മരിക്കാത്ത ഓർമ്മകളുമായി ഡോ ധനലക്ഷ്മി; മരണത്തിന് മുൻപ് എഴുതിയ നോവൽ 'അൺഫിറ്റഡ്' കണ്ണൂരിൽ പ്രകാശനം ചെയ്യും

കണ്ണൂർ: എഴുത്തുകാരിയുംസാമൂഹിക പ്രവർത്തകയുമായ ഡോ ധനലക്ഷ്മി അരയക്കണ്ടിയുടെ വിയോഗത്തിന് ഈ ജൂലൈ 21-ന് ഒരു വർഷം തികയുകയാണ്. ധനലക്ഷ്മി നമ്മെ വിട്ടുപിരിഞ്ഞെങ്കിലും, അവരുടെ മരിക്കാത്ത ഓർമ്മകളെ സാഹിത്യലോകത്ത് സജീവമായി നിലനിർത്താനുള്ള ഒരുക്കത്തിലാണ് ബന്ധുക്കളും സുഹൃദ്‌വലയവും. ഇതിന്റെ ഭാഗമായി, മരണത്തിന് മുൻപ് അവർ എഴുതി പൂർത്തിയാക്കിയ 'അൺഫിറ്റഡ്' (Unfitted) എന്ന ഇംഗ്ലീഷ് നോവൽ പ്രകാശനത്തിനൊരുങ്ങുകയാണ്. ധനലക്ഷ്മിയുടെ ഒന്നാം ചരമവാർഷികത്തോടനുബന്ധിച്ച് ജൂലൈ 26-ന് കണ്ണൂരിൽ നടക്കുന്ന പ്രത്യേക ചടങ്ങിൽ സിപിഐ സംസ്ഥാന സെക്രട്ടറി ബിനോയ് വിശ്വം പുസ്തകം പ്രകാശനം ചെയ്യും.

കണ്ണൂർ തളാപ്പ് സ്വദേശിനിയായ ഡോ. ധനലക്ഷ്മി 2025 ജൂലൈ 21-നാണ് അബുദാബിയിലെ താമസസ്ഥലത്ത് വെച്ച് മരണപ്പെടുന്നത്. ജീവിതത്തെ എപ്പോഴും പോസിറ്റീവായും മനോഹരമായും നോക്കിക്കണ്ടിരുന്ന ഈ യുവ ഡോക്ടറുടെ അപ്രതീക്ഷിത വിയോഗം അന്ന് പ്രവാസ ലോകത്തെയും ജന്മനാടിനെയും ഒന്നുപോലെ ഞെട്ടിച്ച ഒന്നായിരുന്നു.

മൂന്ന് കുട്ടികളുടെ അമ്മയുടെ അതിജീവന കഥ; സാഹിത്യത്തോട് കടുത്ത അഭിനിവേശം

'അൺഫിറ്റഡ്' എന്ന ഇംഗ്ലീഷ് നോവൽ ഉൾപ്പെടെ മൂന്ന് ശ്രദ്ധേയമായ പുസ്തകങ്ങളുടെ രചയിതാവാണ് ഡോ. ധനലക്ഷ്മി.മൂന്ന് കുട്ടികളുള്ള ഒരു സാധാരണ അമ്മയുടെ ജീവിത പോരാട്ടങ്ങളുടെയും ശക്തമായ അതിജീവനത്തിന്റെയും കഥയാണ് 'അൺഫിറ്റഡ്' എന്ന നോവലിലൂടെ അവർ വായനക്കാർക്ക് മുന്നിൽ അവതരിപ്പിക്കുന്നത്. 'ഇനി എത്ര നാൾ' എന്ന പേരിൽ 42 കവിതകളടങ്ങുന്ന കവിതാസമാഹാരം പ്രസാധകർക്ക് അച്ചടിക്കാനായി അയച്ചുകൊടുത്തതിന് തൊട്ടുപിന്നാലെയായിരുന്നു ധനലക്ഷ്മിയുടെ അന്ത്യം സംഭവിച്ചത്.പത്ത് വർഷത്തിലേറെയായി യുഎഇയിൽ പ്രവാസിയായിരുന്ന ഡോക്ടർക്ക് അവിടുത്തെ തിരക്കുകൾക്കിടയിലും സാഹിത്യത്തോടും എഴുത്തിനോടും കടുത്ത അഭിനിവേശമുണ്ടായിരുന്നു. സോഷ്യൽ മീഡിയയിലൂടെയും അവർ തന്റെ എഴുത്തുകൾ പങ്കുവെച്ച് ശ്രദ്ധ നേടിയിരുന്നു.

നാടിന് പ്രിയങ്കരിയായ ഡോക്ടർ

കണ്ണൂർ സെന്റ് തെരേസാസ് സ്കൂളിലായിരുന്നു ധനലക്ഷ്മി തന്റെ പ്രാഥമിക വിദ്യാഭ്യാസം തുടങ്ങിയത്. തുടർന്ന് പ്രശസ്തമായ മണിപ്പാൽ കസ്തൂർബാ മെഡിക്കൽ കോളേജിൽ നിന്നും ബിഡിഎസ് ബിരുദം പൂർത്തിയാക്കി ദന്തഡോക്ടറായി മാറി. അതിനുശേഷം തലശ്ശേരി ഇന്ദിരാഗാന്ധി കോ-ഓപ്പറേറ്റീവ് ആശുപത്രിയിൽ 10 വർഷത്തോളം ദീർഘമായി പ്രാക്ടീസ് ചെയ്തു.വിവാഹശേഷമാണ് അവർ പ്രവാസജീവിതത്തിലേക്ക് കടക്കുന്നതും അബുദാബിയിലേക്ക് മാറുന്നതും. എങ്കിലും അവധിക്കാലങ്ങളിൽ ജന്മനാടായ കണ്ണൂർ തളാപ്പിലെ വീട്ടിൽ എത്തുമ്പോഴെല്ലാം നാട്ടിലെ സാമൂഹിക-സാംസ്കാരിക രംഗങ്ങളിൽ സജീവമായി ഇടപെടാനും അവർ സമയം കണ്ടെത്തിയിരുന്നു. പ്രിയ എഴുത്തുകാരിയുടെ ഓർമ്മകൾക്ക് മുന്നിൽ പുസ്തകോപഹാര സമർപ്പണവുമായി ജൂലൈ 26-ന്റെ ചടങ്ങ് മാറും