ഇത് തീരെ പ്രതീക്ഷിച്ചില്ല! അജിത്തിന്റെ റേസിങ് യാത്ര ഇനി ബി​ഗ് സ്ക്രീനിൽ കാണാം; 'ഗ്ലാഡിയേറ്റേഴ്‌സ്' മോഷൻ പോസ്റ്റർ

തമിഴകത്ത് ഏറ്റവും കൂടുതൽ ആരാധകരുള്ള നടൻമാരിലൊരാളാണ് അജിത് കുമാർ. അഭിനയം പോലെ തന്നെ റേസിങ്ങും അജിത്തിന്‍റെ പാഷനാണ്. മെയ് ഒന്നിനായിരുന്നു അജിത്തിന്റെ 55-ാം പിറന്നാൾ. താരത്തിന്റെ പിറന്നാളിനോടനുബന്ധിച്ച് അജിത്തിന്റെ പുതിയ ചിത്രമായ ​ഗ്ലാഡിയേറ്റേഴ്സിന്റെ ​മോഷൻ പോസ്റ്റർ പുറത്തുവന്നിരിക്കുകയാണ്.

ആരാധകർക്ക് വലിയ സർപ്രൈസായിരുന്നു ഇത്. ‘ഗ്ലാഡിയേറ്റേഴ്‌സ് - ഇൻ പർസ്യൂട്ട് ഓഫ് ചലഞ്ചസ്' എന്നാണ് ചിത്രത്തിന്റെ പേര്. അജിത് കുമാറിന്റെ മോട്ടോർസ്പോർട്സ് യാത്രയെ അടിസ്ഥാനമാക്കിയാണ് ഈ ചിത്രം ഒരുങ്ങുന്നത്. റേസിങ്ങിനോടുള്ള അദ്ദേഹത്തിന്റെ പ്രണയത്തെക്കുറിച്ചാണ് ചിത്രം പറയുന്നത്.

മോട്ടോർസ്പോർട്ടിനെ അദ്ദേഹം എത്ര മാത്രം ഇഷ്ടപ്പെടുന്നുവെന്നും അതിനായി അദ്ദേഹം എത്ര മാത്രം കഠിനാധ്വാനം ചെയ്യുന്നുവെന്നുമൊക്കെ ചിത്രം അവതരിപ്പിക്കുന്നുണ്ട്. എ എൽ വിജയ് ആണ് ചിത്രം സംവിധാനം ചെയ്യുന്നത്. അജിത് കുമാർ സ്പോർട്സ് സർവീസസ് എൽഎൽസിയാണ് ചിത്രം അവതരിപ്പിക്കുന്നത്. ജി വി പ്രകാശ് കുമാർ ആണ് ചിത്രത്തിന് സം​ഗീതമൊരുക്കുന്നത്.

ഏകദേശം 90 മിനിറ്റ് ദൈർഘ്യമുള്ള ചിത്രമാണിതെന്നാണ് വിവരം. ആദ്യം ഇത് ഒരു ഡോക്യുമെന്ററി ആയിട്ടാണ് പ്ലാൻ ചെയ്തിരുന്നതെന്നും പിന്നീട് സിനിമയാക്കാമെന്ന് അണിയറപ്രവർത്തകർ തീരുമാനിക്കുകയായിരുന്നുവെന്നുമാണ് റിപ്പോർട്ട്. ചിത്രം തിയറ്ററുകളിൽ റിലീസ് ചെയ്യുമെങ്കിലും കൃത്യമായ തീയതി ഇതുവരെ പ്രഖ്യാപിച്ചിട്ടില്ല.

അടുത്ത വർഷം മെയ് 1 ന്, അജിത് കുമാറിന്റെ 56-ാം ജന്മദിനത്തിൽ റിലീസ് ചെയ്യാൻ സാധ്യതയുണ്ടെന്നും വിവിധ റിപ്പോർട്ടുകൾ സൂചിപ്പിക്കുന്നു. ആദിക് രവിചന്ദ്രൻ സംവിധാനം ചെയ്യുന്ന ‘എകെ 64’ എന്ന ചിത്രവും അജിത്തിന്റേതായി അണിയറയിൽ ഒരുങ്ങുന്നുണ്ട്. കഴിഞ്ഞ വർഷം പുറത്തിറങ്ങിയ വിടാമുയർച്ചി, ​ഗുഡ് ബാഡ് അ​ഗ്ലി എന്നീ ചിത്രങ്ങളാണ് താരത്തിന്റേതായി ഒടുവിൽ തിയറ്ററുകളിലെത്തിയ ചിത്രം.