ഗവര്ണറുടെ കാരണം കാണിക്കല് നോട്ടീസ്: വിസിമാര് നല്കിയ ഹര്ജി ഇന്ന് ഹൈക്കോടതിയില്
കൊച്ചി: ഗവര്ണറുടെ കാരണം കാണിക്കല് നോട്ടീസ് ചോദ്യം ചെയ്ത് സര്വകലാശാല വിസിമാര് നല്കിയ ഹര്ജി ഹൈക്കോടതി ഇന്ന് പരിഗണിക്കും. ഗവര്ണറുടെ നടപടി ചട്ടവിരുദ്ധമാണെന്നും, നോട്ടീസിന്റെ നിയമസാധുത പരിശോധിക്കണമെന്നുമാണ് വൈസ് ചാന്സലര്മാര് ഹര്ജിയില് ആവശ്യപ്പെടുന്നത്. നോട്ടീസ് റദ്ദാക്കണമെന്നും വിസിമാര് ആവശ്യപ്പെടുന്നു.
നേരത്തെ കേസ് പരിഗണിച്ചപ്പോള്, ഹര്ജികളില് അന്തിമ തീര്പ്പുണ്ടാകും വരെ കാരണം കാണിക്കല് നോട്ടീസിന്മേല് തുടര്നടപടി എടുക്കരുതെന്ന് ഇടക്കാല ഉത്തരവിലൂടെ ഹൈക്കോടതി ഗവര്ണര്ക്ക് നിര്ദേശം നല്കിയിരുന്നു. നോട്ടീസില് മറുപടി നല്കണമോ വേണ്ടയോ എന്ന് വിസിമാര്ക്ക് തീരുമാനിക്കാമെന്നും കോടതി വ്യക്തമാക്കിയിരുന്നു.
അതേസമയം വിസിയായി തുടരണമെങ്കില് ചാന്സലറുടെ നിര്ദേശങ്ങള് അനുസരിക്കേണ്ടി വരുമെന്നും കോടതി പരാമര്ശം നടത്തിയിരുന്നു. എന്നാല് വൈസ് ചാന്സലര്മാരുടെ പട്ടിക തയാറാക്കിയത് യുജിസി മാനദണ്ഡങ്ങള്ക്ക് വിരുദ്ധമാണെന്നും, പലര്ക്കും വേണ്ടത്ര യോഗ്യതയില്ലെന്ന് പിന്നീട് ബോധ്യപ്പെട്ടതോടെയാണ് രാജിവക്കാന് ആവശ്യപ്പെട്ടതെന്നുമാണ് ഗവര്ണറുടെ നിലപാട്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
