പാലക്കാട് നഗരവാസികളുടെ ദീർഘകാല സ്വപ്നം യാഥാർത്ഥ്യമായി: കെഎസ്ആർടിസി സിറ്റി സർക്കുലർ സർവീസ് ആരംഭിച്ചു

പാലക്കാട്: പാലക്കാട് നഗരത്തിലെ പ്രധാന കേന്ദ്രങ്ങളെ പരസ്പരം ബന്ധിപ്പിച്ചുകൊണ്ടുള്ള കെ.എസ്.ആർ.ടി.സിയുടെ പുതിയ സിറ്റി സർക്കുലർ സർവീസുകൾക്ക് തുടക്കമായി. പാലക്കാട് കെ.എസ്.ആർ.ടി.സി ബസ് സ്റ്റേഷൻ വളപ്പിൽ നടന്ന ചടങ്ങിൽ രമേഷ് പിഷാരടി എംഎൽഎ സർവീസിന്റെ ഫ്ലാഗ് ഓഫ് നിർവ്വഹിച്ചു. നഗരവാസികളുടെ ദീർഘകാലമായുള്ള പ്രധാന ആവശ്യത്തിനാണ് ഇതോടെ പരിഹാരമായിരിക്കുന്നത്. എംഎൽഎ പ്രഖ്യാപിച്ച 111 ദിന കർമ്മ പരിപാടിയിൽ ഉൾപ്പെടുത്തിയിട്ടുള്ള ഒരു പ്രധാന പദ്ധതി കൂടിയാണിത്. എംഎൽഎയുടെ പ്രത്യേക അഭ്യർത്ഥന മാനിച്ചാണ് ഗതാഗത വകുപ്പ് മന്ത്രി സി.പി. ജോൺ പദ്ധതിക്കായി പുതിയ ബസ് അനുവദിച്ചു നൽകിയത്.

മെഡിക്കൽ കോളജ്, ജില്ലാ ആശുപത്രി, സ്റ്റേഡിയം ബസ് സ്റ്റാൻഡ്, ഒലവക്കോട് റെയിൽവേ സ്റ്റേഷൻ, ബിഗ് ബസാർ സ്കൂൾ, കല്ലേക്കാട് രാജീവ് ഗാന്ധി സഹകരണ ആശുപത്രി, പാലക്കാട് കെഎസ്ആർടിസി ഡിപ്പോ തുടങ്ങി നഗരത്തിലെ പ്രധാന കേന്ദ്രങ്ങള്‍ കോർത്തിണക്കിയാണ് ബസിനായുള്ള റൂട്ട് തയാറാക്കിയിട്ടുള്ളത്. സിറ്റി സർക്കുലർ സർവീസിന്റെ ആദ്യഘട്ട പ്രവർത്തനങ്ങൾ വിജയിക്കുന്ന മുറയ്ക്ക് കൂടുതൽ റൂട്ടുകളിലേക്ക് സർവീസ് വ്യാപിപ്പിക്കാൻ നടപടിയെടുക്കുമെന്ന് ചടങ്ങിൽ എംഎൽഎ വ്യക്തമാക്കി.