ജോഹന്നാസ്ബര്‍ഗ്: ക്രിക്കറ്റിന്റെ എല്ലാ ഫോര്‍മാറ്റില്‍ നിന്നും വിരമിച്ച് എബി ഡി വില്ലിയേഴ്‌സ്. ട്വിറ്ററില്‍ വീഡിയോ പങ്കുവെച്ചാണ് വിരമിക്കല്‍ പ്രഖ്യാപനം ഡിവില്ലിയേഴ്‌സ് ആരാധകരെ അറിയിച്ചത്.
നേരത്തെ രാജ്യാന്തര മത്സരങ്ങളില്‍ നിന്ന് വിരമിച്ച ഡി വില്ലിയേഴ്‌സ് ലോകത്തിന്റെ പല ഭാഗങ്ങളില്‍ ലീഗ് മത്സരങ്ങള്‍ കളിച്ചിരുന്നു. എന്നാല്‍ വരുന്ന ഐപിഎല്‍ സീസണില്‍ ഉള്‍പ്പെടെ ഇനി ഡിവില്ലിയേഴ്‌സിന്റെ 360 ഡിഗ്രി ബാറ്റിങ് കാണാനാവില്ല.
ഇതൊരു അതിശയിപ്പിക്കുന്ന യാത്രയായിരുന്നു. എന്നാല്‍ ഇപ്പോള്‍ എല്ലാ ഫോര്‍മാറ്റില്‍ നിന്നും വിരമിക്കാന്‍ ഞാന്‍ തീരുമാനിക്കുകയാണ്. വീട്ടുമുറ്റത്ത് സഹോദരങ്ങള്‍ക്കൊപ്പം തുടങ്ങിയത് മുതല്‍ ആസ്വദിച്ചാണ അനിയന്ത്രിതമായ ആവേശത്തോടെ ഞാന്‍ ക്രിക്കറ്റ് കളിച്ചത്. ഇപ്പോള്‍ 37ാമത്തെ വയസില്‍ എന്റെ ഉള്ളിലെ ആ തീയ്ക്ക് അത്ര ശോഭയില്ല, വിരമിക്കല്‍ പ്രഖ്യാപനം അറിയിച്ച് ഡിവില്ലിയേഴ്‌സ് പറഞ്ഞു.
10 സീസണുകള്‍ നീണ്ട റോയല്‍ ചലഞ്ചേഴ്‌സ് ബാംഗ്ലൂരുമായുള്ള ബന്ധമാണ് ഡിവില്ലിയേഴ്‌സ് അവസാനിപ്പിക്കുന്നത്. വിരമിക്കല്‍ തീരുമാനത്തിലേക്ക് എത്താന്‍ ഒരുപാട് സമയം എടുത്തു. എന്നാല്‍ കുടുംബത്തിനൊപ്പം സമയം ചിലവിടാനാണ് ഞാന്‍ ആഗ്രഹിക്കുന്നത്. ആര്‍സിബി മാനേജ്‌മെന്റിനും എന്റെ സുഹൃത്ത് വിരാട് കോഹ് ലിക്കും സഹതാരങ്ങള്‍ക്കുമെല്ലാം നന്ദി പറയുന്നു എന്നും ഡിവില്ലിയേഴ്‌സ് പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
