ഈ കൊതിയൂറുന്ന ചിത്രങ്ങള്‍ ഭക്ഷണത്തെക്കുറിച്ചുള്ളതല്ല; പ്രീ വെഡിങ് ഷൂട്ടാണെന്ന് പറഞ്ഞാല്‍ വിശ്വസിക്കുമോ???...

ഓരോരുത്തരും തങ്ങളുടെ വിവാഹം അനുസ്മരണീയമായ ഒന്നാക്കി മാറ്റണമെന്നാണ് ആഗ്രഹിക്കുന്നത്. വിവാഹവുമായി ബന്ധപ്പെട്ട മനോഹര നിമിഷങ്ങള്‍ ആളുകള്‍ വീഡിയോ എടുത്തും ഫോട്ടോ എടുത്തുമെല്ലാം സൂക്ഷിക്കുക പതിവാണ്. സോഷ്യല്‍ മീഡിയയുടെ കടന്നുവരവോടെ ഇന്ന് ഇത്തരം വീഡിയോകളും ചിത്രങ്ങളും ഇന്‍സ്റ്റഗ്രാമിലും ഫേസ്ബുക്കിലും ട്വിറ്ററിലുമൊക്കെ പങ്കുവയ്ക്കുന്നതും ട്രെന്‍ഡാണ്. 

അതുപോലെ വിവാഹത്തിന് മുന്‍പെടുത്ത ഒരു പ്രീവെഡിങ് ഷൂട്ടിന്റെ ദൃശ്യങ്ങള്‍ ഇവിടെ വയറലായിരിക്കുകയാണ്. സാധാരണ പ്രത്യേകതരം വേഷവിധാനത്തിന്റെ പേരിലോ ലൊക്കേഷന്റെ പേരിലോ ഒക്കെയാണ് ഓരോ വിഡിയോയും വൈറലാവാറുള്ളത്. ഇവിടെ പക്ഷേ ഇതുവരെ ആരും പരീക്ഷക്കാത്തൊരു തീമാണ് ഭാവിയിലെ സഹയാത്രികരാകാന്‍ പോകുന്ന ഈ ചെറുപ്പക്കാര്‍ തിരഞ്ഞെടുത്തിരിക്കുന്നത്.

ഈ വെഡിങ് ഷൂട്ട് കണ്ടാല്‍ ഏതെങ്കിലും ഫുഡ് ആപിന്റെ പരസ്യം ആണെന്നേ ആദ്യം തോന്നൂ.. വ്യത്യസ്തമായ റസ്റ്ററന്റുകളില്‍ നിന്ന് വ്യത്യസ്തമായ ഭക്ഷണങ്ങള്‍ ഇരുവരും ചേര്‍ന്ന് ആസ്വദിച്ച് കഴിക്കുകയാണ്. ഡെല്‍ഹിക്കാരായ ഹരീന്ദര്‍ സിങ് പെഹ്ലിയും റിതിക മേത്തയും ആഹാരപ്രേമികളായതുകൊണ്ടായിരിക്കാം ഇത്തരമൊരു പ്രീവെഡിങ് ഷൂട്ട് നടത്താന്‍ തയാറായത്. 

'പരമ്പരാഗത വേഷത്തിലെത്തുന്ന ആണ്‍കുട്ടിയും പെണ്‍കുട്ടിയും എല്ലാ പ്രീവെഡിങ് വീഡിയോകളിലും സര്‍വ്വസാധാരണമാണ്. എന്നാല്‍ അതില്‍നിന്നെല്ലാം മാറിനില്‍ക്കുന്ന തികച്ചും രസകരവും ക്രിയാത്മകവുമായ ഒരു ഷൂട്ട് ആണ് ഞങ്ങള്‍ ഉദ്ദേശിച്ചത്' ഹരീന്ദര്‍ സിങ് പറഞ്ഞു.

ഏതായാലും ഇനിയങ്ങോട്ടെന്നും ഭക്ഷണവും ജീവിതവും പങ്കുവെയ്ക്കാനായി ഇവരൊന്നിക്കുകയാണ്. നവംബര്‍ നാലിന് നടക്കുന്ന വിവാഹത്തിനായി ഇരുവരും കഴിച്ച് കഴിച്ച് ഒരുങ്ങിക്കഴിഞ്ഞു...