'പക്വതയോടെ എടുത്ത തീരുമാനം, സ്വകാര്യതയെ മാനിക്കണം'; വിവാഹമോചിതനായെന്ന് നടൻ ഷിജു

സിനിമ- സീരിയൽ താരം ഷിജു എ ആർ വിവാഹമോചിതനായി. ഭാര്യ പ്രീതി പ്രേമും താനും ഔദ്യോഗികമായി വേർപിരിഞ്ഞ വിവരം നടൻ തന്നെയാണ് സോഷ്യൽ മീ‍ഡിയയിലൂടെ അറിയിച്ചത്. നീണ്ട കാലത്തെ ദാമ്പത്യത്തിന് ശേഷമാണ് ഇരുവരും വേർപിരിയുന്നത്. പരസ്പര സമ്മതത്തോടും പക്വതയോടും കൂടിയാണ് ഇങ്ങനെയൊരു തീരുമാനത്തിലേക്ക് എത്തിയതെന്ന് ഷിജു അറിയിച്ചു.

വേർപിരിഞ്ഞെങ്കിലും പ്രീതിയുമായി നല്ലൊരു സൗഹൃദം തുടർന്നും കാത്തുസൂക്ഷിക്കുമെന്നും ഷിജു വ്യക്തമാക്കി. ‘‘ഞാനും പ്രീതി പ്രേമും ഔദ്യോഗികമായി വിവാഹമോചിതരായി എന്ന വിവരം ഇതിനാൽ അറിയിക്കുന്നു. പരസ്പര ബഹുമാനത്തോടെയും സമ്മതത്തോടെയുമാണ് ഞങ്ങൾ വേർപിരിയാൻ തീരുമാനിച്ചത്.

ഇപ്പോഴും നല്ല സുഹൃത്തുക്കളായി തുടരാൻ തന്നെയാണ് ഞങ്ങളുടെ തീരുമാനം. തികഞ്ഞ പക്വതയോടും ധാരണയോടും കൂടിയാണ് ഞങ്ങൾ ഈ തീരുമാനമെടുത്തത്. ഞങ്ങളുടെ സ്വകാര്യതയെ മാനിക്കണമെന്നും അഭ്യൂഹങ്ങൾ പ്രചരിപ്പിക്കരുതെന്നും മാധ്യമങ്ങളോടും സുഹൃത്തുക്കളോടും അഭ്യുദയകാംക്ഷികളോടും ഞങ്ങൾ അഭ്യർഥിക്കുന്നു.

ഞങ്ങളുടെ പുതിയ യാത്രയിൽ നിങ്ങൾ നൽകുന്ന പിന്തുണയ്ക്കും സഹകരണത്തിനും നന്ദി. ഷിജു എ ആർ’’- ഷിജു കുറിച്ചു. മലയാളം, തമിഴ്, തെലുങ്ക് സിനിമകളിലും ടെലിവിഷൻ പരമ്പരകളിലും സജീവമാണ് ഷിജു. മലയാളം ബി​ഗ് ബോസ് സീസൺ 5 മത്സരാർഥിയായിരുന്നു. അകലെ എന്ന പരമ്പരയിലാണ് ഷിജു ഇപ്പോൾ അഭിനയിച്ചു കൊണ്ടിരിക്കുന്നത്.