വീട്ടിൽ ചെരുപ്പ് ധരിക്കുന്ന ശീലം കാലിന് നല്ലതാണോ?

വീടിന്റെ ഉള്ളിൽ ചെരുപ്പ് ധരിക്കുന്നവരാണോ നിങ്ങൾ? ഈ ശീലം ആരോ​ഗ്യകരമല്ലെന്ന് ചില വാദങ്ങൾ പലപ്പോഴും ഉയരാറുണ്ട്. ന​ഗ്നപാദങ്ങൾ തറയിൽ തൊടുമ്പോൾ ശരീരത്തിലെ നിരവധി ചെറിയ പേശികൾക്കും സന്ധികൾക്കും സ്വാഭാവികമായി പ്രവർത്തിക്കാൻ അവസരം ലഭിക്കും. തറയുടെ സ്പർശം കാലിലൂടെ നേരിട്ട് അനുഭവപ്പെടുന്നതിനാൽ ശരീരത്തിന്റെ ബാലൻസിനും കാലിന്റെ ചലനത്തിനും ഇത് സഹായകരമായേക്കാം. എന്നാൽ വീട്ടിനുള്ളിൽ എല്ലായ്പ്പോഴും നഗ്നപാദങ്ങളായി നടക്കണമെന്നത് നിർബന്ധമല്ല.

ആരോ​ഗ്യ വാർത്തകൾ കൂടുതൽ അറിയാൻ വാട്സാപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

ചിലർക്ക് വീട്ടിൽ ചെരുപ്പ് ധരിച്ച് നടക്കുന്നത് കാലുകൾക്ക് കൂടുതൽ ആശ്വാസവും സംരക്ഷണവും നൽകാം. വ്യക്തിയുടെ ആരോ​ഗ്യം, ശുചിത്വം, പ്രായം, ചെയ്യുന്ന ജോലി വീട്ടിലെ തറ ഏത് തരത്തിലാണെന്നൊക്കെ പരി​ഗണിച്ച് ഇതിൽ മാറ്റം വരാം. വീട്ടിനുള്ളിൽ വൃത്തിയുള്ളതും സുരക്ഷിതവുമായ തറയാണെങ്കിൽ കുറച്ചുസമയം നഗ്നപാദങ്ങളായി നടക്കുന്നത് സാധാരണയായി പ്രശ്നമല്ല.

പ്രത്യേകിച്ച് ഇരുന്ന് ജോലി ചെയ്യുന്നവർക്ക് വീട്ടിനുള്ളിൽ കുറച്ചുസമയം നടക്കുന്നത് ശാരീരിക പ്രവർത്തനത്തിന്റെ ഭാഗമാകാം. എന്നാൽ നഗ്നപാദമായി നടക്കുന്നതിന് എല്ലാവർക്കും ഒരേ രീതിയിലുള്ള ഗുണം ലഭിക്കണമെന്നില്ല.

വീട്ടിൽ ചെരുപ്പ് ധരിക്കുന്നത് ദോഷകരമായ ഒരു കാര്യമല്ല. എന്നാൽ ഏത് തരത്തിലുള്ള ചെരുപ്പാണ് ഉപയോഗിക്കുന്നത് എന്നതാണ് പ്രധാനമാണ്. വീട്ടിനുള്ളിൽ ഉപയോഗിക്കുന്ന ചെരുപ്പ് വളരെ കട്ടിയുള്ളതോ, ഇടുങ്ങിയതോ, കാലിന്റെ ആകൃതിക്ക് അനുയോജ്യമല്ലാത്തതോ ആണെങ്കിൽ ദീർഘനേരം ഉപയോഗിക്കുമ്പോൾ അസ്വസ്ഥത ഉണ്ടാകാം.

വീട്ടിനുള്ളിൽ ധരിക്കാൻ ചെരുപ്പ് തിരഞ്ഞെടുക്കുമ്പോൾ

• കാലിന് ശരിയായ വലുപ്പത്തിലുള്ളതായിരിക്കണം

• വിരലുകൾക്ക് ആവശ്യമായ ഇടം നൽകണം

• ആവശ്യത്തിന് ​ഗ്രിപ്പ് ഉണ്ടാവണം

• ഹീൽ ഒഴിവാക്കണം

• കാലിന് ആവശ്യമായ പിന്തുണ നൽകണം

• അമിതമായി മുറുക്കമുള്ളതോ അയഞ്ഞതോ ആകരുത്

പ്രായമായവർ, കാലിൽ വേദന ഉള്ളവർ, സെൻസിറ്റീവ് ആയ ചർമ ഉള്ളവർ എന്നിവരൊക്കെ വീടിനുള്ളിൽ ചെരുപ്പിടുന്നത് നല്ലതാണ്. അഴുക്കുള്ളതോ ഈർപ്പമുള്ളതോ ആയ സ്ഥലത്ത് നഗ്നപാദമായി നടക്കുന്നതും ഒഴിവാക്കുന്നതാണ് നല്ലത്. കാലിൽ ചെറിയ മുറിവുകളുണ്ടെങ്കിൽ ശുചിത്വത്തിന് കൂടുതൽ പ്രാധാന്യം നൽകണം. എപ്പോഴും കാല‍ിൽ ചെരുപ്പ് ധരിച്ചുവെന്ന് പറഞ്ഞ് പേശികൾ ദുർബലമാകുമെന്നതിന് മതിയായ തെളിവുകളില്ലെന്ന് വിദഗ്ധർ പറയുന്നു.

വീട്ടിൽ ചെരുപ്പ് ധരിക്കുമ്പോൾ ശുചിത്വവും പ്രധാനമാണ്

വീട്ടിനുള്ളിൽ ഉപയോഗിക്കുന്ന ചെരുപ്പ് പുറത്ത് ഉപയോഗിച്ചാൽ ചെളി, പൊടി, മറ്റു മലിന വസ്തുക്കൾ എന്നിവ വീട്ടിലേക്ക് കൊണ്ടുവരാൻ സാധ്യതയുണ്ട്. അതുകൊണ്ട്, പുറത്തുപോകാൻ ഉപയോഗിക്കുന്ന ചെരുപ്പും വീട്ടിനുള്ളിൽ ഉപയോഗിക്കുന്ന ചെരുപ്പും വേർതിരിക്കുന്നത് നല്ല ശീലമാണ്. വീടിനുള്ളിൽ ഉപയോ​ഗിക്കുന്ന ചെരുപ്പ് ഇടയ്ക്കിടെ കഴുകുകയും ഉണക്കുകയും വേണം.

പ്രമേഹമുള്ള ചിലരിൽ കാലിലെ നാഡികളുടെ സംവേദനശേഷി കുറയാം. അത്തരം സാഹചര്യങ്ങളിൽ ചെറിയ മുറിവോ പൊള്ളലോ പോലും ഉടൻ തിരിച്ചറിയാതെ പോകാൻ സാധ്യതയുണ്ട്. അതുകൊണ്ട് ഇക്കൂട്ട‍ർ വീടിനുള്ളിൽ ചെരുപ്പ് ധരിക്കുന്നതാണ് ഏറെ നല്ലത്.