ന്യൂഡല്‍ഹി: ഇന്ത്യന്‍ ക്രിക്കറ്റ് താരങ്ങളായ വിരാട് കോഹ് ലിയും രോഹിത് ശര്‍മയും വിരമിക്കാന്‍ തീരുമാനിച്ചാലും ആ വിടവ് നികത്താന്‍ കെല്‍പ്പുള്ള ധാരാളം യുവതാരങ്ങള്‍ ഇന്ത്യന്‍ ക്രിക്കറ്റിന് ഉണ്ടെന്ന് മുന്‍ ഓസ്‌ട്രേലിയന്‍ താരം ഡാരന്‍ ലേമാന്‍. ടെസ്റ്റ് ക്രിക്കറ്റില്‍ സമീപകാലത്തെ ഏറ്റവും മോശം ഫോമിലൂടെയാണ് ഇരു താരങ്ങളും കടന്നുപോകുന്നത്. 2024ല്‍ 14 മത്സരങ്ങളില്‍ നിന്ന് 24.76 ശരാശരിയില്‍ 619 റണ്‍സാണ് രോഹിത് നേടിയത്. ഇതില്‍ രണ്ട് സെഞ്ച്വറികളും ചുരുക്കം ചില അര്‍ധ സെഞ്ച്വറികളും ഉള്‍പ്പെടുന്നു.
കോഹ് ലി 10 മത്സരങ്ങളിലെ 19 ഇന്നിംഗ്‌സുകളില്‍ നിന്നായി 417 റണ്‍സ് മാത്രമാണ് നേടിയത്. 24.52 ആണ് ശരാശരി. ഒരു സെഞ്ച്വറി മാത്രമാണ് കോഹ് ലിയുടെ അക്കൗണ്ടിലുള്ളത്. സമീപകാലത്തെ മോശം ഫോമിനെ തുടര്‍ന്ന് ഇരുവര്‍ക്കും നേരെയുള്ള വിമര്‍ശനം ശക്തമാകുകയാണ്. ഇരുവരും വിരമിക്കുന്നതാണ് നല്ലത് എന്ന തരത്തിലും സോഷ്യല്‍മീഡിയയില്‍ കമന്റുകള്‍ നിറയുന്നുണ്ട്. ഈ പശ്ചാത്തലത്തിലാണ് ഡാരന്‍ ലേമാന്റെ പ്രസ്താവന.
'ഇരുവരും വിരമിക്കാന്‍ തീരുമാനിച്ച ശേഷം അടുത്ത കുറച്ച് ദിവസങ്ങളില്‍ എന്ത് സംഭവിച്ചാലും അവര്‍ വളരെക്കാലം മികച്ച കളിക്കാര്‍ തന്നെയായിരിക്കും. യുവതാരങ്ങള്‍ ഇന്ത്യക്ക് വേണ്ടി കളിക്കാന്‍ തയ്യാറെടുത്ത് നില്‍ക്കുകയാണ്. അടുത്ത തലത്തില്‍ നന്നായി കളിക്കണമെന്ന ലക്ഷ്യത്തോടെയാണ് യുവതാരങ്ങള്‍. അത്രയും ആഴമുണ്ട് ഇന്ത്യന്‍ ക്രിക്കറ്റിന്. അതുകൊണ്ട് കോഹ് ലിയും രോഹിത്തും വിരമിച്ചാലും എനിക്ക് ആശങ്കയില്ല. ഇരുവരും രാജിവെച്ചാലും ആ വിടവ് നികത്താന്‍ കെല്‍പ്പുള്ള കഴിവുള്ള യുവതാരങ്ങള്‍ നിരവധിയുണ്ട് ഇന്ത്യന്‍ ക്രിക്കറ്റില്‍'-ഡാരന്‍ ലേമാന്‍ പറഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
