ച്യൂയിങ് ​ഗം വിഴുങ്ങിയാൽ വയറ്റിൽ ഒട്ടിപ്പിടിക്കുമോ?

ച്യൂയിങ് ​ഗം വിഴുങ്ങിയാൽ എന്ത് സംഭവിക്കും? മിക്കയാളുകളുടെയും സംശയാണിത്. ഇവ കാലങ്ങളോളം ദഹിക്കാതെ വയറ്റിൽ ഒട്ടിപ്പിടിച്ചിരിക്കുമെന്നൊക്കെയാണ് കഥകൾ. എന്നാൽ സംഭവം അങ്ങനെയല്ല.

വായിൽ രുചി നിറയ്ക്കുന്ന വെറുമൊരു റബ്ബർക്കഷണം മാത്രമല്ല ച്യൂയിങ് ​ഗമ്മുകൾ. ഇവ പലതരം രാസപദാർഥങ്ങൾ ചേരുന്നതാണ്. പോളിഐസോബ്യൂട്ടിലിൻ, പോളിവിനൈൽ അസറ്റേറ്റ് തുടങ്ങിയ പോളിമറുകൾകൊണ്ടാണ് ച്യൂയിംങ് ഗം ഉണ്ടാക്കുന്നത്. ഈ പോളിമറിനെ ഫ്ളെക്സിബിളാക്കുന്നത് പ്ലാസ്റ്റിസൈസറുകളാണ്. റെസിനുകൾ രൂപവും ഘടനയും കൊടുക്കുന്നു. മധുരത്തിന് പഞ്ചസാരയോ ഷുഗർ ആൽക്കഹോളുകളോ ആണ് ചേർക്കുക.

പലതരം ഫ്ലേവറുകൾക്കായി വിവിധ രാസപദാർഥങ്ങളും ഉപയോഗിക്കുന്നുണ്ട്. ഇത് വായിൽ ഉമിനീർ ഉൽപാദനം വർധിപ്പിക്കാൻ സഹായിക്കും. ച്യൂയിങ് ​ഗം വിഴുങ്ങാൻ പാടില്ല. ഇനി അബദ്ധത്തിൽ വിഴുങ്ങിയെന്നിരിക്കട്ടെ,

വയറ്റിലെത്തിയാൽ പോളിമറൊഴികെയുള്ള ഭാഗങ്ങളെല്ലാം ദഹിച്ച് ശരീരത്തിൽ ചേരും. പോളിമർ ദഹിക്കാത്ത മറ്റ് വസ്തുക്കൾ പോലെ പുറന്തള്ളപ്പെടുകയും ചെയ്യും. എന്നു കരുതി എപ്പോഴും ച്യൂയിംങ് ഗം വിഴുങ്ങിയാൽ അത് ദഹനവ്യവസ്ഥയിൽ തടസ്സമുണ്ടാക്കുകയും ചെയ്യും.

കുട്ടികളാണ് ച്യൂയിങ് ഗം വിഴുങ്ങുന്നതെങ്കിൽ കൂടുതൽ ശ്രദ്ധ ആവശ്യമാണ്. കാരണം അവർക്ക് ദഹനനാളത്തിൽ തടസ്സങ്ങൾ ഉണ്ടാകാനുള്ള സാധ്യതയുണ്ട്. വിഴുങ്ങിയ ച്യൂയിങ് ഗം തൊണ്ടയില്‍ കുടുങ്ങിയാല്‍ മാത്രമേ അപകട സാധ്യതകളെ പറ്റി ഭയക്കേണ്ടതുള്ളൂ.