തുണിയിൽ ചായക്കറ പുരണ്ടോ? വീട്ടിൽ തന്നെയുണ്ട് മാർ​ഗം

വസ്ത്രങ്ങളിൽ പറ്റിയ ചായക്കറ നീക്കം ചെയ്യുക അത്ര എളുപ്പമുള്ള കാര്യമല്ല. പുതിയ വസ്ത്രങ്ങൾ പോലും ഇതിന്റെ പേരിൽ മാറ്റിവയ്ക്കേണ്ടി വരും. എന്നാൽ വീട്ടിൽ തന്നെ ലഭിക്കുന്ന ചില വസ്തുക്കൾ ഉപയോ​ഗിച്ച് വളരെ എളുപ്പത്തിൽ വസ്ത്രത്തിൽ നിന്ന് ചായക്കറ ഒഴിവാക്കാം.

ചായക്കറ പുരണ്ട വസ്ത്രങ്ങൾ കഴുകുമ്പോൾ

• ചായക്കറ നീക്കം ചെയ്യാൻ വസ്ത്രങ്ങൾ അമിതമായി ഉരയ്ക്കരുത്. വെള്ളം വലിച്ചെടുക്കുന്ന തരം തുണിയോ ടിഷ്യൂ പേപ്പറോ ഉപയോഗിച്ച് കറ വീണ ഭാഗത്ത് അമർത്തി കറ വലിച്ചെടുക്കാം.

• അൽപം വിനാഗിരിയും തണുത്ത വെള്ളവും 1:3 എന്ന അനുപാതത്തിൽ കലർത്തുക. തുണിയിലെ കറയുള്ള ഭാഗം പത്തോ പതിനഞ്ചോ മിനിറ്റ് ഇതിൽ മുക്കി വയ്ക്കാം. നിറം ഇളകി പോകുന്ന തുണിയിൽ പാച്ച് ടെസ്റ്റ് ചെയ്തശേഷം ഈ മാർഗം പിന്തുടരുക. കറ ഇളകിയ ശേഷം വെള്ളത്തിൽ കഴുകിയാൽ മതിയാകും.

• നാരങ്ങയിലെ സ്വാഭാവിക ബ്ലീച്ചിങ് ഏജന്റും ഉപ്പിന്റെ ഗുണങ്ങളും കറ നീക്കം ചെയ്യാൻ നല്ലതാണ്. കറയുള്ള ഭാഗത്ത് അൽപം ഉപ്പുപൊടി വിതറിയ ശേഷം നാരങ്ങാനീര് പിഴിഞ്ഞ് കറയിൽ ഉരയ്ക്കുക. അരമണിക്കൂറിനു ശേഷം തണുത്ത വെള്ളത്തിൽ കഴുകിയെടുക്കാം. ഇളം നിറത്തിലുള്ള ലിനൻ - കോട്ടൻ തുണിത്തരങ്ങൾക്ക് ഇത് നല്ലതാണ്. എന്നാൽ കടുംനിറങ്ങളിൽ ഈ മാർഗം ഒഴിവാക്കുന്നതാണ് നല്ലത്.

വസ്ത്രം അറിഞ്ഞ് കറ നീക്കാം

കോട്ടൻ, ലിനൻ തുണിത്തരങ്ങൾ : ബേക്കിങ് സോഡ വെള്ളത്തിൽ ചേർത്ത് പേസ്റ്റ് രൂപത്തിലാക്കുക. ഇത് കറയിൽ പുരട്ടി 15 മിനിറ്റ് വയ്ക്കുക. ശേഷം ചെറുചൂടു വെള്ളത്തിൽ ഡിറ്റർജന്റ് ഉപയോഗിച്ച് കഴുകിയെടുക്കാം.

പട്ട് പോലെയുള്ള മൃദുവായ തുണിത്തരങ്ങൾ : ചെറുചൂടുവെള്ളത്തിൽ മുക്കിയെടുക്കുക. ശേഷം പട്ടിനായി മാത്രം നിർമിച്ചിരിക്കുന്ന ഡിറ്റർജെന്റോ ബേബി ഷാംപൂവോ കറയിൽ പുരട്ടാം. ശേഷം സാധാരണ വെള്ളത്തിൽ കഴുകിയെടുക്കണം. കറ നീക്കം ചെയ്യുന്നതിന് വേണ്ടി തുണിയിൽ അമർത്തി ഉരസരുത്. കഠിനമായ കറയാണ് പിടിച്ചിരിക്കുന്നതെങ്കിൽ പ്രൊഫഷനൽ ഡ്രൈ ക്ലീനിങ്ങാണ് പരിഹാരം.

പോളിസ്റ്റർ - നൈലോൺ സിന്തറ്റിക് തുണിത്തരങ്ങൾ : ലിക്വിഡ് ഡിറ്റർജന്റ് അല്ലെങ്കിൽ ഇത്തരം തുണിത്തരങ്ങൾക്കായി ഉള്ള ക്ലീനർ ഉപയോഗിച്ച് കഴുകിയെടുക്കുക. ശേഷം ഫാബ്രിക് സോഫ്റ്റ്നർ ഉപയോഗിക്കുക.