അന്‍വര്‍ അലി എഴുതിയ കവിത: കവികളോടായ്

സൈലന്റ് വാലിയിൽ പോകും വഴി

ഇലചോന്നു നിന്നൊരു പൂവമരം1

തലയാട്ടിച്ചോദിച്ചു കവികളോടായ്:

സുഗതകുമാരീടെ മക്കളല്ലേ?

നഗരത്തിൽ പാർട്ടിയിൽ വച്ചൊരിക്കൽ

കഥയുടെ പെരുമാളു കറിയാച്ചനും2

കളിയാക്കിച്ചോദിച്ചു കവികളോടായ്:

സുഗതകുമാരീടെ മക്കളല്ലേ?

ഒഴുകിപ്പോയ് കുന്തിപ്പുഴയിലൂടെ

ഒരു കൊല്ലം പലകൊല്ലം, മലവെള്ളമായ്

അലറുന്നു പൂവവും കാടും കറിയയും:

സുഗതകുമാരീടെ മക്കളല്ലേ?

അലറുന്നു ചെമ്പ്രയും ചൂരൽമലകളും

വയനാടും മലനാടിൻ സകലമുടികളും:

സുഗതകുമാരീടെ മക്കളല്ലേ?

ഇടനാടും തിരനാടും കഥനാടുമൊരുമിച്ച്:

സുഗതകുമാരീടെ മക്കളല്ലേ?

---

1. ഇല കുനുകുനെ ചുവന്ന ഒരു സുന്ദരമരം. സൈരന്ധ്രിയിലേക്കുള്ള വഴിക്കാടുകളിൽ ഇടയ്ക്കിടെ കാണാം.

2. പ്രിയ കഥാകാരൻ സക്കറിയ.