ത്രിക്കാനുള്ള മരുന്നുകൾ ആയുർവേദത്തിൽ ഉണ്ട്.

മുടി നരയ്ക്കുന്നത് എങ്ങനെ പരിഹരിക്കാം?

ആയുർവേദത്തിൽ മുടി കറുപ്പിക്കുന്നത് (നിറം നൽകുന്നത്) 'കേസരഞ്ജനം' എന്നാണറിയപ്പെടുന്നത്. മുടിയുടെ അകാല നരയ്ക്കലിന് ചികിത്സ നൽകുന്ന പ്രക്രിയയാണ് ഇത്. മരുന്നുകളും പോഷക സപ്ലിമെന്റുകളും ഇതിൽ ഒരു പ്രധാന പങ്ക് വഹിക്കുന്നു. ആയുർവേദഗ്രന്ഥങ്ങളിൽ മുടി കറുപ്പിക്കുന്നതിന് ചില പ്രത്യേക ഔഷധക്കൂട്ടുകൾ പരാമർശിച്ചിട്ടുണ്ട്.

'കേസരഞ്ജന'ത്തെ ഒരു നീണ്ട പ്രക്രിയയാണ് ആയുർവേദം കാണുന്നത്. ആവശ്യമുള്ള ഫലം ലഭിക്കാൻ രണ്ട് ദിവസം മുതൽ നിരവധി മാസങ്ങൾ വരെ എടുത്തേക്കാം. ആവണക്ക് മോർഡൻ്റ്' (നിറം ശരിയാക്കാനുള്ള ഏജൻറ്) ആയും കടുക്ക, താന്നിക്ക, നെല്ലിക്ക, കയ്യുന്നി, നീലയമാരി, മൈലാഞ്ചി, അക്രോട്ട് (വാൾനട്ട്), പതിമുഖം, ഉരുവഞ്ചി, ഷിക്കക്കായ്, കരിഞ്ചീരകം എന്നിവ മുടിക്ക് ആഴത്തിലുള്ള സ്വാഭാവിക ഇരുണ്ട നിറം നൽകുന്നതിനായി ഉപയോഗിക്കുന്നു.

മുടി കറുപ്പിക്കാൻ വാഴക്കൂമ്പ് ഡൈ

വാഴക്കൂമ്പ് ഉപയോഗിച്ചുണ്ടാക്കുന്ന ഹെർബൽ ഹെയർ ഡൈ മറ്റ് കെമിക്കൽ ഡൈകളെ അപേക്ഷിച്ച് മറ്റ് പാർശ്വഫലങ്ങൾ ഉണ്ടാകില്ല മാത്രമല്ല ഫലപ്രദവുമാണ്. എല്ലാത്തരം വാഴയിനങ്ങളും അനുയോജ്യമാണെങ്കിലും കല്ലുവാഴ അല്ലെങ്കിൽ കാട്ടുവാഴ (മൂസ ബാൽബിസിയാന) എന്നിവയാണ് ഏറ്റവും അനുയോജ്യം.

പുരുഷന്മാരിലും സ്ത്രീകളിലും അകാലനരയെ ചികിത്സിക്കാനും വാർദ്ധക്യം മൂലം മുടിയുടെ നിറവ്യത്യാസം മാറ്റാനും വാഴക്കുമ്പിന് കഴിയും. വാഴക്കുമ്പിന്റെ ദളങ്ങളിൽ ഉള്ള ആന്തോസയാനിൻ എന്ന വർണവസ്തു ആണ് ഇത്തരത്തിൽ നിറം പകരുന്നത്. ഇളം തവിട്ടു മുതൽ കറുപ്പ് നിറം വരെ മുടിക്ക് നൽകാൻ ഇതിനു കഴിയും. കരിഞ്ചീരകം. നീലയമാരി, കയ്യുണി. ഉറുവാഞ്ചി, നെല്ലിക്ക, ഷിക്കക്കായ്. ചെമ്പരത്തിപ്പൂ എന്നിവ ചേർത്ത് നിറം പിടിപ്പിക്കലിന്റെ മേന്മ വർധിപ്പിക്കാൻ കഴിയും.

ലളിതമായി വീട്ടിലുള്ള ചേരുവകൾ കൊണ്ട് വാഴക്കൂമ്പ് ഹെയർ ഡൈ ഉണ്ടാക്കാം

ആവശ്യമായ ചേരുവകൾ

• വാഴകൂമ്പിന്റെ ഇതളുകൾ

• നാരങ്ങ

• മൈലാഞ്ചി‌‌ പൊടി

• കറ്റാർ വാഴ ജെൽ

ഏകദേശം 5-8 വാഴക്കൂമ്പുകളുടെ ഇതളുകൾ പൊളിച്ചെടുക്കുക. നന്നായി കഴുകിയ ശേഷം ചെറുതായി അരിഞ്ഞെടുക്കാം. ഇത് ഒരു മിക്സകിലിട്ട് ആവശ്യത്തിന് വെള്ളം ചേർത്ത് പേസ്റ്റ് രൂപത്തിലാക്കുക. ഇതിനൊപ്പം രണ്ട് ടേബിൾസ്പൂൺ മൈലാഞ്ചി പൊടിയും മൂന്നോ നാലോ നാരങ്ങ പിഴിഞ്ഞ നീരും ചേർക്കുക. ഇത് ഒരു ഫ്രൈയിങ് പാനിലേക്ക് ഒഴിച്ച് ചെറുതീയിൽ തുടർച്ചയായി ഇളക്കി ചൂടാക്കിയെടുക്കുക. ഇത് കറുത്ത് ഒരു സെമി സോളിഡ് രൂപത്തിലെത്തുന്ന വരെ ഇതു തുടരുക. ശേഷം വെയിലിൽ ഉണക്കി വായു കടക്കാത്ത ​ചില്ലു കുപ്പിൽ സൂക്ഷിച്ചു വയ്ക്കാം.

ഉപയോ​ഗിക്കുന്നതിന് മുൻപ് ഇതിൽ നിന്ന് അൽപഭാ​ഗമെടുത്ത് കറ്റാർവാഴ ജെല്ലിനൊപ്പം ചേർത്ത് മുടിയിൽ പുരട്ടാം. 30 മിനിറ്റ് ശേഷം കഴുകി കളയാം. മാർക്കറ്റിൽ നിന്ന് വാങ്ങുന്ന കെമിക്കൻ ഹെയർ ഡൈകളെക്കാൾ ഇരട്ടി ഫലപ്രദമാണെന്ന് വിദ​ഗ്ധർ പറയുന്നു. 25 തവണ കഴുകിയ ശേഷവും 50 ദിവസം വരെ മുടിയുടെ കറുപ്പ് നിറം നീണ്ടു നിന്നതായി കണ്ടെത്തിയിട്ടുണ്ട്.

10-20-ൽ കൂടുതൽ വാഴപ്പഴങ്ങൾ ഉപയോഗിച്ചാൽ, തത്ഫലമായുണ്ടാകുന്ന കറുത്ത മിശ്രിതം വെയിലത്ത് ഉണക്കിയ ശേഷം മിക്സർ-ഗ്രൈൻഡർ ഉപയോഗിച്ച് പൊടിക്കാം.