ഇമോജികള്‍

കൂട്ടുപിരിഞ്ഞെട്ടു വര്‍ഷം കഴിഞ്ഞവള്‍ 
വാട്സാപ്പയച്ചു - നിറവൊത്ത ജീവിതം
കുട്ടികള്‍, വാര്‍ഷികാഘോഷം, മധുരം മുറിക്കല്‍ 
ചേട്ടനോടൊത്തെടുത്തതാം 'സെല്‍ഫി'കള്‍ 

ഒറ്റയായ്, അറ്റുപോയതോ, മറ്റ്
തെറ്റ് പറ്റിയ തോന്നലോ, കുറ്റബോധമോ
ചെറ്റ് നിശ്ചയമില്ലാത്ത, അറ്റമില്ലാത്ത
പറ്റ് വീട്ടാത്ത പുസ്തകം പോലെ ഞാന്‍ 

എങ്ങനെ പ്രത്യഭിവാദനം, വിരല്‍ തൊ-
ട്ടെങ്ങുമില്ലാത്ത പരിഭ്രമ ഗദ്ഗദം
വേണ്ട വാക്കുകള്‍, വിരല്‍ വെച്ചെടു-
ക്കേണ്ട, നിയതഭാവമാം വ്യഞ്ജന മതിയിനി-

ചിരിതരം പോലെ മഞ്ഞപ്പിമോജികള്‍
വരിനിന്നു തുള്ളും, പതിയാന്‍ മിടിക്കും
കൊഞ്ഞപ്പ് മുഞ്ഞികള്‍, ചരാചര സങ്കേത-
മാര്‍ന്നടയാളങ്ങള്‍, മടിപ്പേച്ചടുക്കുകള്‍.

ഉടക്കീ നീലക്കുട; അതില്‍ വീഴാന്‍
തുടിക്കും ഇരുതുള്ളി, കുടക്കൂട്ട് ആണ്‍തുണ
ഭാവാര്‍ത്ഥമൊന്നായ് നിവര്‍ത്തുന്നു
പൂര്‍ണ്ണമായ് ഒറ്റ ഞെക്കില്‍ ഇമോജിയില്‍ 

ക്ഷമിക്കണേ ധ്വനികാവ്യമല്ല വാട്‌സപ്പുടക്കുകള്‍
വിനിമയക്കുട ചുരുക്കിവെച്ചേക്കു നീ...