ഒരു പതിറ്റാണ്ടിനു ശേഷം വീണ്ടും ദീപക് ഏട്ടനൊപ്പം പാട്ട്; പൃഥ്വിരാജിന് നന്ദി പറഞ്ഞ് വിനീത്

മോഹൻലാലും പൃഥ്വിരാജും ഒന്നിക്കുന്ന ബ്രോ ഡാഡി ആരാധകർ വളരെ പ്രതീക്ഷയോടെ കാത്തിരിക്കുന്ന ചിത്രമാണ്. ചിത്രത്തിന്റെ അണിയറയിലും പ്രമുഖരാണ് അണിനിരക്കുന്നത്. ഇപ്പോൾ ബ്രോ ഡാഡിയുടെ സം​ഗീതത്തിനായി ഒന്നിക്കുകയാണ് ദീപക് ദേവും വിനീത് ശ്രീനിവാസനും. ഒരു വർഷത്തിനു ശേഷം ദീപക് ദേവിനൊപ്പം ഒന്നിക്കുന്നതിന്റെ സന്തോഷം വിനീതാണ് പങ്കുവെച്ചത്. 

ഒരു പതിറ്റാണ്ടിനു ശേഷം ഞാൻ ഇന്ന് ദീപക് ഏട്ടനൊപ്പം പാട്ട് റെക്കോർഡ് ചെയ്തു. 17 വർഷം മുൻപാണ് കരളെ എന്ന ​ഗാനം അദ്ദേഹത്തിനൊപ്പം ഞാൻ റെക്കോർഡ് ചെയ്യുന്നത്. 2005ൽ റിലീസായ ​ഗാനം എന്റെ എല്ലാം മാറ്റിമറിച്ചു. നരൻ ഉൾപ്പടെ നിരവധി മനോഹരമായ ​ഗാനങ്ങൾ ദീപക് ഏട്ടൻ എനിക്കു തന്നു. ബ്രോ ഡാഡിക്കുവേണ്ടിയുള്ള ഈ ​ഗാനം മനോഹരമായ നിരവധി ഓർമകൾ തിരിച്ചുകൊണ്ടുവന്നു. ഈ ​ഗാനം നൽകിയതിന് നന്ദി പ‍ൃഥ്വിരാജ്.- വിനീത് ശ്രീനിവാസൻ കുറിച്ചു. 

വിനീതിനും ദീപക്കിനും നന്ദി പറഞ്ഞ് പൃഥ്വിരാജും പോസ്റ്റിട്ടിട്ടുണ്ട്. മോഹൻലാൽ- പൃഥ്വിരാജ് കൂട്ടുക്കെട്ടിൽ ഒരുങ്ങുന്ന ചിത്രത്തിൽ കല്യാണി പ്രിയദർശനാണ് നായിക. ഇവരെ കൂടാതെ മീന, ലാലു അലക്സ്, മുരളി ഗോപി, കനിഹ, സൗബിൻ ഷാഹിർ തുടങ്ങിയ വമ്പൻ താരനിരയുമായാണ് ബ്രോ ഡാഡി എത്തുക. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് ചിത്രം നിർമ്മിക്കുന്നത്.