'96' ലെ എസ് ജാനകിയുടെ രം​ഗം ഒഴിവാക്കാൻ കാരണമുണ്ട് ; വിശദീകരണവും ചർച്ചയാകുന്നു ( വീഡിയോ )

ചെന്നൈ : തമിഴകത്ത് പ്രേക്ഷകരെ ഏറെ ആകർഷിച്ച സിനിമയാണ് വിജയ് സേതുപതിയും തൃഷയും നായികാനായകന്മാരായി അഭിനയിച്ച റൊമാന്റിക് ഫിലിം 96. റാമിന്റെയും ജാനുവിന്റെയും പ്രണയത്തിലൂടെ, സ്കൂൾ കാലഘട്ടത്തിലെ ​ഗൃഹാതുരതയിലേക്കാണ് ചിത്രം പ്രേക്ഷകരെ കൈപിടിച്ച് കൊണ്ടുപോയത്. ചിത്രത്തിലെ  'കാതലേ കാതലേ' എന്ന ഗാനവും സിനിമാപ്രേമികളെ ഹഠാദാകർഷിച്ചിരുന്നു. 

ഇപ്പോൾ ചിത്രത്തിൽ നിന്നും പ്രമുഖ ​ഗായിക എസ് ജാനകിയുടെ രം​ഗം ഒഴിവാക്കിയതാണ് പുതിയ ചർച്ചയായിരിക്കുന്നത്. സർപ്രൈസ് ആയിട്ട് അണിയറ പ്രവർത്തകർ പുറത്തുവിട്ട ആ രംഗം ഇപ്പോൾ ഏറെ ചർച്ചയാവുകയാണ്.

എസ്. ജാനകി അഭിനയിച്ച രംഗത്തിനു സമ്മിശ്ര പ്രതികരണമാണു സമൂഹമാധ്യമങ്ങളിൽ നിന്നും ലഭിക്കുന്നത്. എന്തിനാണ് ഈ സീൻ ഒഴിവാക്കിയതെന്നു ചോദിക്കുന്നവരാണ് ഏറെയും. ജാനകിയമ്മ ഉൾപ്പെട്ട ഈ സീൻ ഉൾപ്പെടുത്താമായിരുന്നു എന്നാണ് ആരാധകരുടെ അഭിപ്രായം.  എന്നാൽ ഇതിനു വ്യക്തമായ കാരണം ഉണ്ടെന്നാണ് ചിലർ പറയുന്നത്. 

എസ്. ജാനകി അഭിനയിച്ച സീൻ ഒഴിവാക്കിയതിന്റെ പ്രധാന കാരണമായി ഇവർ ചൂണ്ടിക്കാട്ടുന്നത് ഇതാണ്. ഈ രംഗം ഒഴിവാക്കിയില്ലെങ്കിൽ '96' എന്ന സിനിമ ഒട്ടും റിയലിസ്റ്റിക് ആകുമായിരുന്നില്ല. മാത്രമല്ല, നിലവിലെ സാഹചര്യം അനുസരിച്ച് അർധരാത്രി എസ്. ജാനകിയെ പോലെയുള്ള ഒരു ഇതിഹാസ ഗായികയുടെ വീട്ടിലേക്ക് പ്രവേശിക്കാന്‍ കഴിയില്ല. ഈ സാഹചര്യത്തിൽ ഇത്തരത്തിലൊരു രംഗം ഉൾപ്പെടുത്തിയാൽ ചിത്രത്തെ ബാധിക്കുമെന്നാണ് ഇവർ വ്യക്തമാക്കുന്നത്. 

എന്നാൽ രംഗത്തിൽ ജാനകി ചിലവരികൾ ആലപിക്കുന്നുണ്ട്. ഇതിനെ ആസ്വാദകർ വാനോളം പ്രശംസിക്കുകയാണ് . ഈ പ്രായത്തിലും എസ്.ജാനകിയുടെ ശബ്ദത്തിനു പകരം മറ്റൊരു ശബ്ദവും ഇല്ലെന്നും ആരാധകർ പറയുന്നു. യൂട്യൂബ് ട്രന്റിങ്ങിൽ ഒന്നാമത് എത്തിയിരിക്കുന്ന ആ രം​ഗം ഏതായാലും സമൂഹമാധ്യമങ്ങളിലെ ചൂടുള്ള ചർച്ചയായി മാറിയിരിക്കുകയാണ്.