കമല്‍ഹാസന്‍ 70-ാം ജന്മദിനം ആഘോഷിച്ചത് പുതിയ സിനിമയുടെ ക്രൂവിനെ പ്രഖ്യാപിച്ചു കൊണ്ടാണ്. തല്‍ക്കാലത്തേക്ക് കെഎച്ച് 237 എന്ന് പേരിട്ടിരിക്കുന്ന സിനിമ സംസാരിക്കുന്നത് തമിഴാണെങ്കിലും അടിമുടിയൊരു 'മലയാള സിനിമ' ആയിരിക്കുമെന്ന് തോന്നിപ്പിക്കുന്നതാണ് പുതിയ പ്രഖ്യാപനം. ചിത്രത്തിന്റെ ടെക്‌നിക്കല്‍ ക്രൂവിലെ പ്രധാനികളെല്ലാം തന്നെ മലയാളികളാണ്.
ആണ്ടവരുടെ പുതിയ ചിത്രത്തിന്റെ സംഗീതമൊരുക്കുന്നത് ജേക്‌സ് ബിജോയ് ആണ്. ലോകയുടെ വന്‍ വിജയത്തിന്റെ തിളക്കവുമായാണ് ജേക്‌സ് കെഎച്ച് 237 ലേക്ക് എത്തുന്നത്. നേരത്തെ ധ്രുവങ്ങള്‍ പതിനാറ്, പോര്‍ തൊഴില്‍ തുടങ്ങിയ സിനിമകള്‍ക്ക് ജേക്‌സ് സംഗീതമൊരുക്കിയിരുന്നു. എആര്‍എമ്മും മാര്‍ക്കോയും രേഖാചിത്രവും ഒരുക്കിയ ഷമീര്‍ മുഹമ്മദായിരിക്കും കമല്‍ഹാസന്‍ ചിത്രത്തിന്റെ എഡിറ്റിങ് നിര്‍വ്വഹിക്കുക.
ആടുജീവിതത്തിന്റെ ആത്മാവായി മാറിയ വിഷ്വലുകള്‍ പകർത്തിയ സുനില്‍ കെഎസ് ആണ് കെഎച്ച് 237 ന്റെ ഛായാഗ്രാഹകന്‍. പ്രമുഖ പ്രൊഡക്ഷന്‍ ഡിസൈനര്‍ വിനേഷ് ബംഗ്ലാനേയും മലയാളത്തില്‍ നിന്നും കെഎച്ച് 237 ലെത്തിച്ചിട്ടുണ്ട്. കാന്താര ചാപ്റ്റര്‍ 1 ന്റെ വന്‍ വിജയത്തിന് ശേഷമാണ് ബംഗ്ലാന്‍ കമല്‍ ചിത്രത്തിലെത്തുന്നത്. പ്രേമത്തിന്റേയും പേട്ടയുടേയുമൊക്കെ പബ്ലിസിറ്റി ഡിസൈനറായിരുന്ന ടൂണി ജോണും കെഎച്ച് 237 ന്റെ ഭാഗമാകും.
പ്രശസ്ത ആക്ഷന്‍ കൊറിയോഗ്രാര്‍മാരായ അന്‍പ് അറിവ് സഹോദരന്മാരാണ് കമല്‍ ചിത്രത്തിന്റെ സംവിധാനം. നേരത്തെ തന്നെ മലയാളത്തിന്റെ പ്രിയ തിരക്കഥാകൃത്ത് ശ്യാം പുഷ്‌കരന്‍ കെഎച്ച് 237 ന്റെ ഭാഗമായിരുന്നു. ഇതിന് പിന്നാലെയാണ് ഇപ്പോള്‍ സംഗീത സംവിധായകനായും ഛായാഗ്രാഹകനായും കൂടുതല്‍ മലയാളികള്‍ സിനിമയിലേക്ക് എ്തതുന്നത്.
രാജ് കമല്‍ ഫിലിംസ് ആണ് സിനിമയുടെ നിര്‍മാണം. ചിത്രത്തില്‍ മറ്റ് താരങ്ങള്‍ ആരൊക്കെയാകും ഉണ്ടാവുകയെന്നത് സംബന്ധിച്ച് ഔദ്യോഗിക പ്രഖ്യാപനമൊന്നും വന്നിട്ടില്ല. അധികം വൈകാതെ തന്നെ സിനിമയുടെ ചിത്രീകരണം ആരംഭിക്കുമെന്നാണ് റിപ്പോര്‍ട്ടുകള്‍.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
