'അറിഞ്ഞിട്ടില്ലാത്തവയുടെ അനുബന്ധങ്ങള്‍'- ടി.പി.വിനോദ് എഴുതിയ കവിത 

ഒരാളുടെ പ്രേതത്തിനോട്
അയാളെപ്പറ്റിത്തന്നെ
സംസാരിക്കുന്നതായി
സ്വപ്നം കണ്ട രാത്രി.

ആ രാത്രിയുടെ
അപ്പുറത്തെയോ
ഇപ്പുറത്തെയോ പകല്‍.

പകലില്‍
ആത്മാവിന്റെ അഴിമുഖം.
 
എന്റെ ആത്മാവ്
ജീവിച്ചിരിക്കുന്നതും
ജീവിച്ചിരുന്നതും
ജനിക്കാനിരിക്കുന്നതുമായ
സഹസ്രകോടി ആത്മാവുകളിലേക്ക്
ശബ്ദായമാനമായി
കുത്തിയൊഴുകിച്ചിതറുന്നു, കലരുന്നു.

നിരര്‍ത്ഥകതയുടെ ചോരയാണ് സമയമെന്ന്
അശരീരിയുണ്ടാകുന്നു. പക്ഷേ,
നിരര്‍ത്ഥകതയുടെ ഹൃദയമെന്ത്
എന്ന ചോദ്യമാണ് പ്രതിദ്ധ്വനിക്കുന്നത്.

അറിഞ്ഞിട്ടില്ലാത്തവയുടെ
അനുബന്ധങ്ങളായി
നമ്മളില്‍ നമ്മള്‍
പ്രതിദ്ധ്വനിക്കുന്നതുപോലെ.