ശീമക്കൊന്ന തഴച്ചുനില്‍ക്കും
വേലിക്കരികില്‍ ടാറിട്ട റോഡ്
നടന്നുപോകുന്ന സ്‌കൂള്‍കുട്ടികള്‍
ബസ്, കാര്‍, ഇരുചക്രവാഹനങ്ങള്‍
കാളവണ്ടി, കാല്‍നടക്കാര്‍.
ടാറിട്ട റോഡിനടുത്ത്
പഞ്ചായത്തുകിണര്‍
ആണും പെണ്ണും കുട്ടികളും
*സമൂഹബലിപോലെ
ഒരുമിച്ച് കുളിക്കുന്നിടം
നോട്ടങ്ങളില്‍ പതറാതെ
തോര്‍ത്തുപിഴിഞ്ഞ് നനവുമാറ്റി
നാണിക്കാന്‍ വേറെ
കിണറില്ലാത്തവര്‍.
കിണറിനപ്പുറം തിട്ട
എല്ലാം കണ്ട് കണ്ണടയ്ക്കും
പള്ളിക്കുരിശ്.
താഴെ ദിവസവും യന്ത്രംപോലെ
തുറന്നടയുന്ന പള്ളിവാതില്‍.
പള്ളിപ്പൂജ നടക്കുമ്പോഴും
കുളിക്കുന്നുണ്ടാവുമാളുകള്‍.
തൊട്ടടുത്ത് സിമിത്തേരി
ഉറ്റവര്‍ ഉടയവര്‍
എല്ലാരുമുണ്ടവിടെ.
റോഡും കിണറും പള്ളിയും
സിമിത്തേരിയും കണ്ട്
കാണാപ്പുറങ്ങളില്‍
കാറ്റുവിതയ്ക്കുന്നവര്‍ ഞങ്ങള്‍.
* പൂജ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates